Kutyoka 5

Che Musa ni Che Haluni mbujo mwa mwenye jwa ku Misili

1Kanyuma, che Musa ni che Haluni ŵanjaulile mwenye ni kunsalila, “Ambuje Akunnungu, Akunnungu jwa Ŵaisilaeli akuti nyi, ‘Mwaleche ŵandu ŵangu ajaule kukundendela chindimba mwipululu.’ ” 2Mwenye ŵatite, “Ana Ambuje Akunnungu wo ali ŵaani kwampaka une napikanile ni kwaleka Ŵaisilaeli ajaule? Une ngangwamanyilila Ambuje Akunnungu wo, atamuno ngangwaleka Ŵaisilaeli ajaule.” 3Che Musa ni che Haluni ŵajanjile, “Akunnungu ŵa Ŵaeblania asimene noweji. Tukunchondelela ntuleche tujaule ulendo wa moŵa gatatu mwipululu tukapeleche mbopesi kwa Ambuje Akunnungu, Akunnungu wetu. Naga ngatutenda yeleyo, chatuulaje kwa ilwele pane kwa ngondo.” 4Nambo mwenye jwa ku Misili ŵajanjile, “Mwanya che Musa ni che Haluni, kwa chichi nkulinga kwalekasya ŵandu masengo gao? Nkaasalile ŵandu aujile mmasengo mwao. 5Ŵandu ŵenu ali achajinji kupunda achinsyene chilambo chi, nkusaka aleche kugapanganya masengo!”

6Lyuŵa lilyolyo mwenye ŵaalamwile achakulu ŵaŵajimililaga achikapolo ŵa Chimisili pamo ni ŵakwimilila ŵa Chiisilaeli achitiji, 7“Ngasimwapa manyasi ga kugumbila matofali mpela imwatendaga. Chajaule achinsyene kukugasosa. 8Nambo winji wa matofali gaakugagumba gaŵeje ilaila mwa moŵa gose. Nkanondiya ata panondi, pakuŵa ŵandu ŵa ali ŵaulesi, kwayele akuunyokonya kuti naaleche ajaule kukwatyochesya mbopesi Akunnungu ŵao. 9Mwajonjechesye masengo gakunonopa, kuti aleche kugapikanila gele maloŵe ga unami.”

10Achakulu ŵakwajimilila achikapolo ŵala ni achakulu ŵao ŵatyosile ni kwasalila ŵandu achitiji, “Mwenye akuti ngasampa sooni manyasi. 11Njaule mwachinsyene nkasose manyasi kwakulikose kwachinkagasimane, nambo winji wa matofali ngaupunguka namose panondi.” 12Nipele, Ŵaisilaeli wose ŵapwilingene mu chilambo chose cha Misili kukugasosa manyasi. 13Achakulu ŵa ŵakwajimilila achikapolo ŵa Chimisili ŵaakanganyichisyaga achitiji, “Ngumbe matofali winji ulaula mpela imwagumbaga katema katwanyichisyaga manyasi.” 14Paŵalepelaga kugumba winji ulaula mpela iŵatiji kugumba kuundanda, achakulu ŵa ŵakwajimilila achikapolo ŵa Chimisili ŵaaputaga ŵakwimilila ŵa Chiisilaeli achaasalilaga, kwa chichi ngankugumba winji wa matofali ulaula mpela imwagumbaga kuundanda?

15Ŵakwimilila ŵa Chiisilaeli ŵanjaulile mwenye ni kundandaulila, achitiji, “Alakwe, ana kwa chichi ntutesile yele uŵeji ŵakutumichila ŵenu? 16Ngatukupegwa manyasi, nambo akutukanganyichisya tugumbe matofali. Nnole, magambo ga gali ga ŵandu ŵenu, nambo tukuputikwa uwe.”

17Nambo mwenye ŵatite, “Ŵaulesi ŵanyamwe, ngankusaka kupanganya masengo! Kwa ligongo lyo nkuti, ‘Ntuleche uŵe tujaule tukaatyochesye mbopesi Ambuje Akunnungu.’ 18Sambano mmuje nkapanganye masengo! Ngampegwa manyasi, nambo chingumbe matofali winji ulaula.” 19Ŵakwimilila ŵa Chiisilaeli ŵalisimene mu masausyo, pakuŵa ŵasalilwe kuti, “Ngampungusya winji wa matofali kwa lyuŵa.”

20Paŵatyosile kwa mwenye, ŵasimene ni che Musa ni che Haluni, ŵaŵaliji nkwalindilila pepala. 21Ŵaasalile che Musa ni che Haluni, “Ambuje Akunnungu alole ni kunlamula mwanyamwe! Pakuŵa ntutendekasisye tununje kwa mwenye ni kwa ŵandu ŵakwe, ni wanyamwe mwapele machili ga kutuulaga uweji.”

Che Musa akwalalatila Ambuje Akunnungu

22Nipele che Musa ŵaaujilile Ambuje Akunnungu ni kwasalila, “Ambuje Akunnungu kwachichi mwatendele yangalumbana ŵandu ŵenu? Kwachichi mundumile une? 23Pakuŵa kutyochela panaajaulile mwenye ni kwasalila imwanajisye nasalile, apundile kwapanganyichisya yangalumbana ŵandu ŵenu. Nombe alakwe ngankwawombola ŵandu ŵenu mu ukapolo!”

Currently Selected:

Kutyoka 5: YBV

Highlight

Copy