Ŋitic. 23
23
1Kitek Paulo atukot, kirworik tema, “Ŋikaitotoi! Ecayete ŋatameta kaŋ anakiro a daadaŋ a ŋuna ikamunito akiyar kaŋ alokiŋaren Akuj akitodol akoloŋit napei na.” 2Anenipei tolimok Anania, ŋolo arae Esacaradoti ŋolo Apolon nooi ŋituŋa ŋulu awuasi alodiyete Paulo akibap iŋes nakituk. 3Tolimok Paulo iŋes tema, “Ikibapi kire jik Akuj iyoŋ--iyoŋ ŋolo ikoni arwatata ŋina iwositae eraŋgi ŋolo akwaŋan! Iboi iyoŋ a nen atubokin ayoŋ alotooma Ŋikisila ŋulu ka Akuj, nai tobilite bo iyoŋ Ŋikisila aŋuna ilimokinia ikes akibap ayoŋ!” 4Tolimokis Paulo ŋikilyok ŋulu edunyito temasi, “Ikokini iyoŋ iyanyi Esacaradoti ŋolo Apolon nooi ŋolo ka Akuj ai?” 5Toboŋok Paulo tema, “Pa ayeni ayoŋ ŋikaitotoi atemar erae iŋes Esacaradoti ŋolo Apolon nooi. Kire ayeni atemar ebasi Ŋakigireta ebe, ‘Nyitemokino iyoŋ kirwor ŋuna aronok neni ke ekepukan a ŋituŋa kon.’ ”
6Nai ani eanyuni Paulo atemar arae ŋice a nen Ŋisadukayon ka ŋice arae Ŋiparisayon, kiworou neni ka Atukot tema, “Ŋikaitotoi kaŋ! Arae ayoŋ Eparisayot, lokoku a Ŋiparisayon. Ekesitakinitae ayoŋ a ne, anerae egeno ayoŋ atemar eyarunete ŋikatwak!”
7Ani kedau iŋes alimun ŋun, togeut Ŋisadukayon ka Ŋiparisayon ebura, ido totyaka Atukot. 8(Anerae ebasi Ŋisadukayon nyeyarunete ŋituŋa alokatwak ka daŋ emameete ŋimalaikan kori ŋitai; nai enupito Ŋiparisayon ŋakiro nu daadaŋ.) 9Kiyatakin ecelet, tonyout Ŋiketatamak a Ŋikisila ŋice ŋulu arae Ŋiparisayon, kitepega Atukot ka agogoŋu nooi temasi, “Emam ibore ikiryamu isua esecit ekile lo! Acepaki kirworit etau kori emalaika neni keŋ kire!”
10Topoloor apega nooi, tobul ekapolon a ŋisigarya totamak atemar enyilinyilaarete ikes Paulo. Aŋun, tolimok iŋes ŋisigarya keŋ alosit nen arikor Paulo aneni kec yaasi lolain.
11Ani nakwaare, towo Ekapolon Yesu alodiyete Paulo, tolimok iŋes tema, “Toen etau! Idau iyoŋ akisuuda ŋakiro kaŋ a ne alo Yerusalem ka itemokino kitiya ikwaŋinapei alo Roma daŋ.”
Totukunoe akiar Paulo
12Ani taparacu, kiryamiryama Ŋiyudayan ŋice. Kikoŋo atemar nyikimuji kori nyikimasi idiobore akitodol ŋina earyata Paulo. 13Adeparit ekimar a ŋulu atukunete ŋakiro ŋun ŋatomoniomwon. 14Toloto nai ikes neni a ŋisacaradotin a ŋulu apolok ka ŋikatukok temasi, “Ekoŋi isua kaapei atemar mam akimuj idiobore akitodol ŋina ikiarya Paulo. 15Tokona nai, kiyakiyasi iyes a Natukot akirot neni ke ekapolokiniton ŋisigarya a Roma ayaun Paulo neni kus, esibit icamito iyes akiŋitiŋit iŋes nabo. Nai etenio isua akiar iŋes eriŋa nyedoluno ne.”
