2 Thessalonians 1
1
1Le wowapi ki, Paul ena, Silas ena, Timothy etaƞhaƞ. Thessalonica oṫuƞwahe el Ok̇olakiċiye Wak̇aƞ ki, hena Wak̇aƞṫaƞka, ena Iṫaƞċaƞ Jesus Christ, ṫaoyatepi ki epi. 2Wak̇aƞṫaƞka Ateyapi ki, ena Iṫaƞċaƞ Jesus Christ uƞṡinilapi kta na niyawaṡtepi kta ċewakiye! 3Mitakuyepi, uƞniksuyapi ċaƞ Wak̇aƞṫaƞka wopila uƞkekiyapi, eċiƞ Wak̇aƞṫaƞka wiċayalapi uƞ saƞmṗaya waṡʹagniċ'iyapi na uƞṡiyeċilapi. 4Woteḣika ohaƞ yauƞpi na iyotiyeyakiyapi eyaṡ iƞniyaṡni wowiċala gluha waċiƞṫaƞgya yauƞpi ki heuƞ ċa Ok̇olakiċiye Wak̇aƞ ki el uƞniyataƞpi. 5Wak̇aƞṫaƞka taku ki hena eċiyataƞhaƞ, taku ki iyuha taƞyaƞ eċuƞ ki he uƞkablezapi. Na He ṫawokiċuƞze waƞ u kte ki he el yauƞpi kta inċipipi uƞ iyotiyeyakiyapi. 6Tuwa taku iċiḣmeya ikuṡeniyapi haƞtaƞaṡ iƞṡʹeya iyotiyeyekiyewiċakiyiƞ kte, 7eyaṡ iyotiyeyakiyapi hetaƞhaƞ asnikiyeniċiyapi kte. Iṫaƞċaƞ Jesus maḣpiya eċiyataƞhaƞ, ogligle wak̇aƞ kʹeya iṫoṗepiċapi ċa ob ku kihaƞ Wak̇aƞṫaƞka uƞkiṡʹeya iyeċel eċauƞkiċiċuƞpi kte, 8ṗeta waƞ ileḣya uƞ. Iṫaƞċaƞ Jesus tuwe Wak̇aƞṫaƞka slolyapi ṡni na Woṫaƞiƞ Waṡte ki anaġoptaƞpi ṡni kʹuƞ hena wiċakaṡta kiƞ kte. 9Etaƞ iyoṗewiċaye ki hena owihaƞke wanilya uƞ ihaƞgwiċayiƞ kte, na hena Iṫaƞċaƞ Jesus ṫawowitaƞ waƞ iṫuƞṗepi ċa ki hetaƞhan ḣayab owiċayuspapi kte. 10Aƞpetu waƞ el Iṫaƞċaƞ gli kihaƞ etaƞ wiċalapi kʹuƞ hena iyuha yuonihaƞpi kte. Le niṡʹeya oyaṗapi kte, iċiƞ Woṫaƞiƞ Waṡte waƞ uƞkoniċiyakapi ki he wiċayalapi ki heuƞ. 11Wak̇aƞṫaƞka niċaḣniġe ki heuƞ hoye uƞkiyapi ċaƞ uƞniksuyapi, heċel ṫaoyate ki tokel igluhapi kte kʹuƞ he iyeċel taƞyaƞ nigluhapi kte. Wak̇aƞṫaƞka ṫawowaṡʹake ki uƞ taku waṡteṡte eya eċanu yaċiƞ kʹuƞ hena niṫawowiċala ki uƞ iyoḣlogya yagluṡtaƞ kte. 12Heċel Wak̇aƞṫaƞka ṫawowauƞṡila ki he uƞ, Jesus Christ Iṫaƞċaƞuƞyapi ki he niyepi uƞ ċaje ki yuonihaƞpi kte, na niṡʹeya niyuonihaƞpi kte lo.
Currently Selected:
2 Thessalonians 1: LKTNT20
Highlight
Copy
Compare
Share
Want to have your highlights saved across all your devices? Sign up or sign in
© American Bible Society