Aos. 8
8
1Edolit aosou erae ŋina etiron lowaetin ka akwap a daadaŋ
ka itiyae ibore daadaŋ ejok.
Amina a Solomon aosou
2Abu ayoŋ ominak aosou ka ewar iŋes ŋinapei anasoroko kaŋ;
abu ekeburak ayoŋ aryamun iŋes ikwapei arukitos kaŋ,
abu akibuses keŋ ekesupa ayoŋ.
3Itopoloorit aosou apolou ŋina ka akisyakinet keŋ anakiboi keŋ ka Akuj,
emina Ekapolon ŋolo a daadaŋ aosou;
4anerae erae aosou arukitos anayenut a ŋina ka Akuj
ka erae arukitos ka Akuj aloticisyo keŋ.
5Ani kerae ebari ibore ŋini ecamit ituŋanan anakiyar keŋ aryamun,
nyo erae ebari ŋolo apolon akilo aosou ŋina erae iŋes isitiyao akitiyaunia ŋinibore?
6Ani kerae ayenut ibore ŋini itiyae ka agogoŋu,
nyo ibore ice ŋini iloit aosou ŋina eyeuni ibore ŋini eyai tokona?
7Ani kemina ituŋanan idio akiyookino,
erae ŋiticisyo keŋ ŋulu iyookino,
anerae itatami ituŋanan ŋin akiyokiuno bon ka ayenut
akitub ŋakiro iyookino ka atitinyikinit;
emam ibore ice anakiyar a ŋituŋa ŋini eyakar akiŋarakinet.
8Ani kecamit ituŋanan idio aryamun ayenut akitiya ŋuna alalak,
eyeni aosou ŋunakoloŋ ka epedori ayenun ŋuna eponito;
eyeni aosou ŋuna irworosi ŋituŋa ka isileereununui ŋuna irworosi ŋituŋa etedete;
eyakar aosou ayenut ŋina a ŋakujuwuanisya ka ŋaumonokineta,
eyakar ayenut ŋuna etakanunete anatutubeta a ekaru ka anapakio.
Aosou ŋina nyekorakinitae ŋikepukak
9Aŋun abu ayoŋ oŋirik nooi akiya aosou eboiyoto ka ayoŋ,
anerae ayeni ayoŋ atemar ekesirworiuni iŋes ayoŋ ejok
ka ekesimukekini anapakio a ŋuna a ŋican ka akiyaloloŋ.
10Aŋuna ka aosou, aryamuni ayoŋ apolou aneni a ŋulu alalak nooi,
aryamuni ayoŋ akitopolooro aneni a ŋikasikou tari karae ayoŋ esorokit.
11Akaryamunio ayoŋ arae ŋolo atubi ŋakiro ejok,
ajoikini ayoŋ ŋikepukak apaki ŋina ekeŋolikiniata ayoŋ.
12Ani keliliŋ ayoŋ, idarunete ikes olimu ayoŋ ŋakiro,
ido ani erworikini ayoŋ, epupokinete ikes ejok ŋakiro kaŋ;
ani kerwor ayoŋ ekaoyan,
erapete ikes ŋakitukwa kec a ŋakan epupokinito ejok nooi.
13Aŋuna ka aosou, aryamuni ayoŋ akiyar ŋina nyedaun
ka eboi ayoŋ ŋikaru ka ŋikaru atamunit ŋulu epote ekaku kaŋ.
14Epukae ayoŋ ŋituŋa
ka epukae ayoŋ ŋakwapin;
15Ebuli ŋapukasinei a ŋirwosi ka ekuryaketa aŋuna kaŋ iirarete ŋakiro kaŋ,
etoodikin ayoŋ lotuŋa arae ŋolo apedorit ka ŋolo atitiny alojie.
16Ani apaki ŋina alomarya ayoŋ kai kaŋ, eeŋuni ayoŋ ayakar aosou,
anerae emam aŋoit anayakau ka aosou,
emam aryebo anakiyar a ŋina eyakar aosou, nai eyai alakara ka alelyanu.
17Ani atamatamae ayoŋ ŋakiro nu daadaŋ ekililiŋat
ka otamatama alotau
atemar ayakau ka aosou, iyakaunor akiyar ŋina nyedaun
18ka akoneo ka aosou, iyakaunor alakara ŋina ejok,
ani kitiya anaosou, iyakaunor ebari ŋolo nyedaun
ka ani kitiya iyakar aosou, ayenut ka iyenikinit akiwuapit ŋuna ka aosou, ikitopolooryo,
abu ayoŋ ewar epite ŋolo aryamunia aosou aŋuna kaŋ.
19Abu ayoŋ eriŋa arae ikoku oryamu ainakinet ŋina ka aosou
ka abu ayoŋ oryamu akiyar ŋina ajokan erae akorakinet kaŋ;
20nabo daŋ anaraakau ŋolo ajok, abu ayoŋ oyakaunor akuwan ŋina amam neni amunaara.
21Nai abu ayoŋ oyenu atemar nyapedori ayoŋ aryamun aosou mati erae Akuj akainakini ayoŋ,
abu nen toruwor akitoodikinet ŋina ayenun atemar neni a ŋae ebunitor ainakinet ŋina ka aosou.
Aŋun, abu ayoŋ emaima Ekapolon ka odyek iŋes
ka abu ayoŋ a etau kaŋ a daadaŋ otema,
Currently Selected:
Aos. 8: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.