1 CORINTIOS 15
15
Esohui Jesosa Quito shequi'yapoajo tehuecapoa
1Jesosaja epeejji ecue dohuecuana jjo'icuana, shahuaba'yocue quiaa ma eya miquiana yahuajo huohuinaje esohui queapame Quitojo. Esohui queapame Quitojo shajja-ajjamajje jjashahuabaqui'yonaje quiana ojo ejjanahuemeequi'yojji. Jjeya pea-aiya Quitojo queaca'a ba'epoquiani quiana. 2Jiquio esohui queapame Quitojo eyaya quiana yahuajopishana huohuinaje. Jiquio esohui queapame Quitojo quiana jjanahuemeequi'yonaje ma pojjajotiiya miquiana jjashahuabaqui'yonajejotii. E'e pojja'a miquiana ca beca e'ejojonei pojjeama jjashahuabaquinaje. Jamajjeya Eyacuiñajjija enahue'yojji pojjeama quiana poaje.
3Ebionei quiana eyaya esohui queapamenee huohuinaje ma Eyacuiñajjiya e bameecapoa esohuiya. Huohuinaje Quito mano'yapoa eseja mimishicuanajo yahuajonei. Eyacuiñajjija esohui yahuajonei etehue jaa jamaya poani. 4Majoya aje oya huananobiacapoa cuaa meijjaniyasijje. Tres cahuime huiso Quito emano'yo jaa Eyacuiñajjiya shequimeeca'yapoa. Eyacuiñajjija esohui yahuajonei etehue jaa jamaya poani. 5Majoya aje quijje oya shequi'yomajje Pedrojo jjabameequi'yapoa. Ma oja babaca 12 dejjacuanajo pea-ai jjabameepea-aiqui'yapoa pea pojjajo. 6Majoya queahuisoneejo pea-ai 500 huisome oja epeejjicuanajo Quito jjabameequi'yapoa oya pojjajotiiya. Ma o ba'yojji poacuana beshahuanei ojjañatii jjeya eshetii ba'e. Becacuana ca mano'yonaje. 7Majoya Santiagojo Quito jjabameepea-aiqui'yapoa. Majoya quijjepishana oya ojjaña oja babaca ona sohuihuohuiquinequijji poanicuanajo jjabameequio'oyapoa. Jamaya Quito po'yapoa.
8Majoya aje quijje-ejjenei ejo pea-ai oya jjabameequi'yapoa. Eya quijje-ejjenei babacacapoa ona sohuihuohuiquinequijji epojji. Joya ecua ebacua teejo ba'e tiiajjajjima cuayacuajiani jama eya poani. 9Eyacuiñajjiya eya babacapea-aicapoa ona sohuihuohuiquinequijji epojji jamatii eya queamimishihuiso ba'e ma ecua pea oja ebionei babaca dejjacuana jama pojjeama. Eya oja babaca poani aca-ajja jjabaquiani eya yahuajo queamasenee nequiapoajjejojoya Jesosaja epeejjicuananijje. 10Eyacuiñajjiya caca oe eya queapamenee acapoa ojayanei ejjashahuabaquijjijo jamatii eya queamimishi ba'e. Jamajjeya ohuaya eya babacacapoa ona sohuihuohuiquinequijji epojji. Jamatii pojjeama ohuaya eya queapamenee acapoa ojayanei ejjashahuabaquijjijo, jamajjeya eya hueya-amanei ojo chacochacopoquiani. Ma ecua pea oja babacacuana chacochacopoquiani jama pojjeama eya queahuisonee chacochacopoquiani ojo. Eneitii pojjeama ca iña chacochacopoquiani ojo. Eyacuiñajjiya ca eya queapame chacomeesahuacani. 11Ma pea oja babacacuaa, eyaya pea-ai oya esohui queapameya Quitojo huohuipoquiaña cuana. Jamajjeya ache dejjaja huohuijo miquiaaya esohui shajja-ajjanaje jjashahuabaquica-ajja. Oya esohuijotiiya quiana jjashahuabaquipoqui'yani.
