1 JUAN 1

Jesosa Quito ojjaña esecuana eshe pomeejji nequipoquianitii

1Ecuaa jiquio tehueaña miquianaja ebajji joya Esohui e'ejojonei poani bajjanijo. Oya ojjaña esecuana eshe pomeejji nequipoquianitii pea-ai. Ojjaña jiquio meshijo aquianacuana chamahuajo oja panajjimahuajo oya enequitiiya poa. Ecuaa ohua Eyacuiñajjija esohui huohuicapoquije shajja-ajjapoquiapoa. Ecuanaja ecojjaa oya bapoquiapoa. Ecuanaja emeya oya yami napapoa. 2Joya ese Eyahuasijje ba'etiitiimee'yojji poani jiquio meshiyasijje Eyacuiñajjiya huoojeacapoa. Maya ecuaa bapoa ecuanaja ecojjaa. Jamajjeya ecuaa queahuisocuana, miquianaya pea-ai tehueaña achajja oya nequipoquiapoa jiquio meshijo. Coma oja huoojeaaya queahuisoneecuana ba'etiitiimeecaje'yo Eyacuiñajji nequi meshiyasijje onijje. Eyacuiñajji Echii-ainijje nequi oya jiquiacua jiquio meshiyasijje poeapoa ecuananijje ba'eya. 3Jamajjeya ecuaa miquianaque tehueaña ma oja huohui esohui ecuaa shajja-ajjapoquiapoa huisotiijo, ma ecuaa o bapoquiapoajo pea-aiya. Majoya quiana huohuiaña miquianaya ecuana jayojja pea-ai jjashahuabaquime epojji Quitojo. Majoya ecuana jayojja pea-ai jjashahuabaquime pomajje Eyacuiñajji Echii-ainijje queapame jjapeequipoquije, oja Bacuaejja Jesosa Quitonijje pea-ai jjapeequipoquije. 4Jamajjeya jiquio esohui ecuaa jama tehueme aña miquiana queabihui ba'epoquijji. Ecuana jayojja pea-ai jjashahuabaquime pomajje quiana Quitojo queabihui ba'epoquije.

5Jiquia aje ma yahuajo Jesosa Quitohua ecuana huohuicapoa, oya esohuiya ecuaa quiana jjeya huohuiaña jama ba'a: “Eyacuiñajji queajeaja'anee queasajajanee jama. Jamajjeya ojaya chama'neinei quea-aapo epojji che bisoneicuanama'.” 6Eseya pojja'a jama poani ba'a: “Eseya ojaya'yo, onijje queapame jjapeequipoquiani.” Majoya jama pomajje se quea-aapo jayojjatii ba'epoquiani. Oja esohui jayojja miba'epoquimajje ca se ca siajjepojji poani. Eseya queapame pojjeama ba'epoquiani oja esohui e'ejojonei poani jama pojjeama. 7Eseya queaja'a ba'epoquiani cuaquijiji jama joya ecua Eyacuiñajji queajeaja'aneetii nequipoquiani, jama pea-ai pomajjeya queabihui jjapeequipoquije pea Jesosaja epeejjicuananijje. Jama poajoya oja bacuaejja Jesosa Quitoja enaa eseja mimishicuana ojjaña cuijeacapoquije'yo.

8Eseya becacuana pojja'a jama poani ba'a: “Eya ca iña mimishiamanei ba'epoquiani, che oe mimishima'nei ca iña poani.” Jama pomajje se eseyanei jjadasiaquiani, Eyacuiñajjija esohui e'ejojonei chama'nei eseja sapajo. 9Jamajjeya se oe queamimishi pomajje Eyacuiñajjinijje mimica'yojji eseja mimishijo. Jama mimime ese po'yajoya Eyacuiñajjiya eseja mimishi cuijeacaje'yo, eseja eyamiquipajje mimishima' acaje queaboejea ese epo'yojji. Eyacuiñajji oya queapamenee poaniyajjejojo oja esohui ajeyocaniyajjejojo jamaya se acaje'yo ohuaya. 10Beca pojja'a se jama poani ba'a: “Eya ca iña queamimishi pojjima'tii ba'e.” Joya jama mimime pojjicuaa Eyacuiñajji siajjepojji jayojja acani. Oja esohui jama poani ojjaña queamimishi epojeyojeyo. Jamajjeya jama mimime pomajje eseya oja esohui sapo-ajjanei poani.

Currently Selected:

1 JUAN 1: ESE

Highlight

Compare

Copy