1 Thessalonians 2
2
1Mitakuyepi, taku uƞ waƞniyaƞg uƞhipi ki he taku ki iyuha taƞyaƞ iyeċel iyaye. 2Hektakiya yeksuyapi ki, Philippi oṫuƞwahe el ṫokahe uƞhipi waƞhehaƞ oyate ota iṡtel uƞyaƞpi ċiƞpi na ṡiċaya uƞkuwapi. Eyaṡ Wak̇aƞṫaƞka, Woṫaƞiƞ Waṡte ki uƞkoniċiyakapi ċiƞ uƞ bliheluƞyapi. 3Waƞniyaƞg uƞhipi waƞ hehaƞ taku lena ċaƞtekiċ'uƞya ayablezapi kta uƞ wahokuƞ uƞniċiyapi na ċaƞte mahel takuƞni anaḣmeya wouƞglakapi ṡni. 4Wak̇aƞṫaƞka Woṫaƞiƞ Waṡte ki taƞyaƞ uƞkoyakapi kta uƞ heċel iwaċiƞuƞyaƞpi. Woglag wauƞyupikapi uƞ oyate ki ṫawaċiƞ ohiwiċauƞyapi kte ki he e ṡni, tk̇a Wak̇aƞṫaƞka eċa iyokipi uƞyapi kta uƞ heċuƞkʹuƞpi. 5Na oyate ki wiċauƞyaitepi ṡni. Taku waƞ eċuƞuƞkʹuƞpi ki he wiṡi uƞ ṡni, naƞiƞṡ naḣmaya waeċuƞkʹuƞpi ṡni ki he Wak̇aƞṫaƞka slolye. 6Uƞyaonihaƞpi kta uƞ iwaċiƞ uƞniyaƞpi ṡni. 7Eyaṡ wahoṡiya heuƞċapi uƞ waċiƞuƞniyaƞpi uƞkohipi tk̇a. Eċiƞ Christ eċa hiyuuƞyaƞpi. Eyaṡ e wak̇aƞyeja sʹe niohaƞ uƞkʹuƞpi, naƞiƞṡ wiƞyaƞ ċa hokṡi awaƞwiċaglake sʹe uƞkʹuƞpi. 8Woṫaƞiƞ Waṡte ki uƞniċahipi waƞhehaƞ ċaƞteuƞkonignakapi ki uƞ wiċoni euƞkignakapi uƞkokihipi tk̇a. 9Mitakuyepi, teḣiya wowaṡi eċuƞkʹuƞpi na woteḣi ohaƞ uƞkʹuƞpi waƞ hena yeksuyapi ṡni hwo? Woṫaƞiƞ Waṡte ki uƞkoyakapi kta uƞ haƞhepi na aƞpetu iyagleya wowaṡi eċuƞkʹuƞpi, na tuweni naġiyeuƞyaƞpi uƞċiƞpi ṡni uƞ heċuƞkʹuƞpi. 10Taku waṡte na heċetu kʹeya eċuƞkʹuƞpi waƞhena waayaṫaƞiƞ uƞniyuhapi, na Wak̇aƞṫanka wiċayalapi ki hena taƞyaƞ kiċaƞwiċauƞyaƞpi ki he Wak̇aƞṫaƞka slolye. 11Wak̇ayeja ki [huƞkake] [huƞku na atkuku] taƞyaƞ wiċakiċuwapi ki he iyeċel uƞkoniċuwapi. 12Wiċoni niṫawa ki uƞ tokel Wak̇aƞṫaƞka luonihaƞ kte he ognayaƞ blihel uƞniyaƞpi kte ḣc̄iƞ, na he ognayaƞ wahokuƞ uƞniċiyapi. Wak̇aƞṫaƞka ṫawokiċunze na ṫawowitaƞ ki hena iyoniwaja kta niċaḣniġe. 13Woṫaƞiƞ Waṡte ki uƞ wahokuƞ uƞniċiyapi waƞ hehaƞ wiċayalapi. Wowiċala ki he ikc̄e wiċaṡa ċa iyukc̄aƞ ṡni tk̇a, he Wak̇aƞṫaƞka etaƞhaƞ u ċa wiċayalapi, na waƞna wiċoni niṫawa ki he wilagye. 14Mitakuyepi, Judea mak̇oċe el ok̇olakiċiye wak̇aƞ ki tokel wiċakuwapi waƞ he iyeċel niƞṡʹeya niċuwapi. Niṫaoyate ki egna teḣiya niċuwapi ki he iyeċel iƞṡʹeya heċel wiċakuwapi. 15Oyate eya wiċaṡaṡnipi ċa Iṫaƞċaƞ Jesus ena wiċaṡa wak̇aƞ waayaṫaƞiƞ ki hena wiċaktepi, hena uƞkiṡʹeya kuwa iyauƞyapi. Wak̇aƞṫaƞka taku waeċuƞpi ki hena iyokipi ṡni na tuwe ki iyuha nakuƞ heċetulapi ṡni. 16Oyate ṫokṫokċapi ki hena Woṫaƞiƞ Waṡte ki owiċauƞkoyakapi ki wookiye iċupi kte, heuƞ hektakiya uƞkoyuspapi. Ohiƞniya wowaḣtaƞni gluha isaƞmiċ'iyapi. Heuƞ waƞna Wak̇anṫaƞka wowauƞṡila ki ekignakiƞ na kiċaƞwiċayiƞ ktelo. 17Mitakuyepi, waƞyaƞguƞniupi uƞċiƞpi eyaṡ hektakiya uƞkoyuspapi, eyaṡ ohiƞniyaƞ ċaƞteuƞkonignakapi. Wauƞniyaƞkapi uƞċiƞpi na waƞyaƞguƞniupi kta uƞkiyuṫapi. 18Uƞkupikta uƞċiƞpi. Miyeċuḣc̄i tona kigle u ibluṫe, eyaṡ wak̇aƞṡiċa ki ohiƞniya kuṡʹeyauƞṫuƞpi. 19Ehaƞke ekta, Iṫaƞċaƞ Jesus ṫaƞiƞyaƞ uki, tuwe ċa wowitaƞ wateṡlaka ki he uƞkʹuƞkiyapi kta hwo? Niyepi ċa uƞ lena heċetu ktelo. 20Wowitaƞ, na wowiyuṡkiƞ ki hena niyepelo.
Currently Selected:
1 Thessalonians 2: LKTNT20
Highlight
Copy
Compare
Share
Want to have your highlights saved across all your devices? Sign up or sign in
© American Bible Society