Dejjacuana eponacuana pea-ai emano'yo jaa shequimeecaje'yo
12Bacue, e'ejojonei ecuaa quiana huohuiaña Eyacuiñajjiya Quito shequimeeca'yapoa. Jamajjeya, ¿yajjajje shai beca quiana jama poani ba'a: “Emano'yocuana ca eshequi'yojjitii pojjeama poaje?” 13Emano'yocuana shequi'yojjimatii epojji poanijojjemo Quito pea-ai shequimee'yojjimatii acaquiae. 14Quito mano'yajo shequimee'yojjimatii eacapoajojjemo jiquio jjeya esohui ecuaa huohuipoquiaña peajja pome, jiquio ese ojo jjashahuabaqui'yani pea-ai enahue'yo pojjeama pome, eseja mimishijjitii se pome pea-ai. 15Oya Quito shequimee'yojjima eacapoajojjemo ecuana oja babacacuanaja esohui siajje ajji pome ecuaaya huohuipoquiañajojoya cuana Eyacuiñajjiya Quito shequimeeca'yapoa. 16Jamajjeya emano'yocuana shequi'yojjimatii epojji poanijojjemo Quito pea-ai shequimee'yojjimatii acaquiae. 17Quito shequimee'yojjimatii eacapoajojjemo jiquio ese jjashahuabaqui'yani ese nahue'yojji epojji esohui peajja pome, eseya eseja mimishijjitii pome pea-ai. 18Quito shequimee'yojjima eacapoajojjemo ma yahuajonei ojo ejjashahuabaqui'yocuana emano'yo oja mimishijjitii poquiae, jjeya pea-ai nahue'yojjimatii pome. 19Bacue, eseya mano'yomajje shequi'yojjimatii poaje jjabaquimajje jiquio jjeya eseya esohui Quitojo jjashahuabaqui'yani eshe ba'e, mahuisojoya. Majoya eseya mano'yajo ca Quitoja enahue'yojji pojjeama poaje. Jama jjashahuabaquime pomajje queayenonee se ba'epoquime, jjeya pea-ai. Jiquio oma' jayojja poanicuana queayenopishana ba'epoquiani jama pojjeama pome.
20Chojja jja ca jama pojjeama, Quito caca oe e'ejojonei Eyacuiñajjiya shequimeeca'yapoa. Quito eshequimeecoo'yojji acapoa Eyacuiñajjiya jiquio ecua dejjacuana oja sejjacoo'yo bamajje jjashahuabaquiani queahuiso sejjacapoquije'yo, jama pea-ai Quito acapoa ojjaña oja epeejjicuana eshequimeepea-ai'yojjijo. 21Bacue, oenei dejjajoya ojjañatii eseya manopoqui'yani. Oya jayojjaya oenei dejjajoya ojjaña eseya shequimeepea-aicaje'yo. 22Eseya ojjañatii Adanja osecuaja jeajjejojoya manopoqui'yani. Oya jayojjaya Eyacuiñajjiya ojjaña eseya shequimeecaje'yo Quitojo eseya onijje ojee nequi ojaya'yo bacanijojoya. 23Eyacuiñajjija ebatii poani acheshono ache shequiajajo ohuaya shequimeecaje'yo emano'yo jaacuana. Ebionei Quito shequimeecooca'yapoa. Majoya ojjaña eseya oja epeejjicuana poani quijje shequimeepea-aicaje'yo Quito jiquio meshiyasijje poeo'oyajo. 24Majoya ojjaña jiquio eseya baña huisotii oe poaje'yo. Ma pojjajotii Quitohua emeshimesecuana, pea etii poanicuana pea-ai, joya queaca'a eshahuamasecuana huoojeapoquiajji ponequinaje eyajo, eshahuamasecuana pea-ai jeabichajeajeyocaje'yo. Majoya Quitohua jama aca'yajo Eyacuiñajji eseja Chii-aiya queaca'aneetii nequiya ojjaña huoojeacapoquijetii. 