Sir 33
33
1Emam aronis eyakaun neni a ŋini itopoloorit Ekapolon,
nai erubakinio eiununiyo ŋini ikoni ŋin anakikatanakineta.
2Nyitoroniyarete ŋulu eosok ŋikisila,
nai ŋini a ŋisoswae ŋini itoroniyarit, ikwaan ka ataker ŋina iryaŋiryaŋi ekuwuam ŋolo agogoŋon.
3Epedori ituŋanan ŋini eyakar ayenut akikinyom ŋikisila,
anerae aneni a ŋini ikoni ŋin, erae ŋikisila ŋakiro ŋuna eyarya iŋes ŋuna edwarakinit iŋes Akuj.
4Kitemonok ŋuna ilosi iyoŋ alimun, ido ani irworikini iyoŋ, ikipupokinete iyoŋ ŋituŋa;
kisitiya ŋakiro ŋuna ikitatamitae iyoŋ aŋuna ka aboŋonokinio ŋuna ikiŋisyo.
5Ikwaan etau a ibaŋaanot ka akokoro ŋina ka agaari,
ido ikote ŋatameta keŋ ibore ŋini irimi atipei.
6Ikwaan ekone ŋolo ikijamuwarit ka aŋole ŋina emam ituŋanan adokaki amere,
ŋina etirono apaki ŋina edokakinia ekiŋaren ituŋanan ca daadaŋ.
Agelaanut a ŋinibore esubunitae ka ŋina a ŋituŋa
7Kaanukiro itopolooritere nooi apei koloŋit, akilo ŋinace,
torae bo akica ŋina a ŋinapaaran alotooma ekaru ŋina ebunit aneni ka akoloŋ?
8Alotooma aosou ŋina ke Ekapolon, aponi totyakatyakae ŋirwa,
ido abu iŋes kiwuak ŋapakio ŋuna egelegelya ŋuna ka akieŋun ka ŋuna a ŋasuban.
9Abu iŋes kitopoloo ŋirwa ŋice toruwor ŋulu esegak ka ŋice
toruwor ŋulu nyitopolooritae.
10Itiyaunitae ŋituŋa daadaŋ analup.
Arae nalup etiyaunere Adam.
11Alotooma aosou keŋ ŋina apolon,
abu Akuj tosub ŋisubuna keŋ egelegelya,
ido inanak ikes ŋiticisyo ŋulu egelegelya.
12Abu iŋes kiterereŋ ka kitopoloo ŋice
ka abu kituruwo ŋice ŋulu esegak, ido kiwuak diyete keŋ,
nai abu kilam ŋice, kitiditeu ikes,
ido kirita ikes anakiboisyo kec.
13Ikwa ecoto eyai nakan a ekayen aŋuna ka ayeunia ibore lopite ŋolo ecamitor iŋes,
eyakasi ŋisubuna daadaŋ nakan a ekasuban kec
aŋuna ka ainakino ŋinibore daadaŋ etubuni iŋes.
14Ani kiseu ajokis, iŋeri aronis ka ani kiseu akiyar iŋeri atwanare,
aŋun eseunit ikasecan ŋuna eŋerit ŋini iwuapit ŋuna ka Akuj.
15Kiŋolik mono iyoŋ ŋiticisyo daadaŋ ŋulu ka akuj a ŋina alokidiama nooi,
eponeneete ikes a ŋiarei, ipei eŋerikino ka ŋinice.
16Abu ayoŋ oruwor ŋolo esidyon anakitiya etic,
abu ayoŋ ekwaanikin ka ekesokotan ŋolo iwuapit ŋikalemak ŋaraito a epiini.
17Alotooma arereŋu a Ekapolon, abu ayoŋ odol anapaki a ŋina etemokino
ka ikwa ekaleman ŋaraito ŋuna a epiini, abu ayoŋ elelebik akipany kaŋ ŋina ecuyere epiini.
18Totamunito atemar nyebukoro ayoŋ ŋakinyinyir kaŋ aŋuna kaŋ bon,
nai aŋuna a daadaŋ a ŋulu iwarito akitatamo.
19Kiirasi ŋakiro kaŋ, iyes ŋulu irae ŋikapolok alokidiŋ ŋituŋa
ka iyes ŋikarikok a ŋatukon a ŋikelipak, topupokisi ŋakiro kaŋ!
Ajokis ŋina ka akiuryaro bon
20Alotooma apaki daadaŋ ŋina iyarya iyoŋ nyiinak apedor neni a lokoku, kori a aberu, neni a lokaato kori a ekone,
ido nyiinak ŋiboro kon neni a ŋinice,
acepaki ibelekini iyoŋ ŋakonitameta, ido kiŋit ikinyakakin.
21Ani eriŋa iyoŋ iyari ka ieŋa,
nyicamak ituŋanan idio ilunyokin nakibois kon;
22anerae ejok erae ŋidwe kon iŋitasi aneni kon,
akilo iyoŋ akiŋita akiŋarakino aneni a ŋidwe.
23Kitiya daadaŋ ŋuna emaikina iyoŋ kitiya;
nyiyau ŋiyany napolou kon.
24Alotooma ŋirwa ŋulu edaunotor ŋirwa ŋulu ka akiyar kon, edoli esaa ŋolo ka akiridakin,
emaikina nai tokorak ŋiboro kon neni a ŋiletok kon a ŋulu emaikina kiruma.
Epite ŋolo etiŋitere ŋipi
25Emaikina esigirya einakinio ŋinya, ibuŋao ka isitiyao etic ŋolo agogoŋon.
Emaikina ipito einanakinio akimuj, itatamio akiwuapit ŋipitesyo ŋulu ajokak ka isitiyao.
26Inak ipito kon etic, ido iyakaun iyoŋ inapakina ŋatameta;
ani kimyek iyoŋ iŋes emam etic, iwari iŋes akitiya ŋuna ecamit.
27Itatamete ayokot ka ŋarukanes emosiriŋ a ecuugat akitiya,
ido ani eruwor ipito ŋini aronon itatamete iŋes ŋiticisyo ŋulu agogoŋok ka akidicio.
28Inak iŋes etic ikotere nyiboikin iŋes emam etic,
29anerae etamatamae iŋes akitiya aronis erae kemam etic itiyae.
30Inak iŋes etic ŋolo itemokino iŋes kitiya
ka ani pa kiwuap iŋes ŋun, inak iŋes etic ŋolo agogoŋon
nyirubak imyeanakini akisican ituŋanan idio
ka nyitiya idiobore ŋini nyiyookino akitiya.
31Ani kiyakar iyoŋ ipito ipei, kidar iŋes lopite ŋolo idaritor iyoŋ akuwan kon,
anerae igyelu iyoŋ iŋes anabukor ŋakinyinyir.
Ani kiyakar iyoŋ ipito ipei, kidar iŋes ikwa lokaato kon, anerae iitani iyoŋ iŋes lopite ŋolo iitanitor iyoŋ akiyar kon toyai.
32Ani kitiŋ iyoŋ iŋes erono, ido itoesik iŋes iyoŋ toem aneni kon,
33erot ali itupakini iyoŋ ilosi akiwarit iŋes?
Currently Selected:
Sir 33: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.