16Nai kiira lokoku a nakaato a Paulo ŋuna apotu ikes totukut; aŋun, abu tolot tooma lolain, tolimok Paulo. 17Tonyara nai Paulo ekapolokiniton ŋisigarya amiat, tolimok tema, “Ya esorokit lo neni ke ekapolon a ŋisigarya; eyakar iŋes ŋakiro ŋadi ŋunalimokina iŋes.” 18Ya nai ekapolokiniton ŋol esorokit neni ke ekapolon a ŋisigarya tolimok tema, “Abu Paulo ŋolo erae emabus okonyar ayoŋ ekeŋitak ayaun esorokit lo neni kon, anerae eyakar iŋes ŋakiro ŋadi ŋuna limokina iyoŋ.” 19Kikamu ekapolon a ŋisigarya akan ke esorokit, toriko iŋes nawae, kiŋit tema, “Anukiro iyakar iyoŋ ŋuna icamit alimokin ayoŋ?” 20Tema iŋes, “Acamunosi ŋikepukak ŋulu a Ŋiyudayan akiŋitakin iyoŋ ayaun Paulo Natukot kec moi taparacu, esibit ecamit Atukot akiŋitiŋit iŋes nabo. 21Nai nyipupok ŋakiro kec, anerae eyakasi ŋikilyok alokidiŋ kec ŋulu edeparit ekimar kec ŋatomoniomwon, ŋulu edapunete iŋes. Adaut ikes akikoŋ atemar nyikimuji kori nyikimasi akitodol ŋina earyata Paulo. Etenito tokona ikes akitiyakin ŋun ka idarito ŋuna iboŋokini iyoŋ.”
22Kitolot nai ekapolon a ŋisigarya esorokit ŋol, tolimok tema, “Nyilimok idiotuŋanan atemar ikilimok iyoŋ ayoŋ ŋakiro nu.”
Kiyakiyarae Paulo neni ke ekepukan a ŋolo anyaritae Pelekis
23Tonyara nai ekapolon a ŋisigarya ŋikapolokinitok ŋulu a ŋisigarya keŋ ŋiarei, tolimok ikes tema, “Kitemokisi ŋisigarya ŋamiae ŋaarei alosit Kaisaria kaapei ka ŋikilyok ŋatomonikanikaarei ŋulu a ŋaŋolei ta ŋamiae ŋaarei ŋulu a ŋakwaaras, totena arotokin ŋisaae ŋiuni ŋulu takae ka akuwar. 24Toryamutu ŋaŋolei ŋadi ŋuna edoki Paulo ka kitodolo iŋes ejok neni a Pelekis ke ekepukan.” 25Kigir nai ekapolon a ŋisigarya abaruwa ŋina egiritae ŋakiro nu:
26“Ayoŋ Klauda Lisia egirit neni ke ekapolon Pelekis a ŋolo ipukat Palestina daadaŋ. Ekemalat iyoŋ.
27“Apotu Ŋiyudayan kikamut ekile lo ka adikino earete iŋes. Abu ayoŋ oyenu atemar erae iŋes ituŋanan ŋini a Roma; aŋun, ikipotu ayoŋ ka ŋisigarya kaŋ oloto aiun iŋes. 28Aŋuna acamitor ayoŋ ayenun ŋuna esitakinitotor ikes iŋes, abu oya iŋes Natukot kec. 29Oryamu atemar emam ibore ŋini kebu iŋes kitiya ŋini etemokino toarere kori kiwuakinere iŋes mabus. Arae ŋakiro ŋuna esitakinitere iŋes ŋuna a ŋikisila kec a ŋilopeyek. 30Ani akalimokinio ayoŋ atemar atukosi Ŋiyudayan ŋice aŋuna keŋ, abu eyaku iŋes neni kon atipei, olimok ŋikesitakinak keŋ akirwor alokiŋaren kon ŋakiro ŋuna isitakinitotor ikes iŋes.”
31Apotu ŋisigarya kitiyata ŋuna ecikakinitae. Yaasi ikes Paulo nakwaare neni anyaritae Antipatiris. 32Ani akoloŋit ŋina atupakini, toboŋosi ŋisigarya ŋulu alosete a ŋakejen lolain, kimyekis ŋulu a ŋaŋolei eriŋa elosete ka iŋes. 33Ani edolete ikes Kaisaria neni eboiyo ekepukan Pelekis, kipotokis abaruwa neni keŋ, kimyekis Paulo daŋ aneni keŋ. 34Ani kedau Pelekis akisyom abaruwa, kiŋit iŋes Paulo akwap keŋ. Ani eyenuni atemar abunit iŋes alo Cilicia, 35tema, “Apupokini ayoŋ ŋakiro kon apaki ŋina edolunioto ŋikesitakinak kon.” Kicikak nai atemar kiyokoi Paulo alokai a ŋina koloŋ aduki erwosit Erode.
Currently Selected:
Ŋitic. 23: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