25Jamajjeya jjeya Quitohua ojjañacuana huoojeacapoquiani so'o Eyacuiñajjija joya o sapo-ajjaneitii poanicuana jeabichajeajeyo'yojjimahua. 26Majoya ojjaña joya o sapo-ajjaneitii poanicuana jeabichajeajeyo'yomajje Eyacuiñajjiya eseya emanopoqui'yojjitii pojjeama pomeecaje'yo. Joya emano'yojji ese queayenonee pomeejji poani chama'yo acaje'yo. 27Eyacuiñajjija esohui yahuajonei etehue jaa jama poani ba'a: “Eyacuiñajjiya Quito ojjaña huoojeapoquiajjitii epojji nequimeecaje ojjaña etii poanicuana eyajo nequica, meshijo nequica pea-ai jeabichajeajeyo'yomajje” jamaya poani. E'ejojonei ohuaya Quitohua ojjañatii huoojeacapoquijetii, jamatii esejaya eba poani Eyacuiñajji pojjeama ohuaya huoojeacapoquije. Oya ca jama jjapomeequiajja Quitoja oya ehuoojeajji, Eyacuiñajjiya Quito jama epojjiya nequimeecajejojoya quijje. 28Jamajjeya ojjaña joya o sapo-ajjaneitii poanicuana ohua jeabichajeajeyoca'yajo Quito nequije ojjañacuana huoojeapoquiajji epojjitii. Majoya quijje Eyacuiñajjiya oja Bacuaejja Quito huoojeacapoquije ma o sapo-ajjaneitii poanajecuana jeabichajeajeyo'yojji epohua. Majoya Eyacuiñajjiya ojjañatiicuana huoojeacapoquije'yotii.
29Bacue, emano'yocuana shequi'yoajjatii poanijo jjashahuabaquimajje, ¿apiojji shai beca quiana jjaiñajeanobiameequiani enaojjohuasijje emano'yocuana nahuemeesahua'yojji epojji nisho? Asahuasahua'yoajja oya emano'yotii jaapoquije. 30Emano'yocuana shequi'yoajjatii poanijojjemo eya jamatii queacamajanee nequipoquime ona esohui ehuohuiquijji. 31Bacue, ojjaña pojjajo cua e esohui huohuiya poquije meshiyasijje majo nequicacuaa eya quecua'yosa-acani. Ecue dohuecuana jjo'icuana, jiquio esohui quiana eyaya huohuiaña e'ejojonei poani, eya queacamajanee nequi. Miquianaya ca e'ejojonei eseja Emeshimesenei Jesosa Quitojo jjashahuabaquipoqui'yani, jamajjeya majoya eya queabihuinee poani. 32Efesocuiñajjicuana pea-ai ecuea esohui shajja-ajjasapo-ajjanei poanaje. Masemasenaje enijje, e ecuia'yojji nisho jiquio ecua ibia' queamasenee jamaya poanaje cuana enijje. Jamajjeya emano'yocuana shequi'yojjimatii poanijojjemo eya jamatii ma meshijo queacamajanee ponequiquiae esohuijo. Jamatii shequi'yoajja epojji poanijjemo jjeyanei eseya jama mimime pome ba'a: “Eishi-ishi, eijjiaijjia, mecahuajje pojja'a se manoje'yo, chama'yotii se poaje'yo pojja'a” jama mimimeya se pome.
33“¡A'a quiana peacuanajo jjadasiameequijji! Bacue, joya dejja queamimishinijje jjapeequianicuana o jayojja pea-ai jjashahuabaquime poaje queamimishi pea-aiya.” 34Jamajjeya quiana oe queajjashahuabaquija'a pocue jiquio ecua se ecahui jaa shequimajje queaja'a jjabaquishequiani jamaya. ¡A'a oe queamimishitii ba'epoquijji! Becaja quianaja Eyacuiñajjija esohui bajjimanei poani. Jama poani jjabaquimajje miquiana queabichonee pocajji majoya.
