Sir 51
51
Akilip a Yesu alokoku a Sirak
1Okoe Ekapolon ka erwosit, alakar ayoŋ neni kon,
okoe Akuj akaiunan kaŋ, ekepuri ayoŋ iyoŋ.
Alakara ayoŋ aŋuna a ekiro kon,
2anerae iyoŋ ibu toruwor ŋina ikiyokit ayoŋ ka ŋina ikiŋarakinit ayoŋ
ka idau alakun ayoŋ anakinyasuno
ka analoc a ŋina alokakinito ŋituŋa ŋulu irworosi itoroniarito ŋuluce,
ibu iyoŋ ikilaku ayoŋ alotuŋa a ŋulu ikobete ŋakiro ŋuna ka alyokonu.
Ibu iyoŋ toruwor ekeŋarakinan kaŋ alokiŋaren ŋimoe kaŋ,
3ibu iyoŋ itolaku ayoŋ alotooma akisyon kon ŋina apolon ka a ekiro kon a ŋolo eyakar apolou,
ibu itolaku ayoŋ aloman a ŋulu atenitotor ikes akitasalun akiyar kaŋ,
ibu itolaku ayoŋ anapedor a ŋulu ewarito alemar akiyar kaŋ
ka alocan a ŋulu alalak a ŋulu abu ayoŋ edaŋidaŋ,
4anakim a ŋina ekerakarit ayoŋ alowaetin a daadaŋ ka alokidiŋ akim ŋina nyinokakina ayoŋ.
5Ibu iyoŋ itolaku ayoŋ anakibois a ŋikatwak ka anakirworo ŋakiro ŋuna aronok ka ŋuna ka alyokonu.
6Ibu iyoŋ itolaku ayoŋ anajamuwaro a ŋina a ŋulu nyiyookino irworosi neni ke erwosit.
Abu akiyar kaŋ apaki ŋin toapiya natwanare ka abu akiyar kaŋ min nakisyakinet a akibois a ŋina a ŋikatwak.
7Apotu ŋimoe kaŋ ekerikaut ayoŋ alowaetin a daadaŋ
ka mam ituŋanan abu ekeŋarak ayoŋ;
abu ayoŋ ewar akiŋarakino aneni a ŋituŋa, ido emam ŋina abu totakanu.
8Aŋun, okoe Ekapolon, abu ayoŋ otamu akisyon kon
ka arimao kon ŋina koloŋ, anerae ilakununui ŋulu idarito tolaku iyoŋ
ido iununui iyoŋ ikes anapedor a ŋimoe kec.
9Abu ayoŋ elip neni kon a ne alokwap,
abu okodyek iyoŋ alakun ayoŋ anatwanare.
10Abu ayoŋ ekalou otema, “Ekapolon, irae iyoŋ papa kaŋ;
nyikiesik ayoŋ alorwa a ŋulu a ŋican,
ŋina emamukaunor akiŋarakinet aryamunit ayoŋ aneni kon aŋuna a ŋiketurok a ŋulu akaremokino ayoŋ.
11Arubakini ayoŋ epuro ekiro kon a ŋinapaki,
ido aeo ŋieosyo ŋulu ka alakar neni kon.”
Ibu iyoŋ Akuj kiira akilip kaŋ,
12anerae ibu iyoŋ ikiu ayoŋ alotooma akinyasuno
ka ikilaku ayoŋ alotooma apaki ŋina a ŋican.
Aŋun, alakara ayoŋ neni kon ka ekepuro ayoŋ iyoŋ,
ido etopoloori ayoŋ ekiro ŋolo ke Ekapolon.
Ŋuna iatakinito Ŋaburaniyae
Tolakaros neni ke Ekapolon, anerae ejok iŋes,
anerae erae amina keŋ ŋina a ŋikaru ka ŋikaru.
Tolakaros neni ka Akuj a ŋina a ŋikipurisyo,
anerae erae amina keŋ ŋina ŋikaru ka ŋikaru.
Tolakaros neni a akedaran a Isirael,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina abu tosub ŋiboro daadaŋ,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina abu tolaku Isirael,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina abu tocun ŋulu eelaritae alo Isirael,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina abu todukok nabo etaun lo ka akibois keŋ ŋina asegan,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina abu kitolomu ekepukan alokal a Daudi,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina abu toseu ŋidwe ŋulusapa ŋulu a Sadok aruwor
ŋisacaradotin,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina arae aupal ka Aburaam,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina arae ataaba a Isaka,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina arae aketiron ŋina a Yakob,
anerae erae akisyon keŋ ŋina a ŋikaru ka ŋikaru.
