Ephesians 6

1Wak̇aƞṫaƞka wiċayalapi ċa nihuƞ ena niyate oiye iwiċayaċupi ki he waṡte, iċiƞ he heċetu. Wooṗe ṫokahe ki he taku waƞ waṡte ċa aik̇oyake ki he leċel owapi, 2"Nihuƞ na niyate ohowiċakilapo, 3Heċel mak̇a akaƞl wiċoni haƞska luhapi kte, nahaƞ oiyokipiya yauƞpi kte." 4Atewiċayapi ki hena ṫawak̇aƞyeja ki iṡikʹċiƞ wiċayakuwapi haƞtaƞnaṡ wiċayuċaƞzekapi ki he heċetu ṡni yelo. Iyeṡ taku wak̇aƞ ki hena ognaya iċaḣwiċayapi ki he waṡte ktelo. 5Wowaṡi niyuhapi ki hena taƞyaƞ anawiċaġoptaƞpo. Christ ċaƞte waṡteya wowaṡi ec̄ayeċiċuƞpi ki he iyeċel wowaṡi waeċakic̄iċuƞpo. 6Tohaƞl waƞniyakapi ċaƞ eċela taƞyaƞ wowaṡi eċanu ki he heċetu ṡni, eṡʹeyaṡ ohiƞniya ṡkiƞċiya Christ wowaṡi ec̄ayeċiċuƞ ki he iyeċel wowaṡi eċanuƞ kte. 7Wak̇aƞṫaƞka yutaƞyaƞkel wowaṡi ec̄ayeċiċuƞ ki he iyeċel, Wowaṡi niyuhapi ki hena iyuṡkiƞya wowaṡi ec̄ayekic̄iċuƞ kte. 8Waokiye [wayaka-slave--prisoner of war]niyuhapi naiƞṡ ṫawaiċ'iya yauƞpi eṡa, taku waṡteṡteya waeċanuƞpi kʹuƞ hena hektakiya el niu kte. 9Wowaṡi ki oiniṫaċaƞpi ki hena, wowaṡi wiċaluhapi ki hena wiċaṡa iyeċel wiċakuwapo. Paġeya wiċakuwapi ṡniyo. Wak̇aƞṫaƞka waƞ wiċayala ki he iƞṡʹeya wiċalapi, na Wak̇aƞṫaƞka tuweni waƞjila iyotaƞla ṡni. 10Ehaƞkela ki he, Wak̇aƞṫaƞka ṫawowaṡʹake ki uƞ waṡʹagniyiƞ kta. 11Wak̇aƞṫaƞka ozuye wok̇oyake eya niċiyuwiyeyaƞ ki hena kiċ'uƞwo, heċel wak̇aƞ ṡiċa ki taku uƞ nignayaƞ iniyuṫe ki hena uƞ naƞniċ'ijiƞ oyakihi kte. 12Wiċaṡa ċa ob uƞkiċizapi ṡni, taku eya ihaƞkeya waṡʹake ki maḣpiya na mak̇a akaƞl wak̇aƞ ṡiċa ṫawokiċuƞze na ṫawowaṡʹake ki hena eċa wiċauƞkizapi. 13Heuƞ ċa Wak̇aƞṫaƞka ozuye wok̇oyake eya niċiyuha ki hena yeċ'uƞ kte. Heċel tohaƞl taku ṡiċe ki hena ayakiṗa kihaƞ lena uƞ oniċ'iya oyakihi kte. Lena taku ki kapta yahiyu, na ohakob waṡʹagya nayajiƞ kte. 14Ohiniyaƞ igluwiƞyeya uƞwo, wowiċake ki he ipiyakakiya uƞwo, na Wak̇aƞṫaƞka taku owoṫaƞlaye kʹuƞ he uƞ awaƞniyaƞkiƞ kte. 15Woṫaiƞ Waṡte olake ki he, haƞpa eya taƞyaƞ niċipi ċa iyokipiya mayani ki he iyeċel, Woṫaiƞ Waṡte ki oyaṫaiƞya omayaniƞ kte. 16Wowiċala ki he wahaċaƞka sʹe ilagkiyayo, wahiƞkpe ileḣleḣya uƞ nikutepi ki hena paḣeyab iyeyaya oyakihi kte. 17Maswaṗoṡtaƞ uƞpi ki he Wak̇aƞṫaƞka taƞyaƞ awaƞniyaƞkin kta ċa slolyaye ki he e, na mila haƞska ki he iƞṡ Wak̇aƞṫaƞka ṫaoiye ki e. 18Ohiƞiyaƞ waċekiya uƞpo, iyotaƞḣci oyate ki wiċakiksuyapo. Woniya Wak̇aƞ ki uƞspeniċiyapi ogna waċekiyapo. Wak̇aƞṫaƞka ṫaoyate ki waċewiċakikċiyapi na waktaya opiiċ'iyapo. 19Waċemiċiċiyapo heċel tohaƞl wowaglaka ċaƞ ik̇okṗe ṡniya Woṫaiƞ Waste wak̇aƞ ki wahokuƞwiċawakiyiƞ kte. 20Wowaṡi ki leuƞ hiyumayapi, na leuƞ ċa kaṡka make. Ċa waċekiyapo heċel taku iwowaglakiƞ kte ki he ċaƞtetʹiƞsʹiċ'iya wowaglakiƞ ktelo. 21-22Tokeṡke wauƞ ki he onaḣ'uƞċiyapi waċiƞ. Heuƞ ċa Tychicus yauƞpi heċiya iyayewaye. He k̇ola waye, nahaƞ Wak̇aƞṫaƞka ṫawowaṡi ki he waƞji. He tukṡa taku ki iyuha oniċiyakapi kte, na nakuƞ iyokipiniyapi kte. 23Ate Wak̇aƞṫaƞka na Iṫaƞċaƞ Jesus Christ niyawaṡtepi kte, wowaṡte na wowiċala iyuha luhapi nuƞwe. 24Tuwe Iṫaƞċaƞ Jesus Christ teyaḣilapi ki hena iyuha Wak̇aƞṫaƞka uƞṡinilapi kte.

Currently Selected:

Ephesians 6: LKTNT20

Highlight

Copy

Compare