Achajja emano'yocuana shequicaje'yo
35E'e pojja'a oe dejjaa huohuiajjacaje jama ba'a: “De, ¿achajja acuae emano'yocuana shequicaje'yo? ¿Ache eyami shai oya poaje'yo?” jama huohuiajjameya ohuaya acaje. 36Joya jama jjahuohuiajjaquime poani ca sapadojjoma' jayojja poani. Bacue, eso'cuana quecuacajje ejjii meshiquipajo ani ihui'yani epohua'yojji. 37Ma ohua quecuacani ca eso'nei poani, ecui pojjeama. Ohuaya eso'nei quecuacani anosoai pojja'a, shijje pojja'a. 38Majoya oya pohua'yajo Eyacuiñajjiya eso'nei jama pojjeama tiimeecani, pea'yo ma ecua oya jama epojji jjashahuabaquinaje jamaya. Ojjaña eso'cuana oya jayojja pojjeama pohuapoqui'yani. Oya jayojja pojjeama pea-ai oja cui tiimeecani. Ma Eyacuiñajji jjashahuabaquiapoa ache acui poaje, ache ao tii'yome poaje jama pea-aiya ohuaya pomeecaje. 39Oya jayojjaya Eyacuiñajjiya ojjaña jiquio meshijo nequica, anica, jaaca pea-ai eshe pomeecani jamatii oya jayojja pea-ai pojjeama poani. Dejjaja yami ca ijjiacajjicuanaja jama pojjeama, pea. Cuichojjija pea-ai ca pea eyami nahuooja jama pea-ai pojjeama. 40Oya jayojja pea-ai jiquio meshijo ba'ecaja eyami ma ecua eyajo nequicaja jama pojjeama poani, pea. Jamatii jiquio meshijo ba'ecacuanaja oja yami queapame poani. Oya jayojjaya eyajo nequicaja queapame pea-ai poani. 41Bacue, eshequi, ba'i, majametacuana pea-ai oya ja'a jayojja pea-ai pojjeama poani. Eshequi ba'i jama pojjeama. Majametacuana pea-ai oya ja'a jayojja pojjeama nequiani eyatahuatahuajo.
42Jama pea-aiya poaje'yo emano'yocuana Eyacuiñajjiya shequimeeca'yajje. Oja yami o mano'yajo mojeacaje cuaa, majoya ihuije'yo. Majoya oya shequimee'yomajje oja yami pea poaje'yo, emanobeca'yojjitii pojjeama eyami poaje'yo. 43Oja yami mojeacajo peajja poani, ihuije'yo, ca'a-ama'yo poani pea-ai. Majoya oya shequimee'yomajje oja yami pea queapamenee queaca'aneetii pea-ai nequipoquije'yo. 44Jiquio onaa mojeacapoquiani eyamicuana jiquio meshijotii eba'ejji poanaje so'o. Ma pea eyami o shequimeecaje'yo ca eba'etiitii'yojji poaje Eyahuasijje. Bacue, esejaya eyami ebionei jiquio meshijo eba'epoquijji poani so'o. Majoya eseya quijje esejaya eyami pea poaje'yo eba'etiitii'yojji Eyahuasijje Edojjoshahuapameya ese shequimeeca'yajo.
