Aos. 10
10
Ŋuna itiyae aosou ŋinapei aneni ka Adam tari neni a Moses
1Abu aosou kiyok papa ŋolo a akwap ŋolo etiyaunio ekiŋaren apaki ŋina araakar iŋes bon etiyaunitae,
abu aosou tolaku iŋes anasecisya keŋ;
2abu aosou inak iŋes agogoŋu ŋinakipukaet ŋiboro daadaŋ.
3Nai apaki ŋina aŋeryo ituŋanan ŋini pa eyookino ŋuna ka aosou anaŋoit keŋ,
abu ituŋanan ŋin totwan, anerae anaŋoit keŋ, abu toar lokaato keŋ
4Ani apaki ŋina elelebunor akalele nakwap aŋuna keŋ, abu nabo aosou toiu akwap,
abu aosou tome ituŋanan ŋini eyookino anatuba aŋina apatana amunaar.
5Apaki ŋina aponiata ŋakwapin tocamun anaronis kec, ido kiguryakinos,
abu aosou toyenu ituŋanan ŋini eyookino, ido kiyok iŋes erae ŋini pa etoroniyaritae alokiŋaren Akuj
ka abu kiyok iŋes erae ŋini egogoŋ alokiŋaren ŋirukitos keŋ aŋuna a ikoku keŋ.
6Abu aosou toiu ituŋanan ŋini eyookino apaki ŋina atwakyata ŋulu aŋerito Akuj;
abu ituŋanan ŋini eyookino tobucar anakim a ŋina abuni alokidiama a ŋina anyamuwari ŋitaunio ŋulukan.
7Eriŋa ŋakiro ŋuna ka aronis kec erae esuuda,
eriŋa akwap ŋina eya ikes erae ŋinakoŋinait ka epurui,
nyekoneneete ŋaraito a ŋikito a ŋulu eya nen,
etukosi ŋalup ŋuna erae acumbi a nen erae akitoodiunet neni a ŋulu nyenupito ŋun.
8Erae ŋun anerae apotu ikes kimyekis ŋuna ka aosou,
pa apotu ŋituŋa a ŋitaunio a ŋul toyenut ŋuna ajokak, kori ŋuna aronok,
nai apotu daŋ kimyekis aŋuna a ŋituŋa esuuda ŋolo ka abaŋao kec,
ikotere nyimuryakis ŋituŋa ŋuna apotu ikes nyitiyata.
9Abu aosou tolaku alocan ŋulu apotu kitiyata iwuapito ŋuna ka aosou.
10Ani apaki ŋina asiya ituŋanan ŋini aoson ananyunyura alokaato keŋ;
abu aosou kiten iŋes kitor ŋolo eyookino;
abu aosou kitoodik iŋes apukan ŋina ka Akuj,
ido inak iŋes aosou ŋina a ŋiboro a ŋulu asegak,
abu aosou inak iŋes ebari aloticisyo keŋ
ka abu kiyatak iŋes akitiya ejok alotic keŋ.
11Ani erakaanikinete iŋes ŋulu emanito,
abu iŋes tomukyaan anaosou ka abu aosou kitabar iŋes.
12Abu aosou kiyoku iŋes alomoe keŋ
ka abu kiturubak iŋes eiuna aneni a ŋulu adapito iŋes;
abu aosou inak iŋes akiloun alojie a ŋolo atyono nooi;
ikotere iŋes eyenuni atemar eyai apedor ŋina apolon nooi naraakau ŋini ka Akuj akilo ibore ice daadaŋ.
13Ani apaki ŋina agyelarere ituŋanan ŋini eyookino, abu aosou nyelot aneni keŋ,
nai abu tolaku iŋes anasecit.
Abu aosou torukosi ka ituŋanan ŋin lojera,
14ido apaki ŋina ayakar ituŋanan ŋin lojera, abu aosou nyimyek iŋes
akitodol apaki ŋina ayaunia iŋes naruwor ekepukan ŋolo epolokinit ŋulu sek arae ŋikapolok keŋ.
Abu iŋes kitoodik ŋulu sek apotu kisitakis iŋes ikoŋin atemar adyakarito ikes
ka abu aosou inak ituŋanan ŋin aruwor ŋini etopolooritae ŋikaru ka ŋikaru.
Abu aosou toriko Ŋisirael alo Ijipit
15Abu aosou tolaku ŋituŋa ŋulu eyookino, ebuku ŋolo amam ŋuna etoroniyaritere,
abu tolaku ikes anakwap a ŋulu atiŋito ikes erono
16Abu aosou min lotau a eketiyan a Ekapolon,
abu eketiyan ŋol towoik ŋirwosi inak akuryanu neni kec alotooma ŋaumonokineta ka ŋakitoodyanakineta.
17Abu aosou inak ŋituŋa ŋulu eyookino eropit ŋolo a ŋiticisyo kec;
abu aosou kiten ikes alorot a ŋolo ajokan nooi,
abu aosou kimuk ikes naparan
ka abu toruwor ariwo ŋina acai akuwar kya.
18Abu aosou yau ikes tari nanam ŋina Areŋan,
kitena ikes kitoryo nakipi ŋuna aya neni acukul nooi;
19nai abu aosou kitodoiyo ŋimoe kec kwap ŋakipi
ka abu kilepu ikes kidiama ŋakipi etwakito.
20Aŋun, apotu ŋulu eyookino toŋatasi ŋiboro a ŋulu pa ewuapito ŋuna ka Akuj;
apotu toeoto ŋieosyo alokiro kon a ŋolo asegan, okoe Ekapolon,
apotu kipuro kaapei apedor kon ŋina eŋarakinan;
21anerae abu aosou kisirworik ŋulu sek pa erworosi
ka abu inak ŋiŋwea kirworo ŋakiro ŋuna apupyo.
Currently Selected:
Aos. 10: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.