1 CORINTIOS 14
14
Eyacuiñajjiya queaca'a pomeecani cuana oja echacojji queapame eapoquiajji
1Miquianaya ebionei jjashahuabaneiquicue peacuana queajeanee eapoquiajji. Jamaya queapamenee eba'epoquijji. Majoya oe Eyacuiñajjinijje mimicue Edojjoshahuapameja miquiana queaca'a epomeejjijo oja echacojji queapame eapoquiajji. Edojjoshahuapamejo queaca'a jjapomeequisaneipocue oja esohui queaja'anee huohuipoquiajji. Maya echacojji queapamenee. 2Bacue, Edojjoshahuapameya oe dejja peajaajjija esohuijo jamatii oja bajjimaneijo queaca'a pomeecani emimijji. Jama mimime pomeecajje coma dejjaya queaja'a Eyacuiñajjinijje mimiani. Onijje dejjaja eshajja-ajjajjijo pojjeama oya mimiani oja mimi yajja poanijje bajjima poanijojoya. Edojjoshahuapameya oya jamaya mimimeecani jamatii onijje dejjaja bajjima poani yajja shai mimime poani. 3Ma ca pea dejjaa Edojjoshahuapameya queaca'a pomeecaniya esohui queaja'a huohuicani onijje jjachichaquipoquiani Jesosaja epeejjicuana queaca'a etiipoquijji. Ohua jama sohuihuohuime acajje queabihui poani cuana pea onijje Jesosaja epeejji asahuajji. Peacuana queayeno ba'e oja esohui shajja-ajjamajje yenoama'yo poani. 4Joya peajaajjija esohuijo jamatii oja bajjimaneijo mimiani dejja caca oe oyatii queaca'a tiipoquiani, oja mimi esohui peacuana asahua-ajja queaquehuajojo. Ma ca pea dejjaa Edojjoshahuapameya queaca'a pomeecaniya queaja'a oja esohui huohuicani onijje jjachichaquipoquianicuana Jesosaja epeejji queaca'a etiipoquijji.
5Edojjoshahuapameya ojjañatii miquiana peajaajjija esohuijo jamatii miquianaja bajjimaneijo mimimeecaje eya basapoani. Jamaya queapame. Edojjoshahuapameya miquiana queaca'a pomeecani oja esohui queaja'a ehuohuipoquiajji ca eya jama basaneineipoani. Jamaya queapamenee. Ma peaja esohuijo jamatii bajjimaneijo emimijji ca queapamepishana. Jamajjeya miquiana peaja esohuijo mimimeecajo cahuohuicahua peaa yajja poanijje mique mimi esohui majo anicaja queaja'a yajja poanijje eshajja-ajjajji. Majoya Jesosaja epeejjicuana queaca'a tiipoquije oja esohuijo. Peaa yajja poanijje mihuohuicajo mique mimi peaja esohuijo etiipoquijji pojjeama poaje. 6Ecue dohuecuana jjo'icuana, eya miquianaque poquiajo esohui huohuiya peajaajjija esohui miquianaja bajjimanei esohuijo, queaquehua quianaja poaje, yajja huohuime eyaya aña posoya aje. Miquiana queaja'a ba'emeesahuajji pojjeama poaje majoya. Miquianaja esohuineijo caca oe queapame eyaya esohui huohuiquije, Eyacuiñajjija quia esohuiya. Ma e ohua queaja'a bameecani esohui huisotiiya huohuiquije quiana. E'e pojja'a achajja queaja'a ba'ecapoquijji huohuiquije pea-ai.
