1 CORINTIOS 11

1Ma ecua Quito jiquio meshijo ba'epoquiapoa jama pea-aiya eya ba'epoquisapoani. Jamajjeya jiquio ecua eya queaja'a ba'epoquiani jama pea-aiya quiana oe ba'epoquipea-aisapocue.

Achajja eponacuana esohuijo anicajji tehuecapoa

2Eya queabihui poani miquiana ejo queahuiso jjashahuabaquiani shajja-ajjamajje. Ecue quia esohui ma yahuajo eya huohuinaje esohuicuanaya achajja Jesosaja epeejji ba'ecapoquijji shahuabapoquiaña quiaa. 3Jjeya eyaya jiquio esohui huohuineisa-aña miquianaja queaja'a ebajji. Quito ojjaña dejjacuana huoojeapoquiajji poani eojjañacuanamese. Oya jayojjaya yahuecuana oja huanasecuana huoojeapoquiajji poani jiquio ecua Eyacuiñajji Quito huoojeapoquiajji poani jamaya. 4Jamajjeya quiana oe dejjacuana jjasapapaaquica-ajja ona ejjachichaqui anijo Eyacuiñajjinijje emimijji, peacuana sohuihuohuijji epojji pea-ai. Jama ejjasapapaaqui pomajjeya quiaa Quito peajja jayojja aña, oja esohuijo jjashajja-ajjaquica-ajja bameeaña cuana. 5Eponacuana ca jjasapapaaquicajji ona ejjachichaqui anijo Eyacuiñajjinijje emimijji, peacuana queaja'a sohuihuohuijji pea-ai. Eponacuana jama mipomajje ojahue peajja jayojja acani, ojo jjashajja-ajjaquica-ajja acani pea-ai ma eponaa. Oya jiquio ecua epona esapa cuiapojijea queabicho aniani jama bacaje.#11.5 Nota: Yahuajonei Pablo nequiapoajo eponacuana sapa cuiapojijeacapoa cuaa o queabichonee poaje peaja ebajji.* 6Jamajjeya onijje Jesosaja epeejjicuana jjachichaquimajje esohuijo cajjasapapaaquiahua eponacuana. Joya epona oja ehuojjaña paasapo-ajja poani cajjasapacuiapojijeameequiahua. Majoya oya jama jjapomeequimajje queabichonee poaje. 7Dejjacuaa ca oja sapa paaca-ajja Eyacuiñajjiya oya queaca'a epojji o jayojja pea-ai epojji panacapoajojoya. Eponacuaa ca ojahue o huoojeapoquiajji poani bameecani. 8Bacue, ebionei dejja eponaja yamijo pana pojjeama poa. Ma ebionei epona ca dejjaja eyami pana poa. 9Yahuajoneinei Eyacuiñajjiya dejja epona asahuapoquiajji epojji pojjeama panacapoa. Ohuaya caca oe epona panacapoa dejja asahuapoquiajji epojji. 10Jamajjeya eponacuana jjasapapaaquicajji esohuijo ejjachichaqui ani majo anicaja ebajji, angelcuanaja ebapea-aijji ojahue o huoojeapoquiajji poani, oya ojahueja esohuijo jjashajja-ajjaquipoquiani pea-ai. 11Esejaya ebanei yahuecuana jamatii oenei ba'eajja. Oya ca oja huanasenijje ba'epoquiani, onijje jjapeequipoquiani. Oya jayojja pea-ai ehuanasecuana oenei ba'eajja. Oya ca ojahuenijje ba'epoquiani onijje jjapeequipoquiani. 12Bacue, e'ejojonei ebionei epona dejjaja eyami pana poa. Jamajjeya e'ejojonei dejjacuana eponaja eyamijo cuayapoquiani. Eyacuiñajjiya eseya jamaya pomeecani, eseyatii pojjeama cuayapoquiani.

