Ŋitic. 25
25
Kiŋitak Paulo ayaaro neni ke ekepukan a Roma
1Ŋirwa ŋiuni kedau Pesto alomar napukan keŋ, abu tolot alo Kaisaria tari Yerusalem. 2Kisitakis ŋisacaradotin ŋulu apolok ka ŋikarikok a Ŋiyudayan Paulo alokiŋaren keŋ. Todyeka ikes Pesto 3akitiya ŋuna etalakarito ikes, acamakin Paulo yaunae Yerusalem. Aris ikes ketukut akiar iŋes alorot. 4Toboŋok Pesto ikes tema, “Erubakini Paulo eenen alo Kaisaria ka eapi ayoŋ aboŋor inaa. 5Aŋun, kimyekisi ŋikarikok kus orukosi ka ayoŋ Kaisaria, kisitakis ekile ŋol erae kitiyat adioronis.”
6Kedau Pesto akiboi ka ikes ŋirwa ŋulu pa adeparito ŋikanikauni kori ŋitomon, toboŋo nai Kaisaria. Ani akoloŋit ŋina atupakini, kiboikin neni etubonokinere, tolimu atemar yaunae Paulo. 7Ani kedolu Paulo, towua Ŋiyudayan ŋulu apote alo Yerusalem kirikaut Paulo alokaku, kisyakis akisitanakin iŋes neni aronon a ŋakiro a ŋuna pa apedorete ikes akitoodiun atemar arae kire. 8Kirwor Paulo aŋuna keŋ tema, “Emam ibore ŋini aronon ŋini etiyak ayoŋ Lokisila a Ŋiyudayan kori Kai ka Akuj kori lokepukan a Roma.”
9Nai aŋuna acamitor Pesto akitiya ŋuna etalakarito Ŋiyudayan, kiŋit iŋes Paulo tema, “Icamit iyoŋ alosit Yerusalem ikitowuoi aina alokiŋaren kaŋ aŋuna a ŋakisitakineta a nu a?”
10Nai tolimu Paulo tema, “Awoi ayoŋ a ne alokiŋaren ŋikatubok ŋulu etubonokinete alokiro a ŋolo ke ekepukan a Roma, neni itemokino ayoŋ eketowoere. Emam aronis etiyak ayoŋ neni a Ŋiyudayan, ikwapei iyenia iyoŋ elope. 11Ani nai ketiyat ayoŋ ŋuna aronok, ŋuna itemokino otwania, nyewarit ayoŋ abucar anatwanare. Nai ani pa kiyookino ŋakiro ŋuna ekesitakinitotor ikes ayoŋ, emam ituŋanan epedori akipotokin ayoŋ neni kec. Eŋita ayoŋ ayaaro neni ke ekepukan a Roma.”
12Tosodi nai Pesto kedaut akirworikin ka atukot keŋ, tolimok Paulo tema, “Iŋitak iyoŋ alosit neni ke ekepukan a Roma; aŋun, ilosi iyoŋ neni ke ekepukan a Roma.”
Paulo alokiŋaren Agripa ka Berenike
13Kelunyar ŋirwa ŋice, torukut erwosit Agripa ka nakaato keŋ Berenike, potu Kaisaria akijaun Pesto. 14Ani kiboiyoto ikes aina ŋirwa ŋulu alalak, kitatamik Pesto neni ke erwosit ŋakiro a Paulo tema, “Eyai nege mabus ekile ŋolo aesikini Pelekis ŋolo paaran arae ekepukan 15ka ani apaki ŋina ayakar Yerusalem, apotu ŋisacaradotin ŋulu apolok ka ŋikatukok a Ŋiyudayan yaut ŋakiro ŋuna esitakinitotor iŋes, ekeŋitakis ayoŋ atubokin iŋes. 16Nai abu ayoŋ olimok ikes atemar nyecamit ekisil a Ŋiromanin akipotor idiotuŋanan, eriŋa ŋolo isitakinitae nyiryamuna ka ŋulu isitakinito iŋes, toyakaunor apaki ŋina irworor iŋes aŋuna keŋ anakiro a ŋuna isitakinitere iŋes. 17Ani apaki ŋina aponiata ikes ne, abu ayoŋ nyadidik, nai abu akoloŋit ŋina atupakini, abu eboikin neni etubonokinere, olimu atemar yaunae ekile ŋol. 18Ani enyounete ŋulu esitakinito iŋes, nyelimut ikes idiobore ŋini aronon, ŋini sek atamakinit ayoŋ atemar kori isitakiniata. 19Nai ayakatar ikes ŋakiro ŋace ŋuna a ŋiburasyo kec ka iŋes, ŋuna a ŋitalyo a ŋulu enupito ikes ka nabo ŋakiro ŋuna ke ekile a ŋolo enyaritae Yesu, ŋolo abu totwana; nai ebala Paulo itogogoŋit eyari. 20Aŋuna abunio ayoŋ otaaŋaŋaa, todaun epite ŋolo ripunet erot a ŋakiro a nu, abu ayoŋ eŋit Paulo erae kecamit alosit Yerusalem, kitowuae aina aŋuna a ŋakiro a ŋun. 21Nai abu Paulo kiŋitak akiboi a ne alomabus akidar alosit akiwo alokiŋaren ekepukan a Roma. Aŋun, abu ayoŋ olimu atemar kiboi iŋes akitodol neni eyakiyaria ayoŋ iŋes neni ke ekepukan a Roma.”
22Tema Agripa neni a Pesto, “Acamit ayoŋ elope opupok ŋakiro ke ekile a lo.” Tema Pesto, “Ipupokini iyoŋ ŋakiro keŋ moi taparacu.”
23Ani nai taparacu, potu Agripa ka Berenike esirito ka itopolooritae nooi. Arukito ikes ka ŋikapolok a ŋajorei ka ŋarwonita ŋuna ke etaun, tolomasi kai ŋina apolon. Tolimu Pesto atemar yaunae Paulo tooma. 24Tema Pesto, “Erwosit Agripa ka ŋipeyok daadaŋ ŋulu iyakasi ne ka isua: iteete iyes ekile lo ŋolo isitakinito Ŋiyudayan daadaŋ ŋulu a ne ka ŋulu alo Yerusalem. Iworoete ikes ebasi nyitemokino iŋes torubak eyari. 25Nai abu ayoŋ oryamu atemar emam ŋakiro itiyat iŋes ŋuna itemokino totubokinere iŋes atwanare. Ikwaŋinapei abunio iŋes elope kiŋitak alosit neni ke ekepukan a Roma, atyaku ayoŋ akiyakiyar iŋes. 26Nai akaŋopikis ayoŋ ŋakiro ŋuna erae ŋakigirakina neni ke ekepukan a Roma aŋuna keŋ. Aŋun, ayau ayoŋ iŋes ne kiŋaren kus, akilo nooi kiŋaren kon erwosit Agripa, ikotere ani kikidau iwon aripirip ŋakiro keŋ, opedo ayoŋ aryamun ŋakiro ŋuna kigirakina iŋes. 27Anerae esibit aneni kaŋ nyejok akiyakiyar emabus pa isileereunitoe ejok ŋakiro ŋuna isitakinitere iŋes.”
Currently Selected:
Ŋitic. 25: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