7Dehue jamatii miajeacani bajjimajo mia hua-ama shajja-ajjacani cuaa queapame pojjeama. Oya jayojjaya eiñaqueyajji jamatii bajjimajo queapame pojjeama shajja-ajjacani cuaa, hua-ama. Ache esohuicuayajji iñaqueyacani poso acaje. 8Baasa' miataicajo yajja miame acani poso acaje soldadocuaa. Majoya soldadocuana ejja-aquijji pojjeama poaje peacuananijje ejjaquecuaquijji queaquehua miacanijojoya. 9Oya jayojjaya miquiana poani peajaajjija esohuijo mimiajo ma mi shajja-ajjajji poanija bajjima esohuijo, yajja mimime poani poso quiana acaje cuaa. Dejja se-ejjamaneijo oe nequi jamatii mimijeani queapame pojjeama. Oya jayojjaya peajaajjija esohuijo emimijji queapame pojjeama miquianaja mimi queaquehua shajja-ajjacanijojoya. 10Bacue, ojjañajaajjicuanaja oja mimi queahuisonee jaa. Jamatii oja esohuicuana yajja poani queaja'a shajja-ajjacajji ma onijjejaajjicuanajatii, mahuisojatiiya. 11Bacue, peajaajji dejja enijje mimiajo ecuea queaquehua poaje yajja shai oya poani eshajja-ajjajji. Ojaya pea-ai queaquehua poaje e onijje mimiajo. Ohuaya eya peajaajji poani bacaje ecuea esohui mishajja-ajjamajje. 12Miquianaya Edojjoshahuapamejo queaca'a jjapomeequisaneipoani Eyacuiñajjija echacojji eapoquiajji. Jamajjeya ma miquiananijje jjachichaquipoquianicuana Jesosaja epeejji queaca'a etiimeesahuajji echacojji maya asanei acajji.
13Jamajjeya joya peajaajjija esohuijo jamatii oja bajjimaneijo mimiani dejja comaya Eyacuiñajjinijje mimicajji peaja queaja'a ehuohui'yojjijo yajja poanijje oja mimi esohui. 14Eya Eyacuiñajjinijje peajaajjija esohuijo mimimeecajo ecuea edojjoshahuanei mimiani. Ecue sapadojjojje ca yajja mimime poani bajjima. 15¿Yajja ecuea acajji? Eya Eyacuiñajjinijje mimiajo ecuea edojjoshahuajonei pojjeama mimije. Ecuea sapadojjojo pea-ai mimije queaja'a ebajji yajja mimime poani onijje. Eya ecuea edojjoshahuaneijo pojjeama sohuicuayaje. Ecuea sapadojjojo pea-ai sohuicuayaje queaja'a ebajji yajja sohuicuayame eya poani. 16Bacue, miyaya peajaajjija esohuijo Eyacuiñajji bihuiaña jjabaquimajje miqueanei edojjoshahuajo Eyacuiñajji bihuiaje. Ma minijje ejjachichaqui anica Jesosaja epeejjicuanaja ca bajjima poani ajeo bihuiame miyaya aña. Jamajjeya ojaya Eyacuiñajji minijje ebihuiapea-aijji pojjeama poaje. 17E'e, miya peajaajjija esohuijo mimimeecajo jamaya queapame Eyacuiñajji bihuiajji. Jamatii minijje Jesosaja epeejjicuana jamajo ejjachichaqui ani queaca'a tiijjima poaje ma esohuijo ojaya queaquehua poanijojoya. 18Eyaya Eyacuiñajji bihuipoquiaña ohua e queajaajjihuisoja esohuijo jamatii ecue bajjimaneijo mimimeecanajeyajjejojo, jiquio ecua miquiana iyehuiso peajaajjija esohuijo mimimeecanaje jama pojjeama. 19E'ejojonei eya jamaya mimimeecanaje peajaajjija esohuijo. Jamatii Jesosaja epeejjicuananijje ejjachichaqui aniya che ojaya esohuineijo oepojji esohuicuana eyaya huohuisa-aña o queaja'a huohuijji. Eya peajaajjija esohuijo ca huohuisapo-ajja jamatii queahuiso esohuicuana huohuijeame. Queaja'a pojjeama shajja-ajjacaje cuaa ecue huohui.
