1 CORINTIOS 12

Edojjoshahuapameya Eyacuiñajjija echacojji queapame eapoquiajji queaca'a pomeecani

1Ecue dohuecuana jjo'icuana, eyaya quiana huohuije achajja Edojjoshahuapameya Eyacuiñajjija echacojjicuana queapame eapoquiajji eseya queaca'a pomeecani.

2Miquiaaya Jesosaja epeejji pojjimahua ba'eya eyacuiñajjinishocuana queahuiso bihuiapoquiapoa. Jjadasiameequiapoa quiana ojo o queaca'a poanijo poso. Jamatii oya eshe pojjeama mimiajja, ca'a-ama poani bihuiapoquiapoa quiaa. 3Jamajjeya quiaa oe jiquio shajja-ajjacue. Joya Edojjoshahuapameya mimimeesahuacani dejja jama po-ajja ba'a: “Jesosa peajja, siajjepojji,” jama mimime po-ajja. Jiquio shajja-ajjapea-aicue. Joya Dojjoshahuapame yamima' ba'ecacuana jama po-ajja ba'a: “Jesosa oya Emeshimesenei poani eojjañacuanamese.” Chojja, oya jama mimime po-ajja.

4Jesosaja epeejjicuana Edojjoshahuapameya Eyacuiñajjija echacojjicuana queapame eapoquiajji queaca'a pomeecani ojjaña quiana. Queahuiso ojaya echacojjicuana yani. Oya echacojji pea-ai yajji pojjeama ohuayaneiya eseya queaca'a pomeecani ojo queapame echacochacopoquijji. 5Jesosaja epeejjicuaa oya echacojji pea-ai pojjeama acapoquiani. Jamatii oe Emeshimeseneiya huohuicapoquianitii ojjaña oja epeejjicuana ache ojaya echacojji poaje. 6Eyacuiñajjiya ojjaña eseya queaca'a pomeecani oja echacojjicuana queapame eapoquiajji ojo, jamatii eseyayanei pojjeama. 7Eyacuiñajjiya ojjaña eseya Jesosaja epeejjicuana oja Edojjoshahuapame quiacani. Edojjoshahuapameya ojjaña eseya queaca'a pomeecani oja echacojjicuana queapame eapoquiajji. Jamaya ohuaya eseya queaca'a pomeecani pea esenijje jjachichaquipoquiani Jesosaja epeejjicuana queaca'a etiipoquijji oja esohuijo. 8Edojjoshahuapameya eseya oya echacojji eapoquiajji pojjeama queaca'a pomeecani. Achajja queaja'a eba'epoquijjitii becacuana ohuaya queaca'a pomeecani oja esohui ehuohuijji. Peacuana ca yajja poanijje oja esohui Edojjoshahuapameya bameesahuacani onijje Jesosaja epeejjicuana ehuohuijji. 9Oja Edojjoshahuapameya peacuana queaca'a pomeecani oya ejjashahuabaquipoquijjitii oja esohuijo, meteama echacochacopoquijji pea-ai jamatii queacamaja acani cuaa. Ohuaya ca peacuana queaca'a pomeecani emano jaacuana jja-ajameequi'yojji. 10Peacuana ca ohuaya queaca'a pomeecani dejjaja ajjima'neinei ojaya eapoquiajji. Peacuana ca Edojjoshahuapameya queaca'a pomeecani Eyacuiñajjija esohui queaja'anee peacuana huohuiquijji epojji. Peacuana ca a'a peaa Eyacuiñajjija esohuinei queaja'a huohuicani, a'a pojja'a eshahuaja huohuicani queaca'a pomeecani ebaneijji. Edojjoshahuapameya peacuana ca queaca'a pomeecani peajaajjija esohuijo emimijji jamatii oja bajjimanei esohuijo. Peacuana ca oja huohui peajaajjija esohuijo yajja poanijje queaja'a eshajja-ajjajji queaca'a pomeecani ehuohui'yojji queaja'a. 11Jamaya ohuaya oenei Edojjoshahuapameya ojjaña Jesosaja epeejjicuana queaca'a pomeecani Eyacuiñajjijo queapame echacochacopoquijji. Ohuaya Jesosaja epeejjicuana huohuicani ache echacojji ojaya acajji ojayanei ejjashahuabaquijjijo. Majoya Edojjoshahuapameya oya queaca'a pomeecani ma echacojji eapoquiajji.

Jesosaja epeejjicuana oe eyami jayojja poani

12Dejjaja eyami oenei poani jamatii oja yamijo queahuiso nequiani: ejeojji, esapa, ecojja, eshajja, eme pea-ai. Oya jayojjaya eseya Jesosaja epeejji poani. Jamatii eseya queahuisonee poani eseya oe yami jayojja poani. Eseya ca oe Quitoja eyami jayojja poani. 13Ojjaña eseya Jesosajo jjashahuabaqui'yajo judiocuana, judío pojjeamacuana pea-ai, joya ejjeshe peajo chacochacopoquiani, joya peajo chacochacoajja poani pea-ai Edojjoshahuapameya ojjañatii eseya Quitoja eyami jayojja pomeecanaje. Jamajjeya ojjaña eseya Eyacuiñajjija quia Edojjoshahuapame yamijji poani.