13Miquiaaya oe baneicue ehuohuijji, ¿a'a queapame, a'a queapame pojjeama pojja'a esohuijo jjachichaquimajje eponacuana jamatii mimije Eyacuiñajjinijje jjasapapaaquijjima? Chojja de, jama queapame pojjeama. 14Dejjacuana ojjaña meshijo nequicaja ejjashahuabaquijji jama poani ba'a: Dejjacuana oja ehuojjaña queasao-ao oquemeemajje oya queabicho jjabaquije. 15Eponacuana ca queabihui poani oja sao quea-ao oqueani bamajje. Eyacuiñajjiya oja sao quea-ao oquemeecani o sapa paajji. 16E'e pojja'a beca quiana jiquio esohui ehuojjañajo shajja-ajjasapo-ajja. Eyaya comaya huohuije jamaya ecuana jjachichaquipoquiani esohuijo, eponacuana ejjasapapaaqui aniani. Pea Jesosaja epeejjicuana pea-ai oya jayojja jjachichaquimajje esohuijo eponacuana ejjasapapaaqui aniani.

Jesosaja bobi o shahuabapoquia'yojji ataicapoa cuaa

17Jiquio jjeya eya miquiana tehueaña esohui queayenohua huohuije miquiana queapame pojjeama ba'epoquianijojo. Miquianaya queaca'a tiicapoquijji poanaje jjachichaquipoquimajje esohuijo jamatii miquianaja ejjachichaquijji queapame pojjeama poani. 18Eya huohuicanaje cuaa miquianaya jjachichaquimajje oya jayojja pea-ai jjashahuabaquime pojjeama poani Eyacuiñajjija esohuijo. Beca quiana oe jjashahuabaquime poani oja esohuijo, peacuana ca pea jjashahuabaquime poani jama pea-ai pojjeama. Jamaya quiana jjachichaquipoquiani esohuijo eyaya shajja-ajjanaje. E'e pojja'a jamaya jjachichaquipoquiani. 19Bacue, Jesosaja epeejjicuana ojjañatii oya jayojja pea-ai jjashahuabaquimetii ba'epoquiajja. Becacuana Jesosaja epeejji oja esohui jayojja ba'epoquianitii. Pea oja epeejji ca jama ba'eajja. Jamajjeya ache queapame poani bacajji quianaja. 20Miquianaya oya jjashahuabaquime pea-ai ba'eajja ejjachichaqui ani Jesosaja bobi o shahuabapoquia'yojji ojee eijjiajji. Jamatii ejjachichajeaqui ani quiana queapame pojjeama poani. 21Miquiaaya ejjachichaqui aniya miquianaja ye bobicuana ebionei ijjiacuajiaña Jesosaja bobi ijjiajjimahuajo jamatii peacuana majotii ani oja bobi chamajo, yejjimajo, queashoe poani. Beca quiana ca huooani majotii ani. 22Jama ca poca-ajjanei. Miquianajaya bobi oenei aniya ijjiasa-amajje miquianaja equijotii ijjiacajji, uvajjajjana' majotiiya ishicajji. Joya miquiananijje Jesosaja epeejji ejjachichaqui ani aema'cuana queabicho pomeeaña quiaa miquianajaya bobi ijjiacuajimajje oja bobi chamajo. Jesosaja epeejjicuana botiama jayojja aña quiaa. ¿Apiojji acuae quiana jama poani? ¿A'a majoya eyaya quiana queapame poani huohuije? ¡Chojja de!

Achajja Jesosaja bobi o shahuabapoquia'yojji ijjiacajji huohuicapoa

(Mt 26.26-29; Mc 14.22-25; Lc 22.14-20)

