Sir 50
50
Simon lokoku a Onias
1Arae Simon lokoku a Onias ŋolo arae esacaradoti ŋolo apolon,
ekarikon a ŋikaitotoi keŋ ka ŋolo eturotor ŋituŋa keŋ;
abu iŋes alorwa a ŋulu ka akiyar keŋ tosubak nabo Akai ŋina ka Akuj ka abu todukok ŋarwatatain kiryama Akai ŋina ka Akuj anapaki keŋ.
2Abu iŋes kiwuak akisyakinet a ŋarwatatain a ŋuna arae ŋaarei,
ŋarwatatain ŋuna aoyak ŋuna awuaunito Akai ka Akuj anawae.
3Alorwa keŋ, aponi tobokakinae akare aŋuna a ŋakipi,
akibois ŋina eyakaun ŋakipi, ŋina ekoni anam elolom.
4Abu iŋes toyeu epite ŋolo eiunia ŋituŋa keŋ anakinyasuno,
ido abu todukok arwatata kiŋa etaun itoroniyarit akirikauno.
5Arae ŋolo etopoloorito ŋituŋa nooi ka ewuakinito iŋes ŋituŋa kidiŋ apaki ŋina elomunia iŋes anakibois a ŋina asegan nooi.
6Eleere iŋes ikwa etop ŋolo ka ataparacu alokidiŋ ŋidouwon, eleere ikwa elap eyai kidiama apaki ŋina itiyaere ŋasuban.
7Eleere iŋes ikwa akoloŋ inwakit Akai ka Akuj a ŋina alokidiama nooi,
eleere ikwa alokakinet ileerete ŋiraŋgi keŋ alodowon;
8eleere iŋes ikwa ŋatur ŋuna kipura-areŋak alorwa a ŋulu a ŋaraito a ŋuna eŋarenok, eleere iŋes ikwa ŋatur a ecomocomo a ŋolo elomunit alodiyete ŋicowae ŋulu eya ŋakipi, eleere iŋes ikwa elibuniata ŋikito alo Lebanon ŋirwa ŋulu ikamuunio akwap.
9Eleere iŋes ikwa akim ŋina icunyere ekinyate anisipirya,
eleere iŋes ikwa ibore ŋini ityekunitae a egolid, ŋini isibusitae a ŋamoru a ŋuna egelegelya a ŋuna epol egyelit.
10Eleere iŋes ikwa ekitoe ŋolo ka Olipa ŋolo ileleba ŋaraito
ka ikwa ŋikito a cipres ŋulu ileŋoro alodowon a ŋulu ewato.
11Ani enapi iŋes ekaaso keŋ ŋolo ka apolou,
ido tonap ŋilowi ŋulu ajokak ŋulu ebusak,
ido tolot namuroet ŋina asegan,
eturuwonori iŋes alapatu ŋina ka Akai ka Akuj ŋina eyai apolou ŋina ailiilon iŋolikini.
12Ani ijaari iŋes ŋatutubeta a ŋamuronisya anakan a ŋisacaradotin, apaki ŋina ewoya iŋes alodiyete ekeno ŋolo anamuroet
ka irimokinito iŋes kidiŋ ŋikeŋarakinitok keŋ,
ekwaan iŋes ka ekitoe a Cedar alo Lebanon ŋolo eriŋa edit ŋolo ewuakinito ŋikito ŋulu a ŋiŋolya kidiŋ.
13Apotu ŋidwe ka Aaron daadaŋ ŋulusapa anapolou kec,
todaka ŋainakineta ŋuna a Ekapolon anakan kec
alokiŋaren atukot daadaŋ ŋina a Ŋisirael.
14Ani kedau Simon akirikakin etic anamuroet ka akisibak ŋainakineta ŋuna einakinitae neni ka Akuj a ŋina alokidiama nooi, Akuj ŋina etiron,
15eopeonori iŋes akan keŋ alemun ekopo,
ido tobukok ainakinet ŋina a ŋimaten ŋina a epiini a ŋolo areŋan puu;
tobukok kwap nawoeta anamuroet, erae akitalakaret ŋina ebob eure neni ka Akuj a ŋina alokidiama nooi, erwosit a daadaŋ.
16Ani ecelunete ŋidwe ka Aaron ŋulusapa, akutanakinete ikes ŋarupepe kec ŋuna etyekunitae a ŋasuwa; tokutakis ikes a ŋitoilon a ŋulu acelasi ikwapei ibore ŋini emaikina Akuj ŋina alokidiama nooi kiira.
17Apaki ŋin nai, amaikina ŋituŋa daadaŋ toryediko, kijuuroto atipei todolo ŋireetin kec kwap,
kilipa neni a Ekapolon kec, Akuj ŋina etiron, Akuj ŋina alokidiama nooi.
18Ido apotu ŋikaeok kipuro iŋes a ŋitoilon kec
a ŋulu aeosi ejokak ka togelegelaaka eosi kaapei.
19Apotu ŋituŋa a Ekapolon a ŋolo alokidiama nooi
kirworo ŋakilipasinei kec neni a ŋolo esyonon,
akitodol ŋina erikakiniata ikes akilip neni a Ekapolon lopite ŋolo etemokinitere
ka apotu ikes kirikakis etal keŋ.
20Abu nai Simon todoku kwap anamuroet, kikyaa ŋakan keŋ natukot daadaŋ ŋina a Ŋisirael
alimor arereŋu ŋina ke Ekapolon ka akitopoloor ekiro ŋolo a Ekapolon;
21ido apotu ikes kijuuroto ilipete apaki ŋina a ŋaarei
aŋuna ka akijaun arereŋu aneni ka Akuj a ŋina alokidiama nooi.
Akiterereŋ
22Tokona nai epuro Akuj ŋina a daadaŋ,
ŋina itiyae anakwap a daadaŋ ŋiticisyo ŋulu ka aumokin,
Akuj ŋina ikitopoloe iwon ŋinapei anakidouno
ka ŋina ikiyokit iwon lopite ŋolo eyakar akisyon keŋ.
23Elipit ikiinak iŋes iwon alakara ŋina a ŋitai
ka elipit toyakaun ekisil alorwa yok tooma Isirael,
lopite ŋolo ayakar alorwa a ŋulu a koloŋ.
24Elipit ikiinak iŋes iwon akisyon keŋ
ka ikilaku iŋes iwon alorwa yok.
Ŋuna esidyok
25Eŋerit ekaatau ŋituŋa a ŋakwapin a nu a ŋaarei
ka ŋina a ŋauni nyerae ŋituŋa keŋ tari ŋituŋa:
26Ŋituŋa ŋulu iboiyete alo Seir ka Pilistin
ka ŋituŋa ŋulu baŋaanotin ŋulu iboiyete alo Sekem.
27Adau ayoŋ Yesu lokoku a Sirak a ŋolo arae lokoku a Eleasar a ŋolo alo Yerusalem, akigir ŋakiro ŋuna ka aosou kaŋ daadaŋ lokitaabo lo aŋuna ka akitatamya ŋuluce ka aryamunia aosou.
28Erereŋ ŋulu iwarito anakiyar kec ŋakiro ŋun
ka ŋulu iwuakinito ŋakiro ŋun lotai kec, eruwor ikes ŋulu eosok.
29Ani kitiyata ikes iwuapito ŋakiro ŋun, egogoŋioto ikes alotooma ŋinibore daadaŋ,
anerae erae akitopoloorit Ekapolon erot kec.
Currently Selected:
Sir 50: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.