14Dejjaja eyami ecojjanei pojjeama poani. Ojaya ca eyamijo queahuiso nequi. 15Bacue, ejeojji jama mimime pomeejje ba'a: “Eya ca eme pojjeama, jamajjeya oja yami pojjeama poani.” Oya jama mimime pomajje oja yamitii pea-ai poani, jamatii oya eme pojjeama. 16Oya jayojjaya eshajja jama mimime pomeejje ba'a: “Eya ca ecojja pojjeama jamajjeya oja yami pojjeama poani.” Oya jama mimime pomajje oja yamitii pea-ai poani jamatii oya ecojja pojjeama. 17Eyami ecojjanei poanijojjemo eseya jjashajja-ajjaquiajja pome. Eyami eshajjanei poanijojjemo eseya jjashiyeajjaquiajja pome. 18Eseja eyami ca jama pojjeama poani. Eyacuiñajjiya esejaya eyami cojjajji, jeojjijji, mejji, shajjajji pea-ai acapoa oya jama sapomajje. 19Eseja eyami ecojjanei poanijojjemo oya eyami ojjañatii pojjeama pome. 20E'ejojonei eseja eyamijo ojjaña enequi, ecojja, eshajja, ehui pea-ai. Jamatii queahuiso nequi oya oe eyami poani.

21Eseja ecojja jjaniñebaquiajja emejo jama ba'a: “Eya mi sapo-ajja, miya peajja.” Chojja, jama pojjeama. Oya jayojjaya eseja esapa jjaniñebaquiajja ejeojjijo jama ba'a: “Eya mi sapo-ajja, miya peajja.” Chojja, jama pojjeama. 22Eseja eyamijo jama poca-ajja. Ojjaña queapame nequi eseja eyamijo. Joya bisoneicuana eseja eyamijo nequi pea-ai queapamenee, peajja pojjeama. 23Jamajjeya jiquio queabisonee ca'a-ama eseja eyamijo nequi eseyaya nahueneipoquiaña. Pea seya eseja yamijo nequi bameejjima aña. 24Pea seya ca eseja eyamijo nequi queapame bameeaña cuana. Jamaya Eyacuiñajjiya ojjañatii eseja eyamijo nequimeecapoa ese queapame ba'epoquijji. Jamajjeya joya queabisonee nequi ca'a-ama poani ohuaya eseya maya queanahue bameecani. 25Jamaya Eyacuiñajjiya eseja eyami acapoa joya bisonei ca'a-ama nequi pea queaca'a poanija easahuajji, enahuejji pea-ai peajo ejjaniñebaquijji pojjeama. Jamajjeya ojjaña eyamijo nequi acapoa oyaneitii ejjanahuequijji pojjeama, oya ca peaja enahuejji acapoa. 26Oe eseja eyamijo nequi queanee poajo ojjaña queanee pojeyoani. Oe eseja eyamijo nequi queapamenee poani bacani cuaa, ojjaña eseja eyamijo nequi queabihui popea-aicajji ojo.

27E'e, bacue, miquianaya Quitoja eyami jayojja poani. Miquianaya oe oja eyamijo nequi bacani Eyacuiñajjiya. 28Jamaya Eyacuiñajjiya oja epeejjicuana nequimeecani Quitoja eyamijo ojo queapame echacochacopoquijji. Oya echacojji yajjijo pojjeama nequimeecanaje. Ebionei ona sohuihuohuiquinequijji epojji ohuaya nequimeecanaje cuana. Peacuana ca ohuaya oja esohui queaja'a huohuipoquiajji epojji pomeecanaje. Peacuana ca esohui bameesahuajji epojji nequimeecanaje. Peacuana ca ohuaya queaca'a pomeecanaje dejjaja ajjima'neineicuana oja eapoquiajji. Peacuana ca emano jaacuana jja-ajameequi'yojji epojji pomeecanaje. Peacuana ca onijje ba'e Jesosaja epeejji asahuapoquiajji epojji pomeecanaje. Peacuana ca echacojji huohuijji epojji pomeecanaje. Peacuana ca peajaajjija esohuijo ojaya bajjimanei esohuijo jamatii mimimeecanaje. 29Ojjañatii ona sohuihuohuiquinequijji epojji pojjeama pomeecanaje cuana Eyacuiñajjiya. Ojjañatii esohuihuohuipoquiajji epojji pojjeama pomeecanaje cuana. Ojjañatii esohui bameesahuajji epojji pojjeama pomeecanaje cuana. Ojjañatii queaca'a epojji dejjaja ajjima'neinei eajji pojjeama ohuaya pomeecanaje cuana. 30Oya jayojjaya ojjañatii emano jaacuana jja-ajameequi'yojji epojji pojjeama pomeecanaje cuana Eyacuiñajjiya. Ojjañatii peajaajjija esohuijo oja bajjimanei esohuijo jamatii emimimeejji pojjeama acanaje cuana. Ojjañatiicuanaja oja mimimee esohui yajja poanijje queaja'a ehuohui'yojji pojjeama acanaje cuana pea-ai. 31Jamajjeya ma pea Jesosaja epeejjicuana queaca'a etiimeesahuajji echacojjiya asaneiacue. Jjeya eyaya quiana huohuije jiquio esohui queapameneenee eba'epoquijji pea esohuicuana jama pojjeama.

Currently Selected:

1 CORINTIOS 12: ESE

Highlight

Compare

Copy