Aos. 5
5
1Epote nai ŋulu iyookino akiwo
erae ŋulu eyakatar ayenut atemar emam ŋuna ikitoroniyaritere,
ewoete ikes aneni eyakasi ŋulu apotu kisicana ikes
ka aneni eyakasi ŋulu apotu tojamuwasi ŋuna etiyaete ikes.
2Ani iŋolikinete ŋulu nyiyookino ŋulu iyookino,
emaranikinete ikes ebulit nooi,
eumokinete ikes aŋuna ka aiuno a ŋulu iyookino a ŋina sek pa atamakinito ikes.
3Irworikinosi ikes make erae ŋulu irworosi ŋakiro ŋuna ka akiki kec,
ido aŋuna eryebeta ikes ŋakiro ŋitai ka aŋuna eumenioto, etemarete,
4“Erae lu ŋituŋa ŋulu paaran aponi iwon tojamuwarae,
kituruworoe ŋikiyenya yok, okoe keraakae iwon ŋibaŋaanotin!
Atamakinitae iwon atemar arae akiyar kec ŋina ka abaŋao
ka emam apolou eryamunete ikes ekaku ka akiyar ana.
5Kaanukiro emarakinere ikes lokimar
ŋolo a ŋidwe a ŋulu ka Akuj?
Kaanukiro ainakinere ikes akibois aneni a ŋiseuna a ŋulu ka Akuj?
6Aŋun, iwon keponi tooliyoroe anakiro aŋuna a kire,
kebu akiyookino ŋina a ŋulu iyookino nyemin neni yok,
kebu abaŋao torubak eyai neni yok.
7Aponi iwon kimwonikinetei anakiwuapit ŋakiro ŋuna nyecamito ŋikisila ka kiwuapae ŋuna ka amunyaro,
aponi iwon kiwuapae ŋakiro ŋuna emam neni ikirikorete,
aponi iwon nyeyenun erot ŋolo ke Ekapolon.
8Aliropit aryamun iwon anakituro a ŋina a ebari yok?
Anijokis abu neni yok anakituro a ŋina a ebari yok?
9“Aŋopiyasi ŋiboro ŋul daadaŋ lopite ŋolo eŋopiyaryata etolim
ka lopite ŋolo eŋopiyarya ŋakiro ŋuna isudunitoe,
10aŋopiyasi lopite ŋolo eŋopiyarya ameeli ŋina enaŋanaŋaari ŋikaguragurae a ŋakipi,
nyetakunu neni sek etori,
nyeyenu ituŋanan atemar keyai sek ameeli nen.
11Aŋopiyasi lopite ŋolo itoryo ikenyit kidiama.
ido mam ituŋanan etemari, kitorit sek ikenyit ne;
iwuakiwuakaari ikenyit ekuwuam alokidiama,
ido tonaŋ ka agogoŋu a ŋina ipumari iŋes epori,
iŋarakinete iŋes ŋabebenuk keŋ ŋuna epetara kiwuakiwuakas,
ido ekaku, emam ŋini iŋolikini atemar kitoruni iŋes ama.
12Aŋopiyasi lopite ŋolo nyepedorya ituŋanan akiŋolikin erot a ekaleŋeleŋet ipimi ibore,
egolokin atipei ekuwuam neni sek etorit ekaleŋeleŋet,
ido emam ituŋanan eyenuni erot ŋolo sek etori.
13Aŋun iwon daŋ, apaki ŋinapei ikidounere, aponi toŋopiyarae,
mam akiyookino aponi kitoodiunae,
abu aronis yok ikitoŋopiya iwon.”
14Erae ŋun anerae ikwaan akigeno a ŋulu eŋerito Akuj ka apuwa ŋina eyai lokuwuam,
ikwaan ka ikuno ŋini eyai lokuwuam ŋolo apolon nooi;
eŋopiyarete ŋulu eŋerito Akuj lopite ŋolo eŋopiyarya apuru alokuwuam,
ikwaan ikes ka epeyonon ŋolo iriyae akoloŋit apei bon torotok.
Eropit a ŋulu iyookino
15Iboiyete ŋulu iyookino ŋikaru ka ŋikaru,
eyai eropit kec neni a Ekapolon;
iyoki ikes Ekapolon ŋolo alokidiama nooi.
16Aŋun, eryamunete ikes ebokot ŋolo ka apolou,
eryamunete ikes ebokot aneni ke Ekapolon,
anerae iyokiuni Ekapolon ikes a apedor keŋ,
eiuni Ekapolon ikes a apedor keŋ.
17Ituruwori Ekapolon alelakinit keŋ ikes aupal keŋ ŋina eiuni ikes
ka einakini ŋisubuna daadaŋ apedor ŋinakisicanet ŋimoe keŋ;
18ituruwori Ekapolon akiyookino iupal ŋini ipakarit ŋuna aronok aneni keŋ;
ituruwori Ekapolon akitiya ŋuna a kire iupal ŋini ipakarit ŋuna aronok aneni keŋ;
19ituruwori iŋes asegis iupal ŋini eiunit iŋes nyereut ŋulu nyiyookino,
20eŋoi iŋes enyunyura nooi tolemu ekileŋ,
imorikinosi iŋes ka ŋisubuna kitijioto ŋibaŋaanotin ŋulu itepegete iŋes.
21Imilyaunete ŋasinina alokidiama iyooro neni egumaritae,
eporonori Ekapolon alodou ke epei tari ŋoloce neni egumaritae ejok,
22edounete ŋakako ŋuna aryenyaanak esibit ŋuna egumaritae ka agogoŋu;
eleleunete neni a ŋimoe keŋ ŋakipi ŋuna ka anam kinyasut ikes
eburusiyarete ŋakipi ŋuna aŋaŋolin ikes;
23ekutuni ekuwuam ŋolo aryenyaan kiwok ikes,
epyataryo ikes kiwok ekuwuam ikwa ŋamilo.
Eruwor akwap akoŋinait aŋuna a ŋituŋa a ŋulu eŋerito akiwuap ŋuna a Ekapolon,
emunaari akitiya ŋuna aronok ekipukae a ŋituŋa.
Currently Selected:
Aos. 5: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.