Tolakaros neni keŋ a ŋina abu toseu Sion,
anerae erae akisyon keŋ ŋina a ŋikaru ka ŋikaru.
Tolakaros neni ke erwosit a ŋolo erae erwosit a ŋirwosi,
anerae erae akisyon keŋ ŋina a ŋikaru ka ŋikaru.
adau iŋes akitolomun ekepukan aŋuna a ŋituŋa keŋ,
akipuro aŋuna a ŋulu ikinyomito iŋes.
Aŋuna a ŋituŋa a Isirael, ŋituŋa ŋulu erae ŋipei ka iŋes.
Kipuro Ekapolon!
Ŋakiro a Sirak ŋuna ka aosou
13Ani eriŋa ayoŋ adit, eriŋa ayoŋ nyeloto akilare,
abu ayoŋ oŋirik anakilip kaŋ akiwarit aosou.
14Abu ayoŋ olot Kai ka Akuj akiŋita aosou,
abu ayoŋ ewar iŋes ŋirwa daadaŋ ŋulu ayarya ayoŋ
15Abu aosou toruwor alakara kaŋ ŋinapei eriŋa ayoŋ asorokana akitodol apaki ŋina amojoŋia ayoŋ;
abu ayoŋ etor lorot ŋolo ka akiyookino,
ageun anasoroko kaŋ, abu ayoŋ ewuap ŋikukus ŋulu ka aosou.
16Abu ayoŋ epuŋok akaakit iwadio akiirar ŋuna ka aosou, ido abu oryamu aosou,
abu ayoŋ oryamu aŋuna kaŋ ŋakitatameta ŋuna alalak.
17Abu ayoŋ etiya ejok alotooma aosou;
etopoloori ayoŋ iŋes ŋini ikiinanakini aosou.
18Abu ayoŋ oseu akiyar ewuapit ŋuna ka aosou,
ido abu ayoŋ oinakin aŋuna ka ajokis,
ido emam ŋuna eketakadakinete ayoŋ.
19Abu ayoŋ ewuap ka agogoŋu ŋuna ka aosou,
ido alopitesyo kaŋ, arae ayoŋ ŋolo acoikinit nooi.
Abu ayoŋ ebaa ŋakan kaŋ nakuj, ido eololo aŋuna sek pa ayenia ayoŋ ŋuna ka aosou.
20Abu ayoŋ oinakin anakiyar kaŋ naryamun aosou,
ido anakiyookino, abu ayoŋ oryamu aosou.
Aŋuna abunio ayoŋ oryamu aosou, abu ayoŋ oryamu ayenut ameun ŋinapei aryamunia ayoŋ iŋes;
aŋun, nyakaŋeryo ayoŋ.
21Abu etau kaŋ kiburak aryamun aosou;
aŋun, aryamu ayoŋ ainakinet ŋina erae ŋina kaŋ.
22Abu Ekapolon okoinak ayoŋ aŋajep kaŋ erae eropit kaŋ,
ido epuri ayoŋ iŋes a aŋajep kaŋ.
23Toapuutu neni kaŋ iyes ŋulu nyiyenete ŋakiro,
ido kiboiyoto alokai a ŋina itatamere
24kaanukiro ibaakatar iyes emam ŋakiro ikiyeni,
ido kaanukiro idaŋidaŋiata iyes ŋun nyicamitotor aryamun ayenut?
25Abu ayoŋ erworik ŋakiro nu: Toryamutu aosou aŋuna kus emam akigyel a ŋisiliŋa.
26Inakinos ka agogoŋu aryamun aosou,
ido tocamakisi anakiyar kus aryamun akitatamo;
epedor aosou aryamun aneni eapi.
27Toanyutu iyes ŋilopeyek atemar abu ayoŋ etiya pa aŋirikinit nooi,
ido aryamu ayoŋ aŋuna kaŋ ŋuna eketemokino.
28Kiirasi ŋakiro ŋuna a ŋakitatameta kaŋ nai meere anaŋirikinit nooi,
ido iryamunete iyes aneni kaŋ esilipa ka egolid.
29Elipi tolelyan etau kon alotooma akisyon ŋina ka Akuj,
ka elipi nyikiruma iyoŋ jik ŋileec akipuro iŋes.
30Kitiya etic kon anapaki a ŋina ajokan,
ido anapaki keŋ a alope, ebuni Akuj ainakin iyoŋ ekoniropit.
Currently Selected:
Sir 51: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.