Sir 32
32
Ŋipitesyo ŋulu ajokak anasuban
1Ani kikituruwor iyoŋ ikapolokiniton ŋasuban,
nyitemokino iyoŋ kitopoloor bon;
toyakaun neni kec ikwa ipei alokidiŋ kec.
Kiyoku mono ikes ejok, ido ekaku kiboikin nai iyoŋ kieŋu.
2Ani kirikak iyoŋ akitiya daadaŋ ŋuna ikiinakinitae akitiya,
kiboikin nai nakibois kon,
ikotere nai ilakarosi kaapei ka ikes,
ido ikitopoloosi ikes iyoŋ aŋuna ke etic kon a ŋolo ajokan.
3Kirworo iyes ŋulu imojoŋito, anerae erae ŋin apedor kus,
nai ka aosou a ŋina iyookino,
nai nyemaikina iyes irworosi apaki ŋina eotor ŋituŋa.
4Nyitemokino iyes iruworosi ŋulu ecelasi aneni eyai abolya;
nyitoodiut apiiryanut kus anapaki aŋina nyiyookino.
5Lopite ŋolo iwuakinere ŋamoru ŋuna ebusak lokaboboot ŋolo itiyaunitae a egolid,
ikoni neni abolya ŋina eore anapaki a ŋina emasere epiini.
6Lopite ŋolo inaminamere egolid namoru ŋuna enyaritae emerald,
ikoni nenipei aeo ŋina eoi ejok emasyo epiini.
7Kirworo iyes ŋulu eroko irae ŋisorok, erae kikicamakinitae akirworo,
nai meere arubakin irworosi jik, nai kikicamakin nabo kirworo.
8Kituuruwana erwori kus, tolimutu ŋuna alalak anakiro a ŋuna ekudyoko;
kileereutu irae ŋulu iyenete ŋuna alalak, nai ŋulu nyirworosi car.
9Ani irukito iyes ka ŋikapolok, nyitoodiunosi esibit irae iyes daŋ ŋikapolok,
ido ani irworo ŋinice nyemaikina iyes irworosi.
10Ebuni mono akimilyaunet eriŋa agirokinet,
aŋun, eyenunio ituŋanan atemar ejok eriŋa nyedoluno.
11Torotokini anapaki a ŋina ajokan, nyejok aruwor ŋini esidyon arotokin;
tolot lore kon atipei, nyiŋel akirimirim.
12Kitalaka akonikuwan aneni imuja, tari ŋina iyenunia iyoŋ atemar etemokin
nai nyitiya asecit alotooma erwor ŋolo ka akituro.
13Nai akilo ŋun daadaŋ tolakar neni a akasubunan kon, Akuj ŋina ikiinak iyoŋ ŋainakineta keŋ ŋuna ajokak.
ŋuna ikiinakini Akuj
14Ituŋanan ŋini iwarit ŋuna ka Akuj, ecamuni ŋuna itatami Akuj iŋes
ka ikes ŋulu enyounete taparacu sek akiwarit acamit ŋina ka Akuj,
eryamunete ajokis keŋ.
15Ituŋanan ŋini iwarit ayenun ŋikisila, ilelebikinio neni keŋ ŋikisila,
nai igukini alokisila ŋulu a ŋisoswae.
16Ikes ŋulu itopoloorito Ekapolon, eyenunete ŋatubonokineta ŋuna iyookino;
ido isileereunete akiyookino ŋina a ŋiticisyo kec lopite ŋolo ileereunio akica.
17Eŋerit ekasecan alimokino atemar nyiyookino ŋuna itiyae iŋes,
ido eryamuni ŋuna etami iŋes atemar ejokak aŋuna ka akitiya ŋuna ecamit iŋes.
18Nyejamakini ituŋanan ŋini eyakar ŋatameta ŋuna ajokak atametait ŋina ajokan ŋina elimokinio iŋes,
nai ituŋanan ŋini abaŋaanan, ŋini iturono, nyemitakinit ŋuna elimokinio iŋes.
19Nyitiyak idiobore nyetamatama ejok,
ido ani kidau iyoŋ akitiya, nyigwor aŋuna itiya iyoŋ.
20Nyimyaanakini erot ŋolo elalak ŋiboorei ŋulu ikiwanete
ka nyicamak ibore ipei ikiteryamuni iyoŋ ŋican ŋarwa ŋaarei.
21Nyimina akikinyomit nooi erot ŋolo ajokan,
22kitee ejok neni itori iyoŋ.
23Kiyokiunite akonikuwan ejok aloticisyo a daadaŋ a ŋulu itiyae iyoŋ,
anerae erae nen akiwuapit ŋakiciketa ŋuna ka Akuj.
24Idarit ejok akuwan keŋ ituŋanan ŋini iricit ŋakiciketa
ka emam ŋuna etwaniyari ŋini ikinyomit Ekapolon.
Currently Selected:
Sir 32: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.