23Emeshimeseneiya eya Pablo jiquio esohui yahuajo quiacapoa jiquio eya quiana huohuinaje oya esohuiya. Jama eya huohuicapoa ba'a: Oya mecajjetii ma Emeshimesenei Jesosa iñameesahuacapoa mecajjetiiya ohuaya pahui jjeshecapoa oja emeya. 24Majoya Eyacuiñajji bihuiamajje pahui mijicapoa. Jesosa jama poa pahui mijimajje ba'a: “Jiquio ecue emejo nequi pahui ecue yami jayojja poani. Ecue yami eyaya quiaje miquiana nahue'yojji. Ijjiacue quiaa jiquio e mano'yajo shahuabapoquia'yojji.” Majoya pahui quiacapoa cuana jama huohuime amajje. 25Majoya aje quijjepishana bobi ijjiamajje ojeeya Jesosaa oe caneco uvajjajjana' oja emeya iñanequiacapoa. Oya jama poa ba'a: “Jiquio canecojo nequi ecuea ena' jayojja. Cuayaquije'yo miquianajo. Ecuea enaa Eyacuiñajjija esohui eyacua queahuisocuana ojaya'yo epojji queaca'atii pomeecaje, epajea'yojji pojjeama. Jiquio miquiaa ishipoquiamajje e mano'yojji shahuabapoquia'yocue.” Majoya canecojo nequi ena ishimeecapoa cuana jama huohuime amajje. 26Jamaya apoquiacuetii quiaa Emeshimesenei poe'yojjimahuajo. Emeshimesenei Jesosa mano'yapoa ojjañacuana nahue'yojji esohui huohuipoquiajetii quiaa oja yami jayojja o shahuaba'yojji ijjiamajje, oja ena' jayojja o shahuaba'yojji ishimajje pea-ai.

27Bacue, joya jamatii oja esohui jayojja pojjeama ba'epoquianicuana jiquio pahui o shahuaba'yojji ijjiajeamajje, ena canecojo nequi ishijeamajje pea-ai comacuanaya queamimishi poani Jesosaja eyamijo, oja enajo pea-ai. Comacuaaya Jesosa peajja jayojja bacani, nahueama. 28Jamajjeya ojjaña joya oja yami jayojja o shahuaba'yojji ijjiajji poajecuana, oja ena' jayojja o shahuaba'yojji ishijji poajecuana pea-ai ebionei jjabaneiquicajji achajja oya ba'e pahui ijjiajjimahuajo, canecojo nequi ena ishijjimahuajo pea-ai. 29Joya jamatii ojayanei eba'ejjijo jjabaquiajja cuaa Jesosaja eyami jayojja pahui ijjiajeamajje, oja ena' jayojja ishijeamajje pea-ai comaaya Emeshimesenei Jesosaja eyami peajja jayojja acani. Eyacuiñajjiya comacuanaya queaneenee pomeecaje. 30Jamajjeya queahuiso quiana manoani, ca'a-ama poani pea-ai Jesosaja bobi o shahuaba'yojji jamatii ijjiajeañajo, ena ishijeañajo. Becacuana ca mano'yonaje majoya. 31Jamajjeya ebionei eseya jjabaneiquicajji achajja eseya ba'e eseja mimishijo onijje emimi'yojji. Majoya Emeshimeseneija eseya queanee epomeejji pojjeama poaje eseja mimishijo. 32Esejaya eba'ejjijo jjabaneiquiajja poajo Emeshimeseneiya eseya queanee pomeecaje ejjabahuejjaquijji queamimishica'a eba'epoqui poanijje. Jamaya ohuaya eseya acani joya ecua peacuana queaneenee pocanequije'yo jama pea-ai eponequi'yo poanijje.

33Jamajjeya ecue dohuecuana jjo'icuana, miquiana jjachichaquimajje Jesosaja bobi ojee eijjiajjijo, ¡a'a miquianaja ye bobi ijjiacuajijji! Peacuana ishoasocue ojee eijjiaijjiajji. 34Joya queashoenee poani ca ojaya equijotii ijjiaijjiacajji so'o. Ijjiaijjiajeyomajje esohui baa oya poquicajji. Majoya oya jama poajo Eyacuiñajjija oya queanee epomeejji pojjeama poaje. Ee, pea esohuicuana huohuiquije miquiana baa poquimajje.

Currently Selected:

1 CORINTIOS 11: ESE

Highlight

Compare

Copy