Ephesians 5

1Wak̇aƞṫaƞka ċiƞċa uƞṡiwiċakila ki he, niƞṡʹeya iyeċel igluhayo. Wak̇aƞṫaƞka Ihaniktapi na uƞṡinilapi ki heuƞ niṡeya eċel iwaƞyaƞg eċanuƞpi kte. 2Waċaƞte ognakapi ki he ognayaƞ uƞkʹuƞpi kte. Christ teuƞḣilapi na iye iċ'iċ'u ki he Wak̇aƞṫaƞka iyokipi. 3Wak̇aƞṫaƞka ṫaoyate heniċapi ki heuƞ tuweni ainiyapi kte ki he heċetu ṡni, taku owoṫaƞla ṡni na wayuhapi kte ḣci uƞ ainiyapi ki he heċetu ṡni yo. 4Witkotkogya, na woiye ṡikṡiċe ki hena uƞpi ṡni yo. Eeyaṡ wopila ṫaƞka luha ki he oglakayo. 5Wowaċiƞ, na wowiṡteċe naiƞṡ taku owoṫaƞla ṡni ki hena, taku wakaġapi wak̇aƞwiċalapi ki he iyeċeċa. Oyate eya leċel uƞpi ki hena tohiƞniya Wak̇aƞṫaƞka ena Christ ṫawokiċuƞze ki he el oṗapi kte ṡni. 6Tuwa witkoya woglake ki he anaġoptaƞ ṡni yo. He nignayaƞ waċiƞ ktelo. Lena heċel uƞpi ki uƞ Wak̇aƞṫaƞka iyoṗewiċayiƞ ktelo. 7Heċel uƞpi ki hetaƞhaƞ igluḣlaya po. 8Ehaƞni haƞhepi oiyokpaza ki he iyeċel el yauƞpi tk̇a, Eyaṡ waƞna Wak̇aƞṫaƞka waables niċiyapi uƞ niṫawaċiƞpi ki aiyonijaƞjaƞpi. Heuƞ he iyeċel yauƞpi kte 9Le oyate ki ṫawaċiƞ iyoyambwiċayapi ki uƞ taku waṡte na heċetu ki hena iċuƞpi kte 10Wak̇aƞṫaƞka taku iyokipi ki hena uƞkolepi na eċuƞkʹuƞpi kte. 11Taku eya heċetu ṡni na naḣma waeċuƞpi ki hena etan iḣayab igluzayo. Eṡey'aṡ hena heċetu ṡni ki he ableswiċakiyab iyuṫapo. 12Taku waanaḣmaya waeċuƞpi kin hena waḣte ṡniya iwoglakapi ki ikipi ṡni. 13Ṫawaċiƞ iyoyambwiċayapi haƞtaƞhaƞṡ, taku heċetu ṡni ki hena aṫaiƞ kte. 14woiyoyaƞpa ki he taku ki iyuha yuaṫaiƞ, tuwe waƞ leċel eya keyapi, "Waƞa kiktayo, tukṡa tohaƞl niṫ'e ki hehaƞl heċel yaḣpayahiƞ ktelo, heċel Christ ṫawaċiƞ niyublihelniyiƞ ktelo." 15Oyate taƞyaƞ wiyukcaƞpi ki he iyeċel opiiċ'iyiƞ na witkoya uƞ ṡniyo. 16Aƞpetu iyohi yaƞni iċuhaƞ taku iyuha taƞyaƞ iċuƞwo. 17Waċiƞṫuƞ ṡniya wiyukcaƞ ṡni yo. Eċaƞleṡ, Wak̇aƞṫaƞka ouƞye ki he ogna uƞ waċiƞ yo. 18Mni ṡiċa [wak̇aƞ]un itomniiċ'iye ṡni na ihaƞg iċ'iye ṡni yo, eyaṡ Woniya Wak̇aƞ ki uƞ okaḣtaƞ iċ'iyayo. 19Tohaƞl mniċiyapi ċaƞna psalms woeye etaƞ uƞ nape yeċiyuzapi na woċekiye olowaƞ etaƞ Wak̇aƞṫaƞka ċaƞte kiċ'uƞya ayeċihiyayapi kte. 20Jesus Christ ċaje ki uƞ ohiƞniya Wak̇aƞṫaƞka taku yuha niċiyapi ki hena wopila eyakiyapi kte. 21Christ luonihaƞpi uƞ tuwe ki iyuha ṫokaheya wiċaluonihaƞpi kte. 22Wihiƞgnaṫuƞ waƞ hiƞgnaku ki ṫokahekiyiƞ na ahoṗa uƞ ki he, iyeċel Wak̇aƞṫaƞka ṫokaheyiƞ kte. 23Wihiƞgnaṫuƞ tiwahe ṫawa ki he hiƞgnaku ki oiṫaƞċaƞ, he iyeċel ok̇lakiċiye wak̇an ki he Christ ṫawa na oiṫaƞċaƞ. 24Wihiƞgnaṫuƞpi ki hena hiƞgnakupi ki paṫokalya wiċayuzapi kte, ok̇olakiċiye wak̇an ki he Christ paṫokal yuzapi ki he iyeċel. 25Wiċaṡa ki he ṫawiċu ki tekiḣila ki he iyeċel Christ ok̇olakiċiye wak̇aƞ ki he tekiḣila uƞ tʹe. 26Ok̇olakiċiye wak̇aƞ ki he ṫaoiye ki uƞ yuwak̇aƞ, mni uƞ yujaja na ohakab yuwak̇aƞ. 27Taku uƞ leċuƞ ki he ok̇olakiċiye wak̇aƞ ki he Christ iye ċa iċ'iċe, heċel taku ki iyuha wak̇aƞya iyaƞkiƞ kte. 28He wiċaṡa ki iƞṡʹeya teiċ'iḣila ki he iyeċel ṫawiċu ki ohiƞniyaƞ tekiḣila kte. Wiċaṡa waƞ taƞyaƞ iċ'iċuwa ki he ṫaiċu ki nakuƞ taƞyaƞ kiċuwa kte. 29Tuweni waḣteiċ'ila ṡni. wiċaṡa ṫaċaƞ ki zaƞni kta uƞ taƞyaƞ wol uƞkiyapi, Christ Ok̇olakiċiye wak̇aƞ ki he iye ċeḣpi ṫawa ki taƞyaƞ awaƞglake ki he iyeċel, 30Iċiƞ uƞkiṡʹeya ṫaċaƞ wowiyaċiƞ ki heuƞtaƞhaƞpi. 31Wowapi wak̇aƞ etaƞ leċel yawapi, "Wiċaṡa waƞji ṫawiċuṫuƞ kta haƞtaƞnaṡ, huƞku na atkuki awiċagluṡtaƞ, na ṫawiċu kiċi owaƞjila kiċiyapi. 32Le wak̇aƞyaƞ woeċuƞ ki he ookaḣniġe ṡiċe, eyaṡ tokel owakaḣniġe ki he Christ ena ok̇olakiċiye wak̇aƞ oṗapi ki hena eċa wic̄ak̇api. 33Heuƞ wiċaṡa waƞ waṡte iċ'ilake ki he iyeċel ṫawiċu ki teḣila kte, na wiƞyaƞ ki he iƞṡʹeya hiƞgnaku ki gluonihaƞ uƞ kte.

Currently Selected:

Ephesians 5: LKTNT20

Highlight

Copy

Compare