Roma 12
12
1Heon mihunkawanji, Wakantanka wacantohnake cin on etanhan eciciyapi ce, nitancanpi kin wośnapi ni un, wakan, qa taku Wakantanka iyokipi kin, hena hecen yaqupi kta, he wawoyakiyapi kte cin hecetu ḣinca.
2Qa wicoicage kin de en iyecen awacanipi kteśni, tuka nitawacinpi yuecepidan kte cin on nihdutokecapi nunwe; hecen Wakantanka tawacin waśte, oiyokipi, qa hduśtanpi kin he tukte e idukcanpi kta.
3Wowaonśida maqupi kin he eciyatanhan, tona niyepi ekta un kinotoiyohi hecen eciciyapi; Tuwedan token ihdukcan kte cin he isanpa ihdawa kte śni, tuka wacinksamya ihdukcan kta, Wakantanka otoiyohi wacinyanpi iyuta wicaqu kin he eciyatanhan.
4Wicatancan wanjidan en wicahuha ota unhapi, qa huha kin hena owasin okonwanjidan oḣanye śni:
5He iyecen unkiye unkotapi, tuka Messiya eh tancan unwanjipidan, qa otoiyohi huha unkiciyapi.
6Hecen wowaonśida otoiyohi yukinukanyan unqupi kin eciyatanhan wicookihi ociptetu unhapi; he wokcanpi kte cin hee hecinhan, wowacinye iyutapi kin on unkiyukcanpi ece e kta.
7Qa waowicakiyapi kin hee hecinhan, waowicakiyapi kin en unyakonpi kta; qa tuwe waonspekiya okihi kinhan, he waonspekiyapi kin en un kta.
8Tuwe wahokonwicakiye kte cin he wahokonwicakiyapi kin en un kte; tuwe taku wicaqu kte cin he oḣanpiya econ kte; tuwe oyate wicayuhe cinhan he mnihenya econ kta; qa tuwe onśiwicadake cinhan iyokipiya econ kte.
9Wacantkiyapi kin he wohnaye wanin un nunwe. Taku śice cin he śice dakapi, qa taku waśte kin he en iyaihdaśka po.
10Hunkawanjin kiciyapi waśte kicidakapi kin he on otoiyohi cante en kiciyuza po, qa woyuonihan on otoiyohi iyotan kicidaka po.
11Wicoḣtani kin en kujapi śni, woniya on aic̣iciyapi, Itancan kin okiya po.
12Woape en wiyuśkinpi; kakijapi kin en icunhan wacintankapi; qa wocekiye eya yukan po.
13Ton owotanna un kin taku icakijapi kinhan owicakiya po. Wicaśta icimanipi kin oḣanpiya ecawicakicon po.
14Tona śicaya nieuwapi kin hena wicayawaśte po; wayawaśte po, qa wayaśicapi śni po.
15Tona wiyuśkinpi kin hena om wiyuśkin po; qa tona ceyapi kin hena om ceya po.
16Otoiyohi okonwanjidan awakicicin po. Taku wankan un kin hena ekta ewacinpi śni po; tuka tona kun ihdawa kin hena en opa po. Wacinksapeic̣idapi śni po.
17Tuwedan taku śica on itkom śicaya econpi śni po. Wicaśta owasin itokamya taku owotanna ecedan kamnan po.
18Tohanyan oyakihipi kinhan, wicaśta owasin om wookiye yakon po.
19Waśte cicidapi kin, ihnuhan niye cinka watoyec̣onpi kin, tuka wocanniye nakicipa po. Hecen wowapi en kagapi, Tokic̣onpi kin he miye mitawa, wicawecu kta ce, Itancan kin eya.
20Heon tuwe toka niye cin he wotektehda kinhan wo qu wo; qa ipuza kinhan mini qu wo; hecen ecanon kinhan, petaga kin he pa kin en eju ade kta.
21Ihnuhan taku śica on ohiniyanpi kin, tuka taku waśte e on taku śice cin ktepidan po.
Currently Selected:
Roma 12: DAKOTANT
Highlight
Share
Compare
Copy
Want to have your highlights saved across all your devices? Sign up or sign in
© Copyright 2015 American Bible Society. All Rights Reserved.
