Sir 31
31
Epite ŋolo etiŋitere ebari ejok
1Ituŋanan ŋini etamatamae jik aŋuna ke ebari, einiyari akuwan keŋ
ka elemari akiyaloloŋ aŋuna ke ebari ŋajo,
2atamatam jik anakiyaloloŋ, elemari ŋajo ŋuna ajokak
ido elemari adyak ŋina apipilan ŋajo.
3Itiyae ekabaran nooi aŋuna ka akitalal ebari keŋ,
ido apaki ŋina ieŋunia iŋes, eyakaun lotau keŋ akiyar ŋina ka akileile.
4Itiyae ka agogoŋu ituŋanan ŋini ekulyakana aryamun epite idio ŋolo eyarya,
ani ca ketema iŋes eeŋu, eryamuni atemar eyakar akiitanit.
5Ituŋanan ŋini emina egolid, nyetubokinio erae ŋini iyookino;
ituŋanan ŋini emina ŋisiliŋa ecakarete ŋisiliŋa akiyar keŋ.
6Enyasunosi ŋikalalak aŋuna a egolid
ido aryamut ikes akinyasuno kec iteete ikes.
7Erae egolid apuŋure ŋina esigukinan ŋulu erorokoka aŋuna ka aryamun iŋes
ka ikamari aroroko aŋuna a egolid ibaŋaanot daadaŋ.
8Erereŋ ikabaran ŋini eryamunio emam ŋuna itoroniyaritere,
ŋini nyiwuakinit akiyar keŋ naryamun egolid.
9Ŋae iŋes, ikotere epuro iwon iŋes?
Anerae etiya iŋes ŋaumonokineta alotuŋa keŋ.
10Ŋae adau alomar nakikatakino ŋina a egolid,
ido toryamunae iyookino?
Emaikina ituŋanan ŋin kiturokin aŋuna ka akiyookino keŋ.
Ŋae eyakar apedor ŋinabilet ŋikisila, ido nyebil
ka akitiya aronis ido nyitiya?
11Iturubakinio ebari keŋ elosi kiŋaren ejok
ka iseraete ŋituŋa anatukot ŋiticisyo keŋ ŋulu iŋaranakinia ŋuluce.
Ŋipitesyo aneni imujere
12Iboi iyoŋ aneni imujata ŋituŋa ŋulu apolok a?
Nyitoodiu a nen atemar irorokana iyoŋ, ido nyitema,
“Etya ai, akimuj eyai nege!”
13Totamunite atemar erono ayakau ka akoŋu ŋina ka aroroko.
Nyo ibore ice esubunitae erorokana akilo akoŋu?
Aŋun, eracuni iŋes ŋakiyo aŋuna a ŋakiro a daadaŋ.
14Nyiopeyo akonikan nibore ŋini iŋolikini iyoŋ daadaŋ,
nyilosenene neni a ikidunyet kon apaki ŋina imuja iŋes.
15Toyenu mono iyoŋ ilope ŋuna etami ikidunyet kon ka anakiro a daadaŋ,
torae ŋini itamatamae nooi.
16Kimuj akimuj ŋina iwuakinitae kiŋaren kon ikwa ituŋanan ŋini
itopolounitoe alopite a ŋolo ajokan
ka nyinyakaa irae ŋini irorokana,
acepaki itoŋoi iyoŋ ŋinice.
17Torae ŋini eŋarenon anakirikakin akimuj,
itoodiuni nen atemar iyakar iyoŋ ŋipitesyo ŋulu ajokak,
ido nyirae ŋini nyimwonene, acepaki itoŋoi iyoŋ ŋinice.
18Ani kiboi iyoŋ aneni eya ŋituŋa ŋulu alalak,
nyigeu ŋinibore ikiinitae iyes eriŋa ikes.
19Itemokino ituŋanan ŋini eyakar ŋipitesyo ŋulu ajokak akimuj tari kedit,
nyieŋa iŋes eperi erae ŋini eumonokini aŋuna ka akoro.
20Eyauni akimuj ŋina itemokino ŋajo ŋuna ajokak neni a ituŋanan
ani ekenyuni iŋes taparacu sek, eryamuni iŋes akuwan eŋale.
Eponeneete ŋican ŋulu ka akikoler ka acamit akilek ta akibelibelo iperi neni a ŋulu edakaka.
21Ani kikitebukinit iyoŋ akimuj nooi, tonyou tolopu tolek,
ido toryamu akiwuarar.
22Kiira ŋakiro kaŋ, ikaakoku ka nyikiŋer ayoŋ,
ido ekaku ibuni iyoŋ alakar aŋuna a ŋakiro kaŋ.
Itemokino torae ŋini iyapara alotooma ŋuna itiyae iyoŋ daadaŋ,
ido emam adyak ŋina ikilouni iyoŋ.
23Iterereŋete ŋituŋa ituŋanan ŋini einanakini ikes akimuj
ka irworosi ikes ŋakiro ŋuna a kire aŋuna a ituŋanan a ŋin.
24Epedorete ŋituŋa alotaun akiŋuruŋura aŋuna a ŋini emini a akimuj
ka irworosi ikes ŋuna iyookino aŋuna ka aminiu keŋ.
Atyamarit anakimat epiini
25Nyikatak agogoŋu kon anakimat epiini,
anerae enyasu epiini ŋulu alalak.
26Lopite ŋolo ikatakinere alokitet etic a eketyakan ŋasuwa,
epiini daŋ ikatakini ŋitai kisileereu ŋuna eya lotau apaki ŋina iburaata ŋulu eŋoyete.
27Erae epiini akiyar alotuŋa erae kemasi ŋolo itemokino.
Nyo akiyar aneni a ŋini nyetukanari epiini?
Aponi kitiyaunae epiini aŋuna ka akituruwor ŋituŋa ŋulu elakara.
28Epiini ŋolo emasyo anapaki a ŋina iyookino ka ŋolo itemokino,
erae alelyanu a etau ka alakara a akiyar.
29Epiini ŋolo emasyo elal, ikirikori naŋoit ŋina ke etau,
ikirikori lobura ka naryamun ŋican.
30Iyatakini ameranu aŋoit neni a ibaŋaanot, ido eryamuni iŋes ilope ŋican
edaun agogoŋu aneni keŋ ka iyatakin ŋajemei neni keŋ.
31Nyitoŋo ikidunyet kon anasuban a ŋuna imasyata iyes epiini,
nyijamuwa iŋes alotooma alakara keŋ.
Nyilimu akirot ŋina itoŋoi iŋes
ka nyitoroniya iŋes anakiitanit atemar totac ibore ŋini ikijaarit iŋes iyoŋ.
Currently Selected:
Sir 31: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.