Sir 49
49
Yosia ka ŋice ŋulu ajokak
1Ikoni ekiro a Yosia eminae ŋolo akukunyon
ŋolo itiyaunit ituŋanan ŋini epiiryana anakitiya ŋamyeta ŋuna akukunyok.
Ebob atamunit ekiro keŋ ikoni neni eboboo ao anakituk a ŋinituŋanan,
ebob ikoni ŋaeosyo anapaki a ŋina a ŋasuban a ŋuna emasere epiini.
2Abu iŋes kitiya ŋuna eyookino aŋuna ka akiteesikin ŋituŋa akitiya ŋuna aronok
ka alemar ŋuna aronok ŋuna ka asiilyo.
3Abu iŋes torubak iwuakinit etau keŋ neni ke Ekapolon ka anapakio a ŋuna pa ewuapitotor ŋituŋa ŋikisila,
abu iŋes kituruwo ŋituŋa ŋulu ewuapito ŋuna ka Akuj.
4Apotu ŋituŋa ŋuluce daadaŋ toruwor ŋikasecak ŋulu aronok nooi,
mati Daudi, Esekia ka Yosia, anerae apotu ikes kimyekis ŋikisila ŋulu ka Akuj a ŋina alokidiama nooi;
apotu ŋirwosi ŋulu a Yudaya todaunos.
5Apotu ikes inakis apedor kec neni a ŋuluce
ka apolou kec neni ka akwap a ŋinagela,
6a ŋina abu kicuny etaun ŋoloseuna ŋolo ayai akibois ŋina asegan,
ido apotu kituruwosi ŋirotin keŋ ŋulu asilok
lopite ŋolo sek alimunitor Yeremia;
7anerae apotu ikes kisicana Yeremia,
ŋolo tari eriŋa eyai nakook aris kituruwor ekadwaran,
aŋuna ka arutun, akinyasun ka amunaar, ido ikwaŋinapei adukokin ka adupakin.
8Arae Esekiel abu kiŋolek akisileerekinet ŋina ka apolou,
ŋina abu Akuj kitoodik iŋes alokidiama ŋagaari ŋuna a ŋisubuna a ŋulu a ŋabebenuk;
9anerae abu Akuj daŋ tolimu ekiro a Yob
a ŋolo abu kiwuap ŋipitesyo daadaŋ ŋulu ka akiyookino.
10Elipa kiyakuut ŋakoyo a ŋikadwarak a ŋulutomon ka ŋiarei akiyar ŋinakitete aneni aperyoto;
anerae apotu ikes kisirworiut ŋituŋa a Yakob,
ido tolakut ikes eyakatar akigeno ŋina nyiryaŋiryaŋa.
11Alipite ituruworere iwon Serubabel ŋolo ailiilon?
Ekoni iŋes ekaboboot ŋolo ka apolou ŋolo enapitae alokimoin a ŋolo ka akan a ŋina aloteten.
12ka Yosua daŋ lokoku a Yosadak ekoni nen;
alorwa kec, apotu ikes toduko Akai, ido kitopoloosi Akai ka Akuj ŋina asegan aŋuna ke Ekapolon,
Akai ŋina emaikina eyai apolou ŋina a ŋikaru ka ŋikaru.
13Erubakinitae etamunitae Neemia daŋ ŋikaru ka ŋikaru;
anerae abu iŋes kitonyou ŋarwatatain a etaun yok ŋuna aukoro;
ido todukok ŋipukei a ŋasuwa ka todukok nabo ŋakais yok ŋuna aukonoro.
Ŋikanupak ŋulu a ŋirwa a ŋulu a koloŋ
14Ekudyoko ŋituŋa ŋulu aponi tosubunae ŋulu eya nakwap ŋulu ikwaan ka Enok,
anerae aponi iŋes yaarae anakwap nakuj eyari;
15kori emam idio aponi kidounoe ikwa Yosepu;
anerae aponi iŋes kidarae ejok tari ŋakoyo keŋ.
16aponi kitopolooroe Ses, Enos, nai akilo ŋituŋa ŋuluce daadaŋ ŋulu aponi tosubunae, ayai Adam.
Currently Selected:
Sir 49: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.