1 CORINTIOS 16

Jesosaja epeejjicuaa bejjo quiacapoquiapoa pea Jesosaja epeejjicuana asahuajji

1Jjeya quiana eyaya huohuije so'o achajja bejjo quiacapoquijji Jesosaja epeejji Jerusalén meshijo ba'eca asahuajji yajji. Ma ecua eyaya huohuinaje Jesosaja epeejji ejjachichaquipoqui anica provincia Galacia meshijo ba'eca, jama pea-aiya oe apoquiacue. 2Bacue, domingo epojjajotii ojjaña miquiaaya Jesosaja epeejjiya bejjo huanatepecajji Eyacuiñajji quiajji. Ma miquiaaya chaconajejo jjeshe bejjo iyehuiso quiacue. Jjeya ca quianaja maya chichacajji poani ecuea miquianaque quijje poquimajje miquiana huohuiajjajjima yajji ma bejjo echichajjijo. 3Eya miquiana baa poquio'oyajo miquiaaya babacaje dejjacuana ehuoojeajji ciudad Jerusalén meshiyasijje cuamaya miquianaja quia bejjo echicha dojohua. Eyaya esohui tehueje Jerusalencuiñajjicuanaja ebajjequijji ma dejjacuana ehuoojea poani miquianaja bejjo quiañaquijjijo quijje. 4E cuama epoquipea-aijji queapame poaje jjabaquimajje ma dejjacuananijjetii eya poquipea-aije.

Pabloja ejjashahuabaquijji oja meshiyasijje epoquijji ona sohuihuohuiya

5Eya miquiana baa poquije o'oya. Ebionei eya ca provincia Macedonia meshijje jjayejjequije so'o. Majoya eya miquianaja meshi Corintohuasijje poquije. 6E'e pojja'a eya miquiananijje queacahuihuisopishana aninanaje so'o comajotiiya. Ecuea bajjima jiquio eshequiajajotii pojja'a comajotiiya anitiije queacahuihuiso miquiananijje. Majo ani eya miquianajaya poquimeesahuacajji poaje ma e quijje poquije pea meshiyasijje ona sohuihuohuiya. 7Eya ca jjeya miquianajo jjabacuajiquiani pojjeama poquisapoani. Eya ca comajotiiya queacahuihuiso anisapoani miquiananijje esohui ehuohuijji Emeshimesenei ejo jama sapoanijo. 8Eya jjeya jiquiojo Éfeso meshijo anijetii so'o fiesta Pentecostés bajjani poeajo. 9Jiquiojo ani eya queahuiso chacochacoani esohuijo. Eyacuiñajjiya esecuejjani ca'ajji ca'apejocani jamaya eyaya baña jiquiocuiñajjicuana, esohui shajja-ajjaneisapoanicuana. Jamatii peaa queahuisocuaa eya esohui huohuimeejjima asa-acani.

10Timoteo miquianaja meshiyasijje poeajo oya queapame ja'ajjequicue quiaa. Oya queahuiso Emeshimeseneijo chacochacopoquiani e jayojja pea-aiya. 11Jamajjeya quiaa oe a'a oya peajja jayojja ajjequijji. Queapame oe oya ja'ajjequicue. Majoya quijje oya eque queabihuinee epoe'yojji asahuacue quiaa. Eyaya oya ishoaña pea Jesosaja epeejjicuananijjeya eba'yojji.

12Jjeya huohuije so'o Jesosaja epeejji Apolosjo. Eyaya oya pea eseja dohuecuana Jesosaja epeejjinijje miquianaque epoquijjinisho huohuiajjaneinaje. Jjeyanei pea-ai oya poquisapo-ajjatii poani cocuamaya. Ojaya epojja quijje o poquijji apoa poajo oya Apolos poquije.

Pabloja oe-ejjenei esohui ehuohuijji

13E'e, ecahui jaa eshequi'yo nequi jama queaja'a ba'epoquicue. Queaca'a oe ba'epoquicuetii Eyacuiñajjija esohuijo. A'a queamete pojji onajo. ¡A'a pea pea jjashahuabaquime popoquijji! 14Miquianajaya meshijo ba'ecacuana queajeanee apoquiacue onijje ba'eya onijje chacochacoaniya pea-ai.

15Ecue dohuecuana jjo'icuana, miquianaja eba Estéfanas, oja huapa pojjeamacuana pea-ai esohui Quitojo jjashahuabacooqui'yapoa provincia Acaya meshijo ba'e. Jjeya ohuaya Jesosaja epeejjicuana oja meshijo ba'e asahuacapoquiani. Majoneitiiya oya chacochacopoquiani hueya-amanei. 16Bacue, ojjaña joya Estéfanas jama queaja'anee ba'epoquianija esohui shajja-ajjaneicue. Ojjaña Jesosaja epeejji asahuapoquiajji poanicuanaja ma onijje chacochacopoquianija esohui shajja-ajjapea-aicue.

17Eya queabihuinee poanaje ecuea epeejjicuana Estéfanas, Fortunato, Acaico pea-ai poeyanaje jiquiacua. Jamatii miquiana jiquiojo chama' poanaje, poejjima. Coma dejjacuaaya eya asahuaneicanaje queahuiso. 18Ma tres dejja poeyanajeya ecuea epeejjicuaa eya queaquijijjijajinee pomeecanaje ma ecua miquiana acanaje jama pea-ai. Pea Jesosaja epeejjicuana ma ecua oya jayojja queaja'a ba'e queapame ja'ajjequicue.

19Jesosaja epeejjicuana joya oja equicuanajo jjachichaquipoquiani esohuijo provincia Asia meshijo ba'ecacuana jjashahuabaquiani miquianajo. Aquilaa, Priscaa, ma oja equijotii jjachichaquipoquianicuaa pea-ai esohui queapame huoojeapea-aicani miquianaque Emeshimeseneija bajjanijo. 20Ojjaña jiquiojo enijje ani Jesosaja epeejjicuana ecuana jjashahuabaquiani miquianajo. Queabihui pocue coma oja esohuijoya. Miquiananijje jjachichaquipoquijji Jesosaja epeejji shemo tojjocue oya queapame ja'ajjequimajje.

21Eyaya Pablohua ecuea bajjani tehueaña ecuea emeneiya miquianajo esohui queapame eajji.

22Ojjaña joya eseja Emeshimesenei Jesosa Quito queajea a-ajjacuana queaneetii capomeeca'yahua macuanaya Eyacuiñajjiya. Emeshimesenei, miya poeo'oyacue.

23Jesosa Quitohua eseja Emeshimeseneiya queapamenee ca-acapoquiahua quiana ojayanei ejjashahuabaquijjijo. 24Ojjaña quiana ecuea queajeanee poani joya Jesosa Quitoja'yo poani huisotii. Mahuisoya esohui ecue tehue.

Currently Selected:

1 CORINTIOS 16: ESE

Highlight

Compare

Copy