Aos. 6
6
Emaikina ŋirwosi kiwara aryamun aosou
1Aŋun, okoe ŋirwosi, topupokisi, ido toyenut ŋakiro;
okoe ŋikatubok ŋakiro ŋulu a ŋakwapin a daadaŋ, toyenutu ŋakiro.
2Kiirasi iyes ŋulu ipukato ŋituŋa ŋulu alalak;
ido kituros aŋuna ipukatotor ŋakwapin ŋuna alalak
3anerae Ekapolon ikiinakini iyes apolokin ŋuluce
ka erae neni a Ekapolon a ŋolo etiron ebunitor apedor ŋina ipukatotor iyes;
eripiripi Ekapolon ŋuna itiyaete iyes ka iŋitiŋitiuni ŋuna iyeete iyes akitiya.
4Irae iyes ŋiketiyak ŋulu ka apukan keŋ, nai nyitiya iyes ŋuna iyookino,
kori nyiwuapa iyes ŋikisila,
kori nyiwuapa iyes ŋuna ecamit Akuj,
5ebuni Akuj neni kus eryenyaana ka itiyae ka atipei,
anerae etubokinio erono nooi ŋulu epolokinito ŋuluce.
6Epedori Akuj anakisyon keŋ akisyon ŋulu itiditeuna make, nai ŋikapolok, itilimoryo ejok ŋuna kepotu kitiyata.
7Nyeriito Ekapolon ŋolo a ŋituŋa a daadaŋ ka ituŋanan idio,
kori nyeriito ka ŋikapolok a ŋituŋa,
anerae iŋes elope abu tosub ŋulu ipukatae ka ŋikepukak
ka etami aŋuna a daadaŋ emam atyakatyakat.
8Nai iŋadatae ŋakiro ŋuna iŋisyo ŋulu epolokinito ŋuluce.
9Neni kus nai okoe ŋikapolok a ŋakwapin, ileerete ŋakiro kaŋ aneni kus,
ikotere iyes iyenunete ŋakiro ŋuna ka aosou, ido nyitiyata aronis.
10Ituruworyo ŋituŋa ŋulu asegak ŋulu esegak aŋuna aponiata kitiyaata ŋakiro daadaŋ anasegis,
ido ikes ŋulu aponi kitatamae ŋakiro ŋun, eryamunete ŋakiro ŋuna eiunete.
11Aŋun, kiwuakisi akiitanit kus nakiro kaŋ;
kiitana ŋakiro kaŋ, ido ikitatamikinio iyes.
Epite ŋolo elimoritere ŋakiro ŋuna ka aosou.
12Ileerete ŋakiro ŋuna ka aosou nooi, emam nyeŋopiyanarete jik,
etenito ŋituŋa ŋulu eminasi aosou ayenun ŋakiro ŋuna ka aosou,
eryamunete aosou ŋituŋa ŋulu iwarito aosou.
13Epatana aosou akiteyenikin
neni a ŋulu iburit ayenun iŋes.
14Ituŋanan daadaŋ ŋini isyokakinit akiwarit aryamun aosou,
eryamuni emam atyonis,
anerae eryamuni ituŋanan ŋin aosou idarit iŋes alopuke.
15Erae ayenut ŋina ajokan nooi akiwuakin ituŋanan ŋatameta keŋ naosou,
ido ituŋanan ŋini erubakini eyai naosou eruwor alotooma apaki ŋina euruwuana ŋini emamukar ŋatyokisyo,
16anerae iwarit aosou ayakaun neni a ŋulu emaikina iŋes toyai,
ido anajokis a ŋina apolon nooi, eryamununete ŋituŋa ŋul aosou anakiro a daadaŋ a ŋuna ecamito ikes akitiya,
ebuneene aosou neni kec ŋapakio daadaŋ ŋuna etamyata ikes.
17Akisyakinet ŋina ka aosou, iŋes akiitanit ŋina a kire aryamun iŋes anakitatamo
ka akimukekinit akitatamo iŋes amina aryamun aosou,
18ido amina aosou iŋes akiwuapit ŋikisila keŋ,
akiwuapit ejok ŋikisila ŋulu ka aosou, iŋes erae ayenut atemar nyimunaara
19ka ayenut atemar nyimunaara, iŋes itaapiyari ituŋanan neni ka Akuj.
20Aŋun, akiitanit aosou iŋes ikirikori aruwor ekapolon.
21Aŋun, okoe ŋikapolok a ŋakwapin, ani kejok aneni kus akipuka ka apolokin ŋuluce, kitopoloosi aosou, ikotere iyes iruwor ŋikapolok ŋikaru ka ŋikaru.
22Akalimokini ayoŋ iyes ibore ŋini erae aosou ka epite ŋolo ayakaunor,
emam ŋakiro ŋuna imunono ŋuna ekemunoni ayoŋ iyes,
nai alimori ayoŋ akisyakinet ŋina ka aosou ŋinapei anasubunet akwap,
eketeyenikini ayoŋ iyes ileere ayenut ŋina ka aosou
nyemunoni ayoŋ aneni kus ŋuna a kire;
23nyayakaun ayoŋ natukot a ŋulu eyakatar akiitanit ŋina ka arakao,
anerae nyerukito arakao ka aosou.
24Nalalau a ŋituŋa a ŋulu aosok, iŋes eryamuniata ŋituŋa ŋulu ka akwap aiuno,
ido napukan a erwosit a ŋolo aosou iŋes epedoryata ŋituŋa akiboi emam ŋace.
25Aŋun, kimyekisi ŋakiro kaŋ ikitatam iyes, ido eruworosi aŋuna a ekiboiye kus ŋolo ajokan.
Currently Selected:
Aos. 6: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.