Aos. 4
4
1Ejok amamukau ikoku, nai toyakar akiyookino;
anerae ani keyakar ituŋanan atametait ŋina ka akiyookino, eyakar atametait ŋina ka akiyar a ŋikaru ka ŋikaru,
erae ŋun ŋuna eyeni Akuj ka ŋuna eyenete ŋituŋa.
2Iwuapito ŋituŋa ŋakiro a ituŋanan a ŋini ajokan apaki ŋina erukitotor ka ikes,
ido iburit ikes akiwuapit ŋun tari apaki ŋina elosyo ituŋanan ŋin aneni kec;
erubakinete ŋun ŋikaru ka ŋikaru erae ŋuna itojokitae ka ŋuna elounak,
erubakinete erae akilounet anakiloiloa a ŋina eya ŋainakineta ŋuna nyemunaara.
3Nai emam ajokis eyakaun lodwe ŋulu alalak nooi ŋul ŋulu a ŋituŋa a ŋulu nyenupito neni ka Akuj,
emam ipei daŋ alodwe kec ŋini itiyakini ŋuna ajokak aŋuna keŋ, kori ebari alotic a ŋolo itiyae.
4Tari kebar ikes aloticisyo kec apaki ŋina euruwuana
erae ikes ŋulu ebulit, ido elemarete ŋatyokisyo ikes
ka anaryenyeo a ŋina a ŋican, edaunosi ikes
5Edaunosi ŋidwe kec eriŋa nyepolouno,
ido eruwor ŋiboro ŋulu apotu ikes toryamut aloticisyo kec ŋikoŋinae
eruwor ŋulu nyirikanakinitae ŋulu emam ituŋanan irumi, ŋulu emam ajokis eyakatar.
6Erae ŋidwe ŋulu euruunito ŋituŋa ŋulu nyecamakinitae akiryamakin,
ŋisuudae ŋulu ka aronis a ŋikauruunak kec apaki ŋina iŋisya Akuj ŋidwe ŋul.
7Nai tari ketwakete ŋulu iyookino eriŋa nyemojoŋa, eyakaun nakieŋar ŋican.
8Nyitopolooritae ituŋanan emojoŋi aŋuna eboiyo apaki ŋina aoyan,
kori aŋuna eboiyo ŋikaru ŋulu alalak;
9nai erae aosou ka akiyookino ikes epedorya ituŋanan akidol namojoŋu,
erae akiboi anakiyar a ŋina nyitoronitae iŋes emojoŋia ituŋanan nooi.
10Ayakasi ŋituŋa ŋidi ŋulu apotu kiboiyoto elakara neni ka Akuj,
ido amina Akuj ikes,
ido ani eriŋa ikes iboiyete aneni a ŋikasecak,
abu Akuj ya ikes nakuj eyarete.
11Aponi ikes yaarae nakuj ikotere agogoŋu ŋina ka aronis
nyilocok ayenut kec ŋina ka akiyookino,
kori amodiyo nyemodiya akiyar kec.
12Epedorete ŋicocoi a ŋulu aronok akitoŋopiyar ŋakiro ŋuna ajokak,
epedori akirimit alokibure a ŋolo aronon akilocokin ŋatameta a ituŋanan a ŋini ajokan.
13Aŋuna aponiata ŋulu iyookino toruwor ŋulu ajokak tari apaki ŋina auruwuana, apotu kisiyookis ŋuna etiyaete ŋikaru ŋulu alalak;
14anerae alakara Ekapolon aŋuna ka akiyar kec,
aŋun, abu Ekapolon ya ikes atipei aneni a ŋulu aronok.
15Apotu ŋituŋa kiŋolikis ŋun, nai apotu nyeyenut,
kori nyemisiyasi ŋakiro ŋun alotai kec,
atemar eyai ajokis ŋina ka Akuj ka akisyon keŋ neni a ŋulu eseunit iŋes
ka iyoki Akuj ŋituŋa keŋ ŋulu asegak.
Erae ŋulu iyookino ŋikelounak
16Epote ŋituŋa ŋulu iyookino ŋulu atwaka akitoroniyar ŋulu nyenupito neni ka Akuj ŋulu eyarete,
epote ŋisorok ŋulu apotu atipei nakiyookino akitoroniyar ŋikasikou ka ŋakimak ŋulu amojoŋikis namamukau ka akiyookino.
17Iŋolyanakinete ŋulu nyiyookino ŋituŋa ŋulu iyookino etwakete,
nai nyeyenete ŋuna itemokinit Ekapolon aŋuna a ŋituŋa a ŋul
ka ŋuna abunio Ekapolon kiyokiyo ikes eiuna.
18Iŋolyanakinete ŋulu nyiyookino ŋulu iyookino etwakete, ido tojamuwasi,
nai ebuni Ekapolon akyenar ikes ite erae ŋikoŋinae.
Eruwor ikes ekaku ŋawat koŋin ŋuna nyitopolooritae
eruwor ikes ŋulu ekyenare ŋikaru ka ŋikaru anakibois a ŋikatwak;
19anerae eridakini Ekapolon ikes kwap ililiŋete cek,
elemari ikes aneni sek iboiyoto;
eesikinio ikes isudedete emam ajokis
eryamunete ikes aryeba,
emam ituŋanan erubakini etamunit ikes.
Atubokino ŋina esidyon
20Epote ikes ebulit apaki ŋina imarunere ŋasecisya kec,
isitakinete ŋiticisyo kec ikes ŋulu pa ewuapitotor ikes ŋikisila, itiyakin ŋun iteete ikes.
Currently Selected:
Aos. 4: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.