1 CORINTIOS 13
13
Yajja poanijje peacuana queajeanee acapoquijji tehuecapoa
1Bacue, eya queahuiso peajaajjicuanaja esohuijo, angelcuanaja pea-ai queaja'anee emimijojjemo, jamatii ecuea peacuana queajeanee ajjima' eya queapame ba'e pojjeama bacame Eyacuiñajjiya. Ecuea peacuana queajeanee ajjima' poanijojjemo ecue mimi jiquio ecua baajee jamatii cuiaqueyajeacani queashajjaquijjo epojji jama pea-aiya eya shajja-ajjacame cuaa. 2Eyacuiñajjija esohui eya queaja'anee huohuipoquiañajojjemo, oja esohuicuana ma pea dejjacuanaja bajjimanei ecuea ebajeyojeyo poanijojjemo pea-ai, eya Eyacuiñajji queaca'aneetii poanijo jjashahuabaquipoquianijojjemo eyiyocuana pea jjocohuasijje enequimee'yojji pea-ai jamatii ecuea peacuana queajeanee ajjima', eya queapame pojjeama chacochacoani bacame Eyacuiñajjiya. 3Eya ojjañatii ecuea aquianacuana aema'cuana quia'yañajojjemo eya ecuea eyami jjaquiaquianijojjemo emano'yojji Eyacuiñajjija echacojji yajji jamatii ecuea peacuana queajeanee ajjima' ecuea e queabihui pojji jjeshejjima pome quijje Eyacuiñajjija quia ma sosejjeya.
4Bacue, eseya peacuana queajeanee apoquiamajje queapametii ba'epoquije onijje, oya asahuapoquiajetii pea-ai jamatii ese botiama. Oja aquianacuana ejeabajji pojjeama poaje. Oya peajja jayojja esejaya eajji pojjeama poaje. Eseya peacuana queajeanee apoquiamajje eseyanei queaca'a, queapame poani poso jjabaquiajja poaje. 5Eseya peacuana queajeanee apoquiamajje queatai mimiajja poaje onijje. Esejayanei ejjashahuabaquijjicuana peacuana ameetiisapo-ajja poaje. Eseya quenequenecuajiajja ba'epoquije onijje. Oja mimishi shahuabatiisapo'yoajja poaje. 6Eseya peacuana queajeanee apoquiamajje o queamimishi poajo queabihui pojjeama poaje. O e'ejojonei queapame poani bamajje ca se ca oe queabihui poaje onijje. 7Jamajjeya eseya peacuana queajeanee amajje queajeaneetii apoquiaje jamatii ese botiama poani. Queamano, queanee, queacamaja poaniya queajeatii apoquiaje. Eseya queaja'atii jjashahuabaquipoquije Eyacuiñajjijo jamatii eseya queacamajanee ba'e. Jamajjeya peacuana queajeanee apoquiamajje yenoama jjaishoaquipoquijetii Eyacuiñajjijo o queaja'a ba'emeesahuajjijo jamatii oya queacamajanee ba'epoquiani.
8Quijje epojja apoa poajo oja quia esohui yajja poaje quijje queaja'a huohuimeepajeacaje'yo cuana Eyacuiñajjiya. Peajaajjicuanaja esohui ma oja bajjimaneijo mimimeecani esohui, mimimeepajeacaje'yo cuana. Eyacuiñajjija esohui yajja poanijje ebajji bameepajeacaje'yo pea-ai. Jamaya Eyacuiñajjiya quijje queaca'a pomeepajeacaje'yo cuana oja echacojjijo. ¡Oe poaje'yo! Peacuana queajeanee eapoquiajji caca oe oe epo'yojji pojjeama. 9Jjeya seya ca Eyacuiñajjija esohui yajja poanijje bapoquiaña so'o, jamatii bajeyojjima aña. Jjeya ca esohui cua queaja'a poani eseyaya huohuipoquiaña cuana, ojjañatii pojjeama, iyehuiso. 10Quijje epojja apoa poajo Eyacuiñajjiya ojjañatii ojaya esohui quiajeyocaje. Majoya ohuaya queaca'a pomeepajeacaje'yo cuana ojo queapame echacochacopoquijji oja echacojji chama' poaje'yojojoya.
11Bacue, eya esho'yahua ani queaja'a pojjeama mimipoquiapoa, queaja'a pojjeama jjashahuabaquipoquiapoa pea-ai. Ebionei eya queasapaja'a pojjeama tiipoquiapoa. Jjeya ca jiquio eya etii nequi, ma ecua eya esho'i aniapoa jjabaquijjima jama pojjeama'yo eya nequipoquiani. 12Jjeya ca esohui ojjañatii esejaya queaja'a bajeyojjima. Jiquio ecua dejja ejjacojjabaquijji queajehuepishanajo jjabajeyoquiajja, jama pea-aiya se poani so'o esohuijo. Majoya quijje epojja apoa poajo eseyaya esohui ojjañatii queaja'anee bajeyoje'yo. E'ejojonei quijje seya Eyacuiñajji queaja'anee baje jiquio ecua se jjeya ohuaya queaja'anee bacapoquianitii jamaya.
13Jiquio yanitii tres oe po'yoajjanei. Eyacuiñajjija esohuijo ejjashahuabaqui'yojji, Eyacuiñajjijo queabihui ejjaishoaquipoquijji pea-ai. Pea ca peacuana queajeanee eapoquiajji. ¿Ache jiquio tres poani queapameneenee? Peacuana queajeanee eapoquiajji.
Currently Selected:
1 CORINTIOS 13: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
