Roma 13
13
1Wicanagi otoiyohi wicowaśake itancan kin hena ihukun iyeic̣iye kte. Wicowośake Wakantanka etanhan un kin hecedan yukan. Wicowaśake un kin hena Wakantanka kaga.
2Heon etanhan tuwe wicowaśake kin kipajin kinhan he Wakantanka toope kin kipajin, qa tona wawakipajin kin hena wicayacopi kta.
3Wicaśtayatapi kin hena wicoḣan waśte kin en wakokipe wicakicagapi śni, tuka wicoḣan śice cin en. Hecen wicowaśake kin he koyakipe kte śni he. Taku waśte e econ wo, kinhan on niyatanpi kta ce.
4He taku waśte on niye ekta Wakantanka taokiye kin hee. Tuka taku śica ecanon kinhan kokipa wo. He mazasagye ituḣ yuhe śni; tuka Wakantanka taokiye kin heca, tuwe taku śica econ kinhan tokic̣on kta, wocanniye kin heon.
5Heon etanhan anagoptan yaunpi kta, wocanniye kin hecedan on etanhan śni, tuka nakun wiyukcanpi kin heon.
6Heon etanhan mazaska mnakiyapi kin en oyapapi ece: hena e Wakantanka taokiyepi kin ohinniyan taku kin de econ yukanpi.
7Heon etanhan, owasin taku token wicaqupi kta iyecece cin wicaqu po: Tona iye taoyate kin etanhan mazaska mnayanpi kin he ecen wicaqu po; qa tona oyate tokeca etanhan mnayanpi kin he nakun ecen wicaqu po. Tona kinihanpi kte cin hena wicakinihan po, qa tona yuonihanpi kte cin hena wicayuonihan po.
8Tuwedan takudan ikicazo śni un po, otoiyohi waśte yecidakapi kte cin hecedan. Tuwe wicaśta tokeca waśte wicadake cin he woahope kin tanyan yuha.
9He decetu; Wawiciḣaḣapi ecanon kte śni; Tin wicayakte kte śni; Wamayanon kte śni; Tuwedan en oitonśniyan wodake kte śni; Taku tokan tawapi kin yacin kte śni; qa woahope tokeca yuke cinhan wicoie kin de en yuwitayapi; Wicaśta tokeca niye inihdacin waśte yadake kta ce.
10Waśtewicadakapi kin he wicaśta tokeca taku śica takudan ecakicon śni, heon waśtewicadakapi kin he woahope yuecetupi kin hee.
11Qa nakun kaketu, anpetu kin sdonuayanpi, woiśtinma etanhan unkiktapi kte cin wanna iyehantu; nakaha eunhdakupi kte cin tokaheya wicaundapi qon he isanpa ikiyadan ihan;
12Hanyetu kin wanna ecadan unkihunipi kta, anpetu kin kohanna u kta, heon etanhan otpaza wicoḣan kin eḣpeunyanpi, qa iyoyanpa wipe kin kounyakapi kta.
13Qa iyokipiya maunnipi kta, anpetu kin en iyececa. Hanyetu wacipi qa witkopi kin en unkopapi kte śni; wicawihomnipi qa wicinpi, wakinicapi qa winawizipi kin hena en ounpapi kte śni.
14Tuka niye Jesus Messiya Itancan kin he koyaka po, qa wicaceḣpi wocantiheye śice cin ecetu yapi kta e on takudan kicamnanpi śni po.
Currently Selected:
Roma 13: DAKOTANT
Highlight
Share
Compare
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
