Sir 30
30
Ŋuna etapito ŋidwe
1Ituŋanan ŋini emina ikeekoku, edai iŋes ŋinapaki edyakarya,
ikotere elakar iŋes apaki ŋina eesikinia ikoku ŋin akitiya ŋuna aronok.
2Ituŋanan ŋini isicani ikoku keŋ aŋuna adyakarya,
eryamuni ŋuna ajokak aneni a ikoku a ŋin
ka iturokin iŋes aŋuna a ikoku a ŋin alokidiŋ ŋirukitos keŋ.
3Iŋes ŋini itatami ikeekoku einakini ŋimoe keŋ arakao aŋuna keŋ
ka itopolooryo iŋes aŋuna a ikoku keŋ alokonei keŋ.
4Ani etwani papa keŋ etakanuni esibit nyetwanit,
anerae eesikini iŋes alokaku ŋini ikwaan ka iŋes,
5ŋini anakiyar keŋ abu kidar iŋes ka alelyanu ka anapaki a ŋina ka atwanare emam akiyaloloŋ.
6Eesikinit iŋes alokaku keŋ ekenyaŋaran keŋ ŋolo inyaŋi ŋakiro a ŋimoe keŋ
ka ŋini itiyae ŋuna ka arimao lokonei a papa keŋ.
7Ŋini daadaŋ emunaari lokoku keŋ, imadi bon ŋajemei keŋ,
ka eryamuni ekeetau ŋican a ŋinakikalounet.
8Epedori aŋole ŋina nyitatamitae aruwor ŋina isyaana
ka edia ŋolo nyerameneneo epedori aruwor ŋolo egogoŋ akou.
9Ani kitacamanik iyoŋ ikoku ikinipori iŋes iyoŋ,
tobolyas iyoŋ ka iŋes itacamanikinit, ebuni iŋes akisiyaloloŋ iyoŋ.
10Nyikenasi ka iŋes itacamanikinit, iryamunete iyoŋ ka iŋes akiyaloloŋ,
ido ekaku ikonyakini iyoŋ ŋikyal kon anaryeba.
11Nyiinak iŋes alacakina anasoroko keŋ ka nyijamak ŋadyakanareta keŋ.
12Kiurya iŋes nyikeunit akou eroko esorokana,
todaai iŋes edyakarit eroko esorokana,
acepaki eruwor iŋes ekasyaat ŋolo nyepupi ŋakiro kon,
ido iryamuni iyoŋ aŋuna keŋ akiyaloloŋ alotau.
13Kitatam ikoku kon ŋipitesyo ŋulu ajokak ka kituruwo egogos keŋ ŋolo apotyon,
ikotere nyikitunyunyur iyoŋ a aleecenut keŋ.
14Ejok araakau ikulyakit toŋalee ka togogoŋ akuwan akilo abarit,
ido itotiŋito ŋican akuwan.
15Ejok aŋaleu ka agogoŋu a akuwan,
akilo edio golid ka ejok agogoŋu a akuwan akilo ebari ŋolo nyimarunun.
16Emam ebari ŋolo ejok akilo aŋaleu a akuwan
ka emam alakara ŋina epol akilo alelyanu ŋina ke etau.
17Ejok atwanare akilo akiyar ŋina a ŋican
ka akieŋun ŋina a ŋikaru ka ŋikaru akilo adyaka ŋina erae etoku.
Ŋuna etapito akimuj
18Akimuj ŋina ajokan ŋina iwuakinitae nakituk a ituŋanan
a ŋini edyaka, a ŋini nyepedorit akimuj,
ikoni akimuj ŋina iwuakinitae kidiama alyal erae ainakinet.
19Nyo ajokis einakinere amuronot neni a etorube?
Nyepedori iŋes akinyam, kori akiŋuun,
ikote ŋakiro nenipei aneni a ŋini erae Ekapolon isicani;
20Ite iŋes a ŋakonyen akimuj,
ido ieŋa nooi lopite ŋolo ieŋar ekolup apaki ŋina etunakinor neni ka apese.
21Nyiinak akonikuwan ŋatameta ŋuna ka akiyaloloŋ
ka nyisiyaloloŋio akonikuwan iredakinit.
22Erae etau ŋolo elelyani akiyar ŋina ajokon alope
ka itooyari alelyanu akiyar a ituŋanan.
23Toruwor ŋini elelyani anakiyar kon, ido toyakar alakar,
tolema akiyaloloŋ toeka aneni kon,
anerae enyasu akiyaloloŋ ŋulu alalak,
ido emam ajokis adio iryamuni iyoŋ anakiyaloloŋ.
24Ituruwanunete alilit ka aŋoit akiyar
ka ikirikiriuni atamatam nooi amojoŋ neni kon atipei.
25Eryamunete ŋulu elakara ka ŋulu imujete ebobokinit akimuj,
agogoŋu anakimuj kec.
Currently Selected:
Sir 30: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.