1 Timothy 6
6
1Wayaka niyuhapi ki hena anawiċaġoptaƞpi na wiċayuonihaƞpo. Heċel oyate ki Wak̇aƞṫaƞka na he eċiyataƞhaƞ takuni yaṡiċapi okihipi kte ṡni. 2Wayaka niyuhapi ki hena Iṫaċaƞ wiċalapi haƞtaƞṡ wiċayuonihaƞpo. Waƞ, lena iƞṡeya Christ wiċalapi, ċa Christ uƞṡiwiċakila. Heuƞ taƞyaƞ wowaṡi eċayeċiċiuƞpi kte na wowaṡi ki hena taƞyaƞ eċanuƞpi kte. Lena eċa oyate ki uƞspewiċayakiyiƞ na eċel eċuƞ wiċayaṡi kte.
False Teaching and True Wealth - Wouƞspe Heċetu Ṡni na Wowijiċa Eḣċa
3Tuwa takuƞl ṫokca ċa ogna wauƞspewiċakiya haƞtaƞnaṡ Jesus Christ wouƞspe ki he wiċala ṡni. 4Oyate eya heċel wiċalapi ṡni ki hena waḣ'aƞicʹilapi, eyaṡ takuƞni slolyapi ṡni. Ṫawaċiƞ waniċapi sʹe wiyukcaƞpi, na woiye ki hena k̇o uƞ ahoyekiċiyapi. Woanawizi oyableċapi, na waakiniċapi, na wawignupi, na waaiyapi, na waċetʹuƞglapi, na 5Ṡikṡiċaya ahoyekiċiyapi, ṫawaċiƞ iċetupi ṡni sʹe wiyukcaƞpi uƞ wowiċake ki waƞyaƞkapi okihipi ṡni. Lena oyate kihaƞ woċekiye ki he uƞ igluwijc̄api kta keċiƞpi.
6Taku uƞyuhapi ki isam awauƞċiƞpi ṡni haƞtaƞṡ, woċekiye ogna uƞkʹuƞpi ki wiċoni waṡte uƞyuhapi kte. 7Mak̇a akaƞ takuni gluha uƞhipi ṡni yelo! Na takuni gluha uƞkiyayapi kte ṡni yelo! 8Ċa woyute na hayapi heċegla uƞċiƞpi waṡtekelo. 9Huƞḣ isam wijic̄a ċiƞpi hena ṡic̄aya iyaye-icʹiyapi na taƞyela igluṡic̄api. 10Mazaska ec̄ela awaċiƞpi he taku ṡic̄a ota waƞyaƞkapi. Huƞḣ mazaska awaċiƞpi kacʹuƞ waṡteya wowic̄alapi hetaƞ ḣeyab iyayapi na oteḣi ota waƞyaƞkapi na ċaƞte igluṡic̄api.
Fighting a Good Fight for the Faith-Wowiċala Ki He Waṡʹagya Nayeċijiƞ Kte
11Timothy, Wak̇aƞṫaƞka niyuha ki heuƞ taku ṡiċa ki hetaƞhaƞ iḣayab nigluziƞ kte. Wak̇aƞṫaƞka ṫaoiye ki aiyeċel nigluha yaċiƞ ki he waṡte kte. Waċiƞye pic̄a yauƞ kte, wauƞṡiyala kte, waċiƞniyapi, na waḣwayela yauƞ kte. 12Wowiċala ki le sutaya nayeċijiƞ kte na wiċoni owihaƞke waƞil wowic̄ala ki he ṫawa niglawa kte. Wak̇aƞṫaƞka wiċoḣ'aƞ ki le niċ'u ki he oyaglake na oyate ota naniḣ'uƞpi. 13Wak̇aƞṫaƞka ċeyakiye ec̄uƞhaƞ leċel niċ'ic̄uƞziƞ kte, na Christ Jesus nakuƞ naniḣ'uƞ eċuƞhaƞ, woiċ'iċuƞze waƞji yeċaġiƞ kte, he iƞṡeya Pontius Pilate iṫokabya ṫawowiċala ki oglake, lena eċuƞċiṡi. 14Wowiċ'iċuƞze ki le na taku waƞ eċuƞniṡipi ki he, Jesus Christ gli ṡni ki hehaƞya ohiƞniya paṫokabya yagluziƞ kte.
[ Verse markers need adjustment 13-14]
15Wak̇aƞṫaƞka oṫaƞṫuƞke ki he
iṡnala Iṫacaƞ,
Wiċaṡa-yataƞpi eḣċa ki he e,
na Iṫaċaƞpi ki eḣċa ki nakuƞ he e.
Wak̇aƞṫaƞka aƞpetu waƞ
kaḣniḣ ekigle,
he el Jesus Christ
ake hiyuyiƞ kte.
16Wak̇aƞṫaƞka eċela owihaƞke wanilya niuƞ!
Na ṫouƞ ki he wak̇aƞ
ċa tuweni ik̇aƞyela u okihi ṡni.
Ikċewiċaṡa waƞjini tohiƞniya Wak̇aƞṫaƞka waƞyaƞke ṡni
na tohiƞniya wanyaƞka okihi ṡni.
Wak̇aƞṫaƞka yuonihaƞpi kte,
na woyuonihaƞ na wowaṡʹake ki hena ṫawa!
Ho heċetuwelo.
17Mak̇a wowijiċa ki oyate eya el uƞpi ki hena iwaktawiċayayo, mak̇a akaƞl wijiliċ'iyapi na itaƞpi ki hena taku iyuha tok̇aṡniyaƞ gnuƞnipi okihipi. Wak̇aƞṫaƞka wiċalawiċaṡiyo, wowijiċe ki hena ṫawa na taku uƞkikaġipi ki hena uƞkʹupi kte heċel wiċoni le el iyuṡkiƞya uƞkʹuƞpi kte. 18Taku waṡte eċuƞpiċa ki hena ecuƞ wiċayaṡi kte, na uƞṡikapi ki hena owiċakiyapi kte. Wijiċapi ki hena ċaƞtewaṡteya ṫawoyuhapi ki hena yunayekiyapi kte. 19Heċel oagle akaƞl wakaġapi ki he ṫokata waṡagya hiƞ kte, heċel mak̇a akaƞl wiċoni eċuƞhaƞ taku waƞ waṡte eḣċa ki he slolyapi kte.
20Timothy, Wak̇aƞṫaƞka taku waƞ napiyuzniċiye ki he taƞyaƞ awayaƞkayo! Taku eya waċiƞṫuƞṡniya iwoglakapi ki hena anaġoptaƞṡniyo, hena onaḣ'uƞ waṡte sʹeleċeċa eyaṡ hena heċetu ṡni. 21Oyate eya huƞḣ leċel anwiċaġoptaƞpi na wowiċala gnunipi.
Wak̇aƞṫaƞka uƞṡinilapi nuƞwe.
Currently Selected:
1 Timothy 6: LKTNT20
Highlight
Copy
Compare
Share
Want to have your highlights saved across all your devices? Sign up or sign in
© American Bible Society
