Sir 29
29
Ainakin mono ka akisideniyor
(Awos. 22:25; Ŋilep. 25:35-38)
1Einanakinete mono ŋulu esyoniok ibore neni a ŋikidunyet kec;
anakiŋaranakin kec ŋuluce, iwuapito ikes ŋakiciketa.
2Inak mono ikidunyet kon ibore anapaki a ŋina iitanitor iŋes;
totac ikidunyet kon edoli apaki ŋina icamunito iyes.
3Kiricakinite ŋuna ibu iyoŋ kikoŋ,
ido kirworo ŋuna a kire aneni a ŋini iikinit iyoŋ,
iryamuni iyoŋ a ŋinapaki ibore ŋini iitanit.
4Nyemitakinito ŋikalalak eden erae ibore ŋini emaikina totacae,
ido iteryamunito ŋulu apotu kiŋarakis ikes ŋican.
5Ibaanakini ipei ŋinice ŋakan tari ŋina isidenikinere iŋes ibore,
ido irworo iŋes itopoloorit ikidunyet keŋ aŋuna a ŋisiliŋa keŋ;
nai ani edoli apaki ŋina ka akitac eŋeli iŋes akitac
ka irwori iŋes ŋakiikineta ŋuna ka alyokonu,
ido irwori ŋuna ka alyokonu ikotere iŋarakinio apaki ŋin.
6Ani kepedori iŋes akitac, nyeryamuni ekesideniyoron keŋ tari ŋina erae anus a ibore a ŋini edeniyorit iŋes
ka ejamuwari iŋes ŋakiro ŋun erae ŋuna ka alyokonu.
Ani pa ketac iŋes, adema iŋes ŋini esidenikini iŋes ŋisiliŋa keŋ
ka eturuwo iŋes ŋin ekeemoit pa ecamakina;
ido eruwor iŋes ŋini icenio ka ŋini iyanyio,
akilo akitopolooro.
7Eŋerito ŋituŋa ŋulu alalak akisidenikin ŋinice ibore meere aŋuna eraakatar ŋulu
ewounitotor ŋikeceboro,
nai aŋuna ka akuryanu amodianakino ŋina nyemaikina itiyao.
8Kikote neni daŋ, toyakatar akiyapara neni a ŋulu ekulyakaka
ka nyimyek ikes ikidarito iyoŋ kiŋarak ikes.
9Aŋuna a ŋakiciketa, kiŋarak ŋikulyak
ka anakiitanit kec, nyirita ikes eororete ŋakan.
10Kipoto esilipa kon aŋuna alokaato,
kori aŋuna ke ekone ka nyimyek ikes iroiroi alokwap amoru, ido tocakar.
11Kisitiya ebari kon lopite ŋolo ecamakinitotor ŋakiciketa ŋuna ka Akuj a ŋina alokidiama nooi,
ido ikiteryamunete iyoŋ ŋun ŋuna ajokak akilo akiŋadat ŋisiliŋa kon.
12Kiŋada ŋiboro kon aŋuna ka ainakin neni aŋikulyak, ikiunete iyoŋ ŋun alotooma ŋulucan daadaŋ.
13Ejokyata ŋun aneni kon akilo aupal ŋina ebutur ka akwara ŋina agogoŋon,
ikiŋarakinete ŋun iyoŋ, itiyaete ŋimoe kon aŋuna kon.
Ŋuna ka ainanakin eden
14Epedori ituŋanan ŋini ajokan aruwor ŋini ewoi aŋuna a ikidunyet keŋ,
nai iŋes ŋini aesiki ŋuna ka ayenut ŋuna a ŋileec, nyiŋarakini ŋinice.
15Nyikimuryak arimao a ŋini abu towo aŋuna kon,
anerae abu iŋes tojal akiyar keŋ aŋuna kon.
16Epedori ikasecan akicanican ŋiboro a ŋini abu towo aŋuna keŋ,
17ido ituŋanan ŋini nyelakanar neni a ikaiunan keŋ,
eesikini ikaiunan keŋ.
18Etukulyakan ŋituŋa ŋulu alalak akiwo aŋuna a ŋidenio a ŋuluce,
ido esiguryak akulyako ikes lopite ŋolo iguryatar ŋikaguragurae a ŋakipi ananam.
Erita ŋulu eyenete akisirwor ŋuluce nakwapin ŋunagelae,
ido irimito ikes anakwapin a ŋunagelae.
19Ebuni ikasecan akisiyaloloŋ ŋinice aŋuna ka atemar towoikinae,
ŋuna elosikinit ikasecan erae aryamun epoida,
nai elomari natubokino.
20Kiŋarak ikidunyet kon alopite a ŋolo ipedorya iyoŋ a daadaŋ,
nai tocoite nyiloma iyoŋ locan.
Ere ka akijaunun ŋipeyok
21Ŋiboro ŋulu iitanit akiyar ikes lu: ŋakipi, akimuj ka ŋilowi
ta daŋ akai aŋuna ka akitiyaa ŋuna icamit iyoŋ bon ilope.
22Ejok akiyar a ikulyakit erae keperi tari kai ŋina enyamuna kidiama
akilo akiramiram akimuj ŋina ajokan alokai a ŋinice.
23Kimwonikina a ŋini edit kori a ŋini elal,
ido nyiirari iyoŋ ŋiyany aŋuna iraakar ipeyonon.
24Erae akiyar ŋina a ŋican akirimit anakais a ŋituŋa,
ikwapei ipeyonon, nyemaikina italalat ŋakiro ŋuna irworo;
25epatana iyoŋ akijaun epeyonon inak ŋakipi,
ido emam ŋini etemari neni kon alakara, meere ŋun bon,
nai iirari iyoŋ ŋakiro ŋuna ikote nu:
26“Bua laalo, igelaanot, kitemok akimuj lomesa,
acamit ayoŋ akimuj ŋina iwuak iyoŋ nen.
27Tolot, igelaanot, anerae eyai epeyonon nege ŋolo itopolooritae;
abu lokaato kaŋ akipeyon ayoŋ ka eitanit ayoŋ agule ŋina a ŋipeyok.”
28Nyepatana ituŋanan ŋini eyakar ŋatameta akidaŋidaŋ ŋakiro nu, akiŋenyanakino aŋuna aneniperot ka akiyenyo aneni a ŋulu ideniyonorete ŋisiliŋa.
Currently Selected:
Sir 29: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.