20Ecue dohuecuana jjo'icuana, queaja'a quiana oe jjashahuabaquicue yajja acani cuaa jiquio peajaajjicuanaja esohuijo Edojjoshahuapameya mimimeecajo. Dejja etii queasapaja'a poani jama pea-ai oe jjashahuabaquicue quiana. Jiquio ecua esho'iquiana queaquehua jjashahuabacuajiquiani jama ca poca-ajja. Jamatii joya ecua esho'iquiana queamimishica'a epojjijo jjashahuabaquiajja poani jama pea-aiya ba'epoquicue. 21Eyacuiñajjija esohui yahuajonei etehue jaa jama poani ba'a: “Eyaya Emeshimeseneiya peajaajjicuana huoojeaje jiquio israelitacuana sohuihuohuiya. Ecue huoojeacuana jamatii jiquiojaajjicuanaja esohui oja bajjimaneijo queaja'a mimimeeje cuana ecue quia esohui. Jamatii ecuea huoojeaja esohui ejo shajja-ajjasapo-ajja poaje cuana” jamaya poa Emeshimesenei. 22Jamajjeya Eyacuiñajjiya jamaya mimimeecani oja epeejjicuana queaja'a jamatii oja bajjimaneijo peajaajjicuanaja esohuijo ma oma' jayojja poanicuanaja queaja'a ebajji oja mimi esohui e'ejojonei poani, ma dejjacuana oja huoojeanei poani ebajji pea-ai. Jesosaja epeejjicuanaja ca ebatii poani oya e'ejojonei poani, jamajjeya peajaajjija esohuijo mimimeecani shajja-ajjasapo-ajja. Edojjoshahuapameya pea oja epeejjicuana queaca'a pomeecani oja quia esohuicuana queaja'a ehuohuipoquiajji. Ma oja huohui shajja-ajjamajje Jesosaja epeejjicuana queaca'a tiipoquije oja esohuijo. Oma' jayojjacuaa ca jamatiiya shajja-ajjajeacaje. 23Miquiana peajaajjicuanaja esohuijo jamatii bajjimaneijo queaja'a mimimeecani Jesosaja epeejji ejjachichaqui anicajo, majoya pojja'a oe dejja ojaya jama mimiani shajja-ajjajjima nobiquije. E'e pojja'a pea Jesosaja epeejji pojjeamacuana pea-ai nobiquije miquiana anicahuasijje. Jamajje ¿yajja oya jjashahuabaquime poaje jama mimime poani shajja-ajjamajje? Oya jama poaje ba'a: “De, jiquiojo anicuana queasohuiquehuanee mimiani.” Eniñepoqui'yo jayojja mimiani poso acaje ohuaya. 24Miquiaaya ca Eyacuiñajjija quia esohuicuana queaja'anee huohuiaña ojjaña ejjachichaqui anicajo, majoya pojja'a oe dejja Jesosaja epeejji pojjeama nobiquije. Ohuaya queaja'anee shajja-ajjacaje mique huohui. Queaja'a huohuicani shajja-ajjamajje oya jjashahuabaquije jama ba'a: “E'ejojonei eya queamimishi poani bacani Eyacuiñajjiya.” 25Esohui queaja'anee huohuicajje ma dejjaya queamimishi poani jjabaquije, oja mimishi ehuanaquehua jaa bacaje cuaa pea-ai. Majoya oya pea jjashahuabaquime poaje'yo oja mimishijo. Oja ecuioshajjajo anioqueje Eyacuiñajjinijje emimijji. Eyacuiñajjija esohui queaja'a huohuicani shajja-ajjamajje coma dejjaaya Eyacuiñajji bihuiacaje oja ecuioshajjajo nequiya jama ba'a: “E'ejojonei Eyacuiñajji miquiananijje nequiani ejjachichaqui anicajo.”
