Aos. 11
11
Abu aosou torik Ŋisirael analoŋisat
1Abu aosou kitabar Ŋisirael aloticisyo kec anapedor a ekadwaran a ŋolo asegan.
2Apotu ikes kitoro naloŋisat ŋina amam ŋituŋa alomito
kigurokis ŋiemae kec nakiboisyo ŋuna amam ibore epudat.
3Apotu Ŋisirael towoikis ŋimoe kec ka apotu kitijioto tobwaŋa ŋimoe kec.
4Apaki ŋina anyamya akure Ŋisirael, apotu ikinyarata iyoŋ,
apotu ŋakipi tolomut anataaba a ŋinasulut;
abu aboŋokinet ŋina ka akure kec bu anamoru a ŋina agogoŋon.
5Aloboro a ŋulu pei aponere kisicanere ŋimoe kec,
apotu Ŋisirael ŋikulepek toryamut akiŋarakinet anakiitanit kec.
6Akilo eitanit ŋolo ka aŋolol a ŋina elele jik,
abu eitanit ŋol toruwor ŋolo egurur ka ŋolo amunaaritae a ŋaokot,
7apotu ŋun kitiyakin analimunet a ŋina ka akiar ŋiŋwea.
Ibu iyoŋ Ekapolon inak ikes ŋakipi ŋuna alalak anapaki a ŋina ayeniata ikes atemar ikimasi,
8ibu iyoŋ anakitanyam ikes akure apaki ŋin
kitoodiu epite ŋolo ibunio kisican ŋimoe kec.
9Ani apaki ŋina aupya ikes, tari daŋ ŋina araakar ŋol epite ŋolo isicania iyoŋ ikes anakisyon,
apotu ikes toyenut epite ŋolo isicanere anatubokin a ŋina ka anyunyura ŋulu nyiwuapito ŋuna ka Akuj.
10Ibu iyoŋ kikatak ikes lopite ŋolo elimokinia ekauruunan ikoku toceite akitiya ŋuna aronok;
nai ibu iyoŋ toripiripi ŋakiro a ŋulu nyiwuapito ŋuna ka Akuj lopite ŋolo etubonokinia erwosit ŋolo nyejamaana.
11Aponi ikes kisicanae kaapei, keya nen, kori kemam a nen,
12anerae amaikina ikes kisicanae ŋakisicaneta ŋaarei,
apotu ikes toumeno etamunete ŋuna apotu kitiyakin.
13Ani iirarete ikes atemar alotooma ŋakisicaneta kec a ŋikulepek,
aryamut ŋulu iyookino ŋuna ajokak, apotu ikes toyenut ŋun erae ŋuna erae Ekapolon etiya.
14Tari daŋ ŋina aponiata ikes toŋero ŋun ejamuwarito Ekapolon ŋolo apotu ikes sek ekiŋaren toŋero anakiyar kec ka kisileereut ŋuna aŋeritotor,
nai ani itiyakin ŋuna aronok neni kec, apotu ikes toumokis ekerito Ekapolon,
ani apaki ŋina anyamya ikes akure, pa ekwaan ka epite ŋolo anyamitor ŋulu iyookino,
Akisicanio a ŋulu aronok
15Anaboŋokinet ŋuna ka abaŋao ka aronis ŋina a ŋatameta kec,
a ŋuna apotu kitooliyosi ikes akilip neni a ŋimuno a ŋulu akonyak ka neni a ŋityaŋ a ŋulu koŋinae,
ibu iyoŋ kiyakik ikes ŋisubuna ŋulu alalak ŋulu akonyak ikotere kisicana ikes,
16ikotere ikes eyenunete atemar ibore ŋinipei esecit ituŋanan iŋes pei isicanere iŋes.
17Arae napedor kon ŋina eyai agogoŋu daadaŋ iŋes isubunia iyoŋ akwap anibore a ŋini pa atakani epite ŋolokisitiyaet,
iŋes pa abunio ikiŋopik iyoŋ aryamun ŋityaŋ ŋulu adedeŋak ka ŋiŋatunyo ŋulu nyekuryaka ŋulu alalak kiyakiya neni kec,
18kori aryamun ŋityaŋ ŋulu kitet ŋulu sek nyeyenio ŋulu adedeŋak ŋulu ileleba aŋoit,
kori ŋulu ipurutaunit ekieŋanu ŋolo ka adedeŋu;
kori ŋulu ieŋununeete apuru ŋina alalan
kori ŋulu imilyaasi ŋakonyen nooi.
19Pa abu aronis ŋina etiyato ikes tomunya ca ŋituŋa bon,
nai tari akiŋolikin ikes, ayauni akuryanu ŋina apolon.
20Tari pa kerae ŋun bon, apedorete ŋituŋa aramakin kwap ieŋakini iŋes apei bon apaki ŋina icamitor iyoŋ ikes kiwuapa ŋuna iyookino
ka apaki ŋina ielarya iyoŋ ikes ieŋakini iyoŋ anapedor kon.
Nai itemok iyoŋ ŋiboro daadaŋ iyeni aoyau, etyae ka apotis.
Erae Akuj ŋina ka apedor ka ŋina esyonon
21Itoodiununui iyoŋ a ŋinapaki apedor kon akitoodiunia agogoŋu kon ŋina apolon
ka ŋae epedori awoikin agogoŋu ŋina ka apedor kon,
22anerae ikwaan akwap daadaŋ alokiŋaren kon ka imoru ŋini ka asinyon ŋini epedori akiniar ŋakipimeta,
ikwaan akilimasit apei ŋina a ŋakopi ŋina edoe kwap.
23Nai isyoniyene iyoŋ daadaŋ, anerae ipedori iyoŋ akitiya ŋiboro daadaŋ
ka nyimitakinit ŋasecisya a ŋituŋa, ikotere nai ikes ekiyete;
24anerae imina iyoŋ ibore daadaŋ ŋini eyai nakwap,
nyiŋerit iyoŋ ibore idio ŋini ibu iyoŋ kitiyau,
anerae pa kitiyaunit iyoŋ ibore idio erae kiŋerit iyoŋ iŋes.
25Kerae alipite epedoritor idiobore arubakin eyai erae pa kerae iyoŋ iturubakinit eyai?
26Iyoŋ iturubak ŋiboro daadaŋ, anerae erae ŋulu kon, okoe Ekapolon, iyoŋ imina ibore daadaŋ ŋini eyari.
Currently Selected:
Aos. 11: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.