Kutyoka 6
6
1Nipele Ambuje Akunnungu ŵansalile che Musa, “Sambano chinyiwone ichinaatende mwenye ni ŵandu ŵakwe. Chinaakanganyichisye kwa machili ŵaalechelele ŵandu ŵangu atyoche. Nombewo chiŵatopole kwa machili atyoche mu chilambo chao.”
Akunnungu akummilanga che Musa
2Nipele Akunnungu ŵaasalile che Musa, “Une ndili Ambuje Akunnungu. 3Une naakopochele che Ibulahimu ni che Isaka ni che Yakubu, namanyiche kuti ndili Akunnungu ŵaali ni Machili, nambo nganinalimanyukusya kukwao kuti liina lyangu lili Ambuje Akunnungu. 4Sooni nalimanyisye lilangano lyangu kwa ŵanyawo lyakwapa chilambo cha Kanaani, chilambo chiŵatamaga mpela achalendo. 5Kupunda yeleyo nakupikene kuwuwula kwao Ŵaisilaeli, ŵaakulagaswa ni Ŵamisili kwakwatendekasya masengo ga ukapolo, noneji nguumbuchile lilangano lyangu. 6Kwayele mwasalile Ŵaisilaeli, ‘Une ndili Ambuje Akunnungu, none chinjatyosya mmakongwa ga Ŵamisili. Une tinaakulupusye mu ukapolo, none tinjiugolosya nkono wangu wauli ni machili ni kwajamuka kwa chikali Ŵamisili ni kummombola mwanya. 7Chinjintenda mme ŵandu ŵangu, ni une chime Akunnungu jwenu. Ni ŵanyamwe chimmanyilile kuti Une ndili Ambuje Akunnungu, Akunnungu jwenu, junammombwele mmasengo ga ukapolo wa Ŵamisili. 8Chinannyichisye ku chilambo chinaalumbilile kwapa che Ibulahimu ni che Isaka ni che Yakubu. Chinampe chilambo cho chiŵe chenu moŵa gose. Une ndili Ambuje Akunnungu.’ ” 9Che Musa ŵaasalile Ŵaisilaeli iŵatite Ambuje Akunnungu, nambo nganiŵapikanila, ligongo lya kupwa mitima kwa masengo gakunonopa.
10Ambuje Akunnungu ŵaŵechete ni che Musa ni kwasalila, 11“Njaule nkansalile mwenye jwa ku Misili kuti, ŵaaleche Ŵaisilaeli atyoche mu chilambo chakwe.” 12Nambo che Musa ŵaasalile Ambuje Akunnungu, “Ŵaisilaeli ngaakumbikanila sooni, mwenye ni chambilikanile une junguŵecheta mbolembole ni jwachimeme?” 13Pelepo Ambuje Akunnungu ŵaŵechete ni che Musa ni che Haluni achitiji, “Ngunnajisya nkaasalile Ŵaisilaeli ni mwenye jwa ku Misili kuti, ‘Nanlajisye mwanya ŵaŵili mwatyosye Ŵaisilaeli ku Misili.’ ”
Meena ga ngosyo sya che Musa ni che Haluni
14Ŵeleŵa ali ilongola ŵa ngosyo syao: Ŵanache ŵa che Lobeni juŵaliji jwakwitiwo mu uŵelesi wa Ŵaisilaeli ŵaliji che Hanoki ni che Palu ni che Hesiloni ni che Kalimi. Lwele luli lukosyo lu che Lobeni. 15Ŵanache ŵachilume ŵa che Simeoni ŵaliji, che Yemueli ni che Yamini ni che Ohadi ni che Yakini ni che Sohali ni che Shauli, mwanache jwa jwankongwe jwa Chikanaani. Ŵelewo ŵaliji ilongola wa lukosyo lu che Simeoni. 16Gelega gali meena ga ŵanache ŵa che Lawi ni uŵelesi wao. Che Geshoni ni che Kohati ni che Melali. Che Lawi ŵatemi yaka mia moja ni selasini na saba. 17Ŵanache ŵachilume ŵa che Geshoni ŵaliji che Libini ni che Shimei. Gelega galiji meena ga lukosyo lwao. 18Ŵanache ŵachilume ŵa che Kohati ŵaliji che Amulamu ni che Isihali ni che Hebuloni ni che Usieli. Yaka iŵatemi che Kohati yaliji yaka mia moja ni selasini na tatu ni ŵawile. 19Ŵanache ŵachilume ŵa che Melali ŵaliji, che Mahili ni che Mushi. Ŵeleŵa ali lukosyo lwa Ŵalawi ni iŵelesi yao.
20Che Amulamu ŵalombile matigwe juŵaŵilanjikwe che Yokebedi. Nombe che Yokebedi ŵaŵeleche che Haluni ni che Musa. Che Amulamu ŵatemi yaka mia moja ni selasini na saba. 21Ni ŵanache ŵachilume ŵa che Ishali ŵaliji che Kola ni che Nefegi ni che Sikili. 22Ŵanache ŵachilume ŵa che Usieli ŵaliji che Mishaeli ni che Elisafani ni che Sitili.
23Che Haluni ŵalombile che Elisheba mwali ju che Aminadabu alumbu ŵao che Nashoni. Nombejo ŵaaŵelechele che Haluni che Nadabu ni che Abihu ni che Eleasali ni che Isamali. 24Ŵanache ŵachilume ŵa che Kola ali che Asili ni che Elikana ni che Abiasafu, ŵaŵaliji ilongola ŵa lukosyo lu che Kola. 25Che Eleasali mwana ju che Haluni ŵalombele jumo mwa achiŵali ŵa che Putieli. Nombejo ŵammelechele che Finehasi. Ŵeleŵa ali ilongola ŵa minango ja lukosyo lwa Ŵalawi.
26Che Haluni ni che Musa ni ŵaŵasalilwe ni Ambuje Akunnungu achitiji, “Mwakoposye Ŵaisilaeli mu chilambo cha ku Misili, malinga ni mipingo jao.” 27Ŵawowo ni ŵaŵakungulwiche ni mwenye jwa ku Misili kuti ŵaaleche Ŵaisilaeli atyoche mu chilambo cha Misili.
Ambuje Akunnungu akwalajisya sooni che Musa ni che Haluni
28Pa lyuŵa liŵaŵechete Ambuje Akunnungu ni che Musa ku chilambo cha Misili, 29ŵansalile, “Une ndili Ambuje Akunnungu. Nkansalile mwenye jwa ku Misili yose ingunsalila.” 30Nambo che Musa ŵaajanjile Ambuje Akunnungu, “Alakwejo akumanyilila kuti une nguŵecheta mbolembole ni jwachimeme, mwenye chakaambikanile une?”
Currently Selected:
Kutyoka 6: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
