Lev 8
8
Okwezibwa kwa Arooni n'abatabani
1MUKAMA akagambira Musa ati: 2“Otwale Arooni n'abatabani otwale ebyokujwara, amagita agokweza abantu n'ebintu, enimi enyakuheebwayo okuganyiza ebibi, entaama empaya ibiri n'ekigega ky'emigaati etatumbisiibwe. 3Kandi ekitebe kyona eky'abantu, okisorooleze ha mulyango ogw'Eheema ey'okutangatanganiramu.”
4Musa yakora nkooku MUKAMA yamuragiire, ekitebe ky'abantu kyasorrokanira ha rwigi orw'Eheema ey'okutangatanganiramu.
5Musa yagambira ekitebe ky'abantu ati: “Kinu nikyo kintu MUKAMA eki aragiire kukorwa.” 6Musa yaleeta Arooni n'abatabani, yaboogya n'amaizi. 7Arooni yamujweka ekooti, yamuteega omweko, yamujweka ekanzu, yamugerekaho ekitaahiro, yamuteega omutanda gwa kitaani ogunyakukozirwe kurungi muno yagugumya. 8Yamutaho ekya ha kifuba ekinyakurumu amabaale abiri Ulimu na Tumimu. 9Yamuta ekihuuta ha mutwe, yamutaho ekondo eya zaabbu, niyo ekondo ey'obuhikiriire, MUKAMA nkooku yaragiire Musa.
10Kandi Musa yakwata amagita aganyakweza abantu n'ebintu eby'okwezibwa yagaseesa ha Nju ya Ruhanga na ha bintu byona ebikaba birumu yabyeeza. 11Agandi yagamiisa ha itambiro emirundi musanju, yalyeza na byona ebikoraho, ebbeseni n'ekintu h'eyemerezibwa, nabyo yabyeeza. 12Amagita agandi yagaseesa ha mutwe gwa Arooni yamweza amusoroole. 13Musa yaleeta batabani ba Arooni, yabajweka ekooti, yabateega emyeko, ha mutwe yababoheraho enkofiira nkooku MUKAMA yamuragiire.
14Nubwo yaleesire enimi ey'ekihongwa eky'okuganyiza ekibi; Arooni n'abatabani baata emikono yabo ha mutwe gwayo. 15Musa yagiita, yatwara esagama, yagisiiga n'orukumo rwe okwehinguliriza amahembe g'itambiro, yalyeza, endi yagiseesa ha kicweka ekya hansi eky'itambiro, yalisoroora yalisabira, 16yakwata ebisajwa byona ebikaba biri ha byenda by'enimi, n'obune obw'empagara, ensigo zombi n'ebisajwa byazo, yabyokeza ha itambiro. 17Baitu orususu rw'enimi, enyama yayo n'efa yayo, akabyokya n'omurro aheeru y'orukande, nkooku MUKAMA yaragiire. 18Nubwo yaleeta entaama empaya ey'ekihongwa eky'okwokya, Arooni n'abatabani baata emikono yabo ha mutwe gwayo. 19Musa yagiita, esagama yagimiisira itambiro kulyehinguliriza. 20Entaama obu yamazire kwihwa emyanya, Musa yayokya omutwe, emyanya n'ebisajwa 21kandi ebyenda n'ebirenge obu byamazire kwogebwa n'amaizi, entaama yoona empaya, Musa yagyokeza ha itambiro, ebe kihongwa ekyokiibwe omurro ekirukuboyera kurungi MUKAMA, nkoku yaragiire Musa.
22Kandi Musa yaleeta entaama empaya endi, niyo entaama ey'okutaahya abakozi omu mulimo ogw'okuheereza; Arooni n'abatabani baata emikono yabo ha mutwe gwayo, 23Musa yagiita, yaihaho esagama, yagita ha nsonga ey'okutu okw'obulyo okwa Arooni, ha kyara ekisaija eky'omukono ogw'obulyo na ha kyara ekisaija eky'ekigere eky'obulyo. 24Baaleeta batabani ba Arooni, Musa yata esagama ha nsonga z'amatu gaabo ag'obulyo, ha byara ebisaija eby'emikono yabo ey'obulyo, na ha byara ebisaija eby'ebigere byaabu eby'obulyo, esagama endi, Musa yagimiisira itambiro okulyehinguliriza. 25Hanyuma yakwata ebisajwa, ekitere n'ebisajwa ebikaba biri ha byenda, obune obw'empagara, ensigo zombi n'ebisajwa byazo, n'ekirumbu eky'obulyo; 26omu kigega ekikaba kirumu emigaati etatumbisiibwe, ekikaba kimuli omumaiso, yaihamu keeki emu etatumbisiibwe n'akaasi k'omugaati akanyakusiigirwe, amagita na bisikwiti emu, yabita ha bisajwa na ha kirumbu eky'obulyo, 27binu byona yabikwasa Arooni n'abatabani, baabiimukyaimukya, bibe kihongwa ekiimukaimukiibwe omumaiso ga MUKAMA. 28Hanyuma, Musa yabiiha omu mikono yabo, yabyokeza ha itambiro hamu n'ekihongwa ekyokeze, kibe kihongwa ekyokeziibwe habwa MUKAMA, ekirukuboya kurungi, eky'okusoroora abantu ab'okukora omulimo ogw'obuheereza. 29Musa yakwata ekifuba ky'entaama empaya, yakiimukyaimukya, kibe kihongwa ekiimukaimukiibwe omumaiso ga MUKAMA, ogu gukaba mugabo gwa Musa ogwarugire ha ntaama ey'okusoroora abaheereza MUKAMA nkooku yamuragiire.
30Nubwo Musa yakwasire amagita aganyakweza abantu n'ebintu eby'okwezibwa, n'ekicweka eky'esagama eyekaba eri ha itambiro, yagimiisira Arooni n'ebyokujwara bye kandi yagimiisira batabani be n'ebyokujwara byabo, yataahya Arooni n'ebyokujwara bye, batabani ba Arooni n'ebyokujwara byabo omu mulimo ogw'okuheereza.
31Kandi Musa yagambira Arooni n'abatabani ati: “Enyama mugicumbire ha mulyango ogw'Eheema ey'okutangatanganiramu, nuho mugiriire hamu n'emigaati enyakuli omu kigega eky'ekihongwa eky'okusoroora abaheereza, nkooku naragiire ningamba nti: ‘Arooni n'abatabani nubo baligirya.’ 32Enyama n'amagita ebinyakusigaireho, mubyokye bisiiriire. 33Kandi mutalituruka omu Heema ey'okutangatanganiramu okumara akasumi ak'ebiro musanju eby'okusoroorwa kwanyu obu kalikahwaho, habwokuba kubasoroora kulitwara akasumi k'ebiro musanju. 34Ekyakorwa hati, MUKAMA nuwe aragiire kikorwe kubeesengerereza. 35Nimwija kwikara ha mulimo ogw'Eheema ey'okutangatanganiramu omu bwire obwa nyamusana n'obw'ekiro kumara ebiro musanju, nimukora MUKAMA ebi aragiire, mutaikara kufa.” 36Arooni n'abatabani bakakora ebintu byona MUKAMA ebi yakaragiire Musa.
Currently Selected:
Lev 8: BRR2008
Highlight
Copy
Compare
Share
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