45Eyacuiñajjija esohui yahuajonei etehue jaa jama poani ba'a: “Ebionei dejja Adán panacapoa jiquio meshijo enequijji eshajoshajojji” jamaya poa. Ma quijje poe pea Adán ca Quito poani. Oja Edojjoshahuapameya eseya ba'etiitiimeecaje'yo Eyahuasijje. 46Jjeya ca ese ba'etiitiipoqui'yojji eyami Eyahuasijje seja jjeshe'yojjima so'o. Ebionei jiquio meshijotii eba'epoquijji eyami jjeshenaje. Majoya quijje pea eyami Eyahuasijje eba'etiitiipoqui'yojji jjesheje'yo Eyacuiñajjija Edojjoshahuapameja quia. 47Ma ebionei dejja jiquio meshinei pana poa. Ma pea quijje poe dejja ca Eyajje poe poa, jiquio meshijo nequi poe pojjeama ca oma poa. 48Ojjaña eseya jiquio meshijo ba'eca Adán jayojja poani. Ojjaña joya Eyahuasijje epoqui'yojjicuana ca oja yami pea poaje'yo ma ecua quijje Eyajje poeja eyami poani jama pea-aiya poaje'yo majo eba'etiitii'yojji. 49Jamajjeya eseja eyami Adanja jama jiquio jjeya eseya eshe poanija. Majoya quijje eseya pea eyami quiacaje'yo Eyahuasijje eba'etiitii'yojji ma ecua Eyajje poeja jama. 50Ecue dohuecuana jjo'icuana, eyaya quiana jiquio jjeya huohuije. Jiquio eseja eyami ejee, esa'cuana jiquio meshijo eba'epoquijji poani ca epoqui'yojjitii pojjeama poaje'yo Eyahuasijje ma Eyacuiñajjiya huoojeacapoquianitii meshi Eyahuasijje. Jiquio quijje ihuije'yo eseja eyami ca poqui'yoajja poaje cuama.
51Baneicue jiquio jjeya eya huohuije esohui miquianajaya bajjima so'o. Jama poani ba'a: Beca eseya emano'yojjitii pojjeama poaje. Jamatii Eyacuiñajjiya eseya ojjañatii pea eyami eyacua quiacaje'yo emanobeca'yojjitii pojjeama poaje'yo. 52Ma epojja eseya pea eyami epo'yojji apoa poajo ohuaya eseya pea eyami quiacuajicaje'yo, oe capicapi poani jama acuajicaje'yo. Baasa' janobajjimanei miasajajeacaje shajja-ajjaje. Majoya ojjaña Jesosaja epeejji emano'yocuana shequimeecaje'yo, emanobeca'yojjitii pojjeama poaje'yo. Joya eshetii ojaya epeejji ba'ecacuana ca pea eyami quiacuajicaje'yo jamatii mano'yojjima eshe ba'e. 53Jiquio eseja eyami quijje manoje'yo ma ca pea emano'yojjitii pojjeama poaje'yo. Jiquio jjeya eseja eyami ese mano'yajo ihuije'yo, ma ca pea eihui'yojjitii pojjeama poaje'yo. 54Eyacuiñajjiya eseja eyami pea eyacua pomeecuajicaje'yo ma yahuajonei oja esohui tehuemeecapoa jayojjaya ajeyocaje'yo. Eyacuiñajjija esohui yahuajonei etehue jaa jama poani ba'a: “Jjeya eseya emanobeca'yojjitii pojjeama poaje'yo. Eshetii ba'epoquije'yo. 55Jjeya ca eseya mano'yomajje Eyacuiñajjijo ejjasejjaqui'yojjitii pojjeama poaje'yo. Jjeya ese mano'yojji epojja ese queaneetii pomeejji pojjeama'yo” jama tehuemeya acapoa yahuajonei. 56Ebionei eseya queameteneetii popoquinaje emano'yojjijo Eyacuiñajjiya eseya queaneenee pomeecaje'yo eseja mimishijo jjabaquimajje. Moisesja tehuecuaa eseya huohuicani quea-esejamimishihuisotii poani, quea-Eyacuiñajjihueshatii nequipoquije'yo eseja mimishicuanajo. 57Jjeya ca eseyaya Eyacuiñajji gracias apoquiaña ohua eseja Emeshimesenei Jesosa Quitojo eseya nahuecapoqui'yaniyajjejojoya. Majoya eseya quea-ohueshatii Cuaqui-aiyasijje epoqui'yojjitii pojjeama poaje'yo eseja mimishijo.
58Jamajjeya ecue dohuecuana jjo'icuana ecuea queajeanee, queaca'a ba'epoquicuetii quiana oja esohuijo. Hueya-amanei chacochacopoquicue queabihuinee Emeshimeseneijo. Miquianajaya eba Emeshimeseneijo queapame chacochacopoquimajje oja quiacuana queapamenee jjesheje ma sosejje, jamatii pojjeama chacochacoani quiana.
Currently Selected:
1 CORINTIOS 15: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
