Ŋitic. 24

Kisitakis Ŋiyudayan Paulo

1Ani kelunyar ŋirwa ŋikan, toloto Anania ŋolo arae Esacaradoti ŋolo Apolon nooi ka ŋikatukok ŋice ta ekerworon aŋuna a ŋituŋa ŋolo anyaritae Tatulo, toloto tari Kaisaria. Towua ikes alokiŋaren Pelekis ekepukan, kisitakis Paulo. 2Ani enyaraunio Paulo, togeu Tatulo akisitakin iŋes tema,

“Ekapolon! Ikiryamu isua anapukan kon ekisil ŋolo aya apaki ŋina aoyan ka etemonokin ejok ŋakiro ŋuna alalak ŋuna ka akwap kosi. 3Ikijaunit isua nu alowaetin a daadaŋ ŋapakio daadaŋ ka ikilakara isua nooi neni kon. 4Nai nyayai apaki kon ŋina aoyan, ekelipit ayoŋ iyoŋ alotooma arimao kon, topupok ŋakiro kosi euruwuaka. 5Aponi isua toryamunae etuŋanan lo erae ŋolo aronon nooi, ŋolo ageununui aruruma alokidiŋ Ŋiyudayan daadaŋ ŋulu ka akwap a daadaŋ ka erae iŋes elope ekarikon ŋolo ka atukot a ŋina ebookoi ebe Ŋinasarin. 6Abu tari kikatak amunaiyar Akai ka Akuj, nai aponi isua kikamunae iŋes. [Totukunoe isua atubokin iŋes alotooma Ŋikisila kosi make, 7nai abu Lisia ŋolo epolokinit ŋisigarya kiŋucokin tooma ka aryenyeo a ŋina apolon, ya iŋes aneni kosi. 8Tema itemokino ŋikesitakinak keŋ potu neni kon.] Ani kiŋitiŋit iyoŋ ekile lo, iyenuni iyoŋ elope aneni keŋ ŋakiro daadaŋ ŋuna isitakinitere isua iŋes.” 9Tolomasi Ŋiyudayan nakiro ŋuna esitakinitere Paulo, temasi iyookino ŋun daadaŋ.

Kirwor Paulo aŋuna keŋ alokiŋaren Pelekis

10Ani kedau ekepukan aketun Paulo akirworikin, tolimu Paulo tema, “Ikwapei ayenia ayoŋ atemar iberakin iyoŋ aruwor ekatubon anakwap a na ŋikaru ŋulu alalak ŋulu alunyarosi, erwori aŋuna kaŋ emam akuryanu. 11Ikwaŋina ipedorya iyoŋ elope ayenun, eriŋa nyelunyara ŋirwa ŋitomon ka ŋiarei anapaki a ŋina adokaritor ayoŋ Yerusalem akilip. 12Nyeryamuna Ŋiyudayan ayoŋ ikipega ka idiotuŋanan alo Kai ka Akuj kori eguriguri ŋituŋa alosinagogae kori alotaun. 13Nyepedorete ikes tari akitoodiun ibore ŋini ekesitakinitotor ayoŋ tokona. 14Nai acamunit ayoŋ ŋakiro nu alokiŋaren kon: elipi ayoŋ Akuj atapapaa kosi, anakiwuapit erot ŋolo ke Ekapolon a Ŋikristo, ŋolo ebasi ikes erae alyokonu. Tari kikote nen, anupit ayoŋ ŋakiro daadaŋ ŋuna igiritae tooma Ŋikisila a Moses ka lokitaaboi ŋulu a ŋikadwarak. 15Egeno ayoŋ neni ka Akuj, ikwaŋinapei igenotor ikes lu, ebe eyarunete ŋikatwak ŋulu iyookino kaapei ka ŋulu nyiyookino. 16Aŋun, emukekinit ayoŋ jwi jwi akitacaunit ŋatameta kaŋ alokiŋaren Akuj ka alokiŋaren ŋituŋa.

17“Ani kelunyar ŋikaru ŋidi, ŋulu amamukar ayoŋ anakwap akaŋ, abu oboŋu Yerusalem ayaun ŋakiŋaranakineta ka ŋainakineta lotuŋa kaŋ. 18Arae apaki ŋina etiyaa ayoŋ ŋun iŋes akaryamuniata Ŋiyudayan ŋice ŋulu alo Asia ayoŋ alo Kai ka Akuj, kerikak etal ŋolo ka akiteseguno, ikwaŋina icikakinitotor Ŋikisila kosi. Amam asepic ikirukitor ayoŋ ka amam aruruma. 19Itemokino ikes ŋilopeyek potu kiŋaren kon, kirworo ŋakiro ŋuna ekesitakinitotor ayoŋ, erae keyakatar ŋakiro ŋadi ŋuna aronia ayoŋ. 20Kori kimyek ŋikilyok lu tolimut aseconu ŋina apotu ikes toryamut aneni kaŋ apaki ŋina awoitor ayoŋ alokiŋaren Atukot 21alemar akirot apei bon ŋina abu ayoŋ olimu apaki ŋina awoitor alokiŋaren kec ebe, ‘Ekesitakinitae ayoŋ nakoloŋit na, anerae anupit atemar eyarunete ŋikatwak.’ ”

22Apaki ŋin, abu Pelekis ŋolo ayeni ejok nooi ŋakiro ŋuna ke Erot a ŋolo ke Ekapolon Yesu, tolimok ikes tema, “Atubi ayoŋ ŋakiro kus apaki ŋina edolunio Lisia ekapolon a ŋisigarya.” 23Kicikak nai ekapolokiniton a ŋisigarya amiat ŋolo amet Paulo akiyok iŋes, nai inakinite iŋes akilajaara adio ka acamakin ŋikonei keŋ aanyunun iŋes.

Paulo alokiŋaren Pelekis ka Drusila

24Ani kelunyar ŋirwa ŋice, potu Pelekis ka Drusila aberu keŋ ŋina arae Ayudayat; kiyakiya iŋes akirot atemar tonyarae Paulo. Apotu ikes topupokis iŋes irworo ŋuna ka anupit Yesu Kristo. 25Nai ani erubakini Paulo irworo ŋuna ka akiyookino, ŋuna ka akiyapara ka ŋuna ka abunore Akoloŋit ŋina etubokinia Akuj ŋituŋa, tobul Pelekis tolimok Paulo tema, “Ape mono! Akanyarae ayoŋ iyoŋ nabo aryamuni apaki.” 26Emuit iŋes tari atemar okoinak Paulo ŋisiliŋa; aŋun, kirucuruc iŋes anyaraiyanar Paulo erwor ka iŋes.

27Nai ani elunyarosi ŋikaru ŋiarei, kilunyokin ekepukan ece ŋolo anyaritae Porkias Pesto lorot a Pelekis. Aŋuna acamitor Pelekis akitiya ŋuna etalakarito Ŋiyudayan, abu kimyek Paulo alomabus.

Currently Selected:

Ŋitic. 24: NIB2008

Highlight

Copy