Esohui ejjachichaquijji queapame acapoquijji, queashajjaquijjo poca-ajja
26Ecue dohuecuana jjo'icuana, esohuijo jjachichaquimajje Eyacuiñajji bihuiajji beca quiana sohuicuayaje. Peaa quiaa ca Eyacuiñajjija esohui huohuije. Peaa quiaa ca ma Eyacuiñajjiya bameecanaje esohuiya queaja'anee huohuipea-aije. Pea quiana ca peajaajjija esohuijo jamatii bajjimaneijo queaja'a mimimeecaje. Majoya peaa yajja poanijje oja mimi esohui queaja'a huohuicaje'yo. Jamaya quiana queapame jjachichaquipoquije ojee queaca'a etiipoquijji Eyacuiñajjija esohuijo. 27Jamajjeya peajaajjija esohuijo jamatii bajjimaneijo mimimeecajo a'a quiana queahuiso ojee mimipea-aisapojji. Beca, tres pojja'a mahuisonei mimicue. Oe mimi popoquicue, a'a ojee mimijji. Oya mimijeyoajo peaa cahuohuica'yahua yajja poanijje comajaya oja mimi. 28Oja mimimee esohui yajja poanijje peaja ehuohui'yojji yajja poanijje chamajo Jesosaja epeejji ejjachichaqui anicajo, a'a jamaya mimimeejji cuana peajaajjija oja bajjimanei esohuijo. Camimiquiahua oya oja esohuiquipajje Eyacuiñajjinijje peajaajjija esohuijo. 29Joya Eyacuiñajjiya queaca'a pomeecaniya oja quia esohui queaja'a ehuohuijji comaaya cahuohuicahua ejjachichaqui anicajo. Beca, tres pojja'a mahuisonei huohuimeecue. Majoya oja huohui esohui shajja-ajjaneicue oja huohui jayojja eba'epoquijji. 30Oe dejja majo ejjachichaqui ani miquiananijje Eyacuiñajjija Edojjoshahuapameya maya esohui quiacajo oja huohuijji manei eshequi nequijotiiya cahuohuicahua. Joya pea ebionei esohui huohuicaquiya cahuohuipajeacahua so'o ma peaja ehuohuijji. 31Edojjoshahuapameya queaca'a pomeecani cuana oja quia esohui queaja'a ehuohuijji. Oeya huohuijeyocajo peaa huohuicaje. Majoya oja esohui queaja'a bapoquiaje quiaa, yenoama ba'epoquije'yo pea-ai. 32Edojjoshahuapameya queaca'a pomeecani cuana oja quia esohui queaja'a ehuohuijji. Comacuanajaya eba acheshono ojaya huohuicajji, acheshono oya sohuima' anicajji pea-ai. 33Eyacuiñajji ese queashajjaquijjo ojee mimianijo jjachichameequisapo-ajja poani. Jiquio miquiana ejjachichaqui ani peajaajjija esohuijo ojee mimiani oja esohui ojee huohuipea-aiaña jama sapo-ajjanei oya. Ohuaya ca quiana ca queapame jjachichameequisa-acani ma ecua pea meshijo ba'eca Jesosaja epeejjicuana jjachichaquipoquiani queapame jama pea-aiya. 34Jesosaja epeejji eponacuana esohuijo jjachichaquimajje jeca anicajji, mimijjima. Ojaya eponacuanaja esohui huohuica-ajja ojjaña ejjachichaqui anicajo. Oya ojahueja esohuijo jjashajja-ajjaquicapoquijji ma ecua Eyacuiñajjija esohui yahuajonei tehue poani jamaya. 35Eyacuiñajjija esohui eponacuanaja queaquehua poanijo ojahue cahuohuiajjaca'yahua ohuaya yajja poanijje ma esohui oja equijo ani'yomajje. Ojjaña ejjachichaqui anicajo eponacuanaja queapame pojjeama ja'anei ehuohuiajjajji. 36E'e pojja'a beca quiana jiquio eya huohuiaña esohui shajja-ajjasapo-ajja poani. Bacue, Eyacuiñajjija esohui miquianaja yecoo pojjeama, miquianaja huohuicoo pojjeama pea-ai. Miquianajayanei shajja-ajja pojjeama Eyacuiñajjija esohui, peajaajjicuanaja pea-ai eshajja-ajja.
37Joya Edojjoshahuapameya queaca'a pomeecani oja esohui queaja'a huohuijji jjabaquianiya joya oja esohuijo jjashajja-ajjaquiani jjabaquianiya jiquio eya tehueaña esohui e'ejojonei Emeshimeseneija poani bacaje ejjashajja-ajjaquijji. 38Jiquio eya tehueaña esohui e'ejojonei Emeshimeseneija poani ohua jama mibacajo coma dejjajaya esohui a'a shajja-ajjajji. Coma dejja e'ejojonei Eyacuiñajjija esohuihuohuijji pojjeama poani.
39Jamajjeya ecue dohuecuana jjo'icuana, Edojjoshahuapamejo oe queaca'a jjapomeequisaneipocue peacuana queaja'a esohui huohuijji. Joya peajaajjija esohuijo jamatii oja bajjimaneijo mimimeecani dejja, ¡a'a ma peaja esohuijo oya mimimeejjima ajji! Camimiquiahuaya. 40Ojjaña esohuijo jjachichaquipoquiani quiaa esohui queapame apoquiacue, oe huohuiya apoquiacue quiaa, ojee esohui huohuipea-aica-ajja.
Currently Selected:
1 CORINTIOS 14: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
