Aos. 9
9
Kilip Solomon ainakino aosou
1“Okoe Akuj atapapaa kaŋ ka Ekapolon ŋolo esyonon,
iyoŋ ibu kitiyau ŋiboro daadaŋ a akirot kon,
2ibu iyoŋ anaosou kon kitiyau ituŋanan
apolokin ŋisubuna ŋulu ibu iyoŋ tosub
3ka kipuka akwap anasegis ka anakiyookino
ka totub ŋakiro anakiyookino a ŋina ke etau.
4Inakinae ayoŋ aosou ŋina iboi alodiyete apukan kon,
nyikiŋer ayoŋ alokidiŋ ŋiketiyaŋ kon;
5anerae arae ayoŋ eketiyan kon, lokoku a aketiyan a ŋina itiyae neni kon,
arae ayoŋ ekile ŋolo apalag ka ŋolo euruwuana apaki ŋina eboiyo,
akayakar ayoŋ ayenut ŋina edit anakitub ŋakiro ka alokisila;
6anerae tari ŋini ejok alotuŋa,
ituruworyo ikoŋinait kemamukar aosou ŋina ebunit aneni kon.
7Idau iyoŋ aseun ayoŋ aruwor erwosit a ŋituŋa kon
ka aruwor ekatubon ŋolo apolokinit ŋidwe kon ŋulusapa ka ŋulupesur.
8Idau iyoŋ alimun atemar todukoe Akai ka Akuj kidiama emukura kon ŋolo asegan
ka todukoe namuroet lotaun ŋolo iboiyo iyoŋ.
Erae akai ŋin akisikwaanet a Akai a ŋina ibu iyoŋ kitemok ŋinapei anakisyakinet a ŋinibore.
9Iyakar iyoŋ aosou ka eyeni aosou ŋin ŋuna itiyae iyoŋ
ka ayai apaki ŋina isubunia iyoŋ akwap,
eyeni aosou ŋuna ejokak alokiŋaren kon
ka ŋuna iyookino alopite a ŋolo eyakatar ŋakiciketa kon.
10Kiyaku aosou ne anakuj aneni asegan
ka anapukan kon a ŋina ka apolou,
ikotere itiyae alodiyete kaŋ
ka ikotere ayoŋ oyenu ŋuna ikitalakarito iyoŋ.
11Erae ŋun anerae eyeni aosou ŋiboro daadaŋ,
ido eketeni iŋes ayoŋ arae ŋolo aos anakiro aŋuna etiyae
ka ekeyoki iŋes ayoŋ alotooma apolou keŋ.
12Eruwor nai ŋiticisyo kaŋ ŋulu ecamunitae
ka atubi ayoŋ ŋakiro a ŋituŋa kon anakiyookino
aruwor ayoŋ ajok elunyokin lokicoloŋ a papa kaŋ epuka.
13Ŋae epedori ayenun acamit ŋina ka Akuj?
Kori ŋae epedori ayenun ŋuna iitanit Ekapolon?
14Anerae erae ŋuna etamete ŋituŋa ŋakoŋinae,
ido emam ŋuna ikitiyakini iwon aŋuna ka aosou yok make;
15anerae itapalagagit ekuwane lo akiyar ŋina ke etau
ka isicanit ekuwane ŋolo itiyaunitae a ŋalup lo ŋatameta ŋuna etamete nooi ŋakiro.
16Ikipedori iwon atamakin atemar ŋuna eya nakwap ŋun
ka ibore ŋini ikiyakar iwon, ikisitiyae iwon ŋin,
nai ŋae ekatak ayenun ŋuna eyakasi nakuj?
17Ŋae Akuj ayenu acamit kon,
erae pa kiinakinit iyoŋ iŋes aosou kon
ka pa kiyakikinit iyoŋ iŋes etau kon alokidiama?
18Alopite a ŋol, ainakin ŋituŋa anakwap akiwuap ŋuna iyookino,
aponi kitatamae ŋituŋa ŋuna ikitalakarito iyoŋ
ka abu aosou toiu.”
Currently Selected:
Aos. 9: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.