Kutyoka 14
14
Ŵaisilaeli akomboka bahali ja Shamu
1Nipele, Ambuje Akunnungu ŵaasalile che Musa, 2“Mwasalile Ŵaisilaeli auje paanyuma ni kutaŵa masakasa paujo pa Pi Hahilosi, pasikati ja musi wa Migidoli ni bahali ja Shamu, mwakulolegana ni Baali Sefoni chiŵandi ni bahali. 3Pelepo mwenye chaganichisye kuti, ‘Ŵaisilaeli akwamba kusyungulasyungula ali asingalilwe nganisyo mu chilambo pemo, nombe chipululu chaasiŵile akakombola kutyoka.’ 4Chinjintenda mwenye aŵe jwa makani, nombejo chiŵakuye. Ŵandu tanjimbichisye une pachinaajonanje mwenye ni ŵa ngondo ŵakwe wose. Pelepo Ŵamisili wose tachimanyilila kuti une ndili Ambuje Akunnungu.” Nipele, Ŵaisilaeli ŵaitesile nti iŵasalilwe.
5Mwenye jwa ku Misili paŵapilikene kuti Ŵaisilaeli atisile, mwenye ni ŵa ŵandu ŵakwe ŵapitikwisye mitima ni ŵatite, “Ana tutesile ichichi? Twalechelele Ŵaisilaeli ajaule akaŵa achikapolo ŵetu sooni!” 6Mwenye jula ŵaŵisile chile mutuka syakwe sya ngondo syasikukwekwelemwa ni inyama yaikuŵilanjikwa falasi ni ŵajawile pamo ni ŵangondo ŵakwe. 7Ŵajigele mutuka syo mia sita syambone. Ni mutuka sine sya ngondo sya ku Misili syose syasikulongoswa ni ilongola ŵa ngondo. 8Pakuŵa Ambuje Akunnungu ŵantesile mwenye jwa ku Misili aŵe jwamakani, nombejo ŵaakuiye Ŵaisilaeli, ŵaŵatyosile pangali lipamba. 9Ŵangondo wa Chimisili, pamo ni falasi syose sya mwenye ni mutuka sya ngondo ni ŵakukwela falasi ŵaakuiye Ŵaisilaeli. Ŵaasimene pamalo paŵataŵile masakasa mungulugulu bahali pakuŵandikana ni Pi Hahiloti mwakulolegana ni musi wa Baali Sefoni.
10Mwenye paŵaŵandichile, Ŵaisilaeli ŵalolite, ŵaaweni Ŵamisili ali nkwika panyuma pao. Ŵakamwilwe ni lipamba ni ŵaapopele Ambuje Akunnungu kuti ŵaakamuchisye. 11Ŵaasalile che Musa, “Uli, nganigapagwa malo ga malembe ku Misili, mpaka kutujigala tuwilile mwipululu mu? Ana kwa chichi ntutesile yelei kututyosya mu chilambo cha ku Misili? 12Nganitunsalila patwaliji ku Misili kuti, ‘Ntuleche, twatumichile Ŵamisili.’ Ikaliji yambone kukwetu tukaliji achikapolo ŵa Ŵamisili, ilekangene ni kuwilila mwipululu.”
13Che Musa ŵaasalile Ŵaisilaeli, “Ngasinjogopa! Nkamulisye ntima, nlindilile nnole itajile Ambuje Akunnungu kunkulupusya lelo jino. Pakuŵa Ŵamisili unkwaona lelo ŵa, ngamwaona sooni ng'oo! 14Ambuje Akunnungu ni juchammenyanile ngondo, ŵanyamwe ngambe nuu. Ngasintenda chachilichose.”
15Ambuje Akunnungu ŵaasalile che Musa, “Kwachichi kundilila Une? Mwasalile Ŵaisilaeli ajendelechele mbujo. 16Nnyakule lubokola lwenu ni kulosya pachanya bahali kuti ngaŵanye meesi, nombe Ŵaisilaeli ajomboche pambindikati bahali papajumu. 17Noneji tinaatende Ŵamisili aŵe ŵamakani, ni ŵanyawo chankuyanje pambindikati bahali. Nipele ŵandu tanjimbichisye une patinanjonaje mwenye ni ŵangondo ŵakwe ni mutuka syakwe sya ngondo ni ŵakwela falasi ŵakwe. 18Ŵamisili chaimanyilile kuti Une ndili Ambuje Akunnungu ŵandu patanjimbichisye kwa kwakunjonanga mwenye ni mutuka syakwe sya ngondo ni ŵakwela falasi ŵakwe.”
19Nipele katumetume jwa kwinani jwa Akunnungu, juŵaalongolelaga ŵangondo ŵa Chiisilaeli mbujo, ŵatyosile kwaula panyuma pao. Ni chiimila cha liunde chichaliji mbujo chila, nombe chatyosile ni kwaula panyuma pao. 20Chiimila cha liunde chila chajile kwima pasikati ja Ŵaisilaeli ni Ŵamisili. Chilo chose liunde lila lyaichisye chipi kwa Ŵamisili nambo kwa Ŵaisilaeli kwaliji ni lulanga. Kwayele Ŵamisili nganiŵaaŵandichila Ŵaisilaeli chilo chose.
21Che Musa ŵagolwesye nkono wao pa bahali ni Ambuje Akunnungu ŵajiichisye mbungo jijapujile kwa machili kutyochela kungopochelo lyuŵa. Japujile chilo chose, ni kugagaŵanya meesi pambindikati ni paliji papajumu. 22Ŵaisilaeli ŵajesile mwejumu pambindikati ja bahali. Meesi galiji mpela likumba kundyo ni kunchiji kwao. 23Nombe Ŵamisili ŵakuiye, ŵajinjile pambindikati ja bahali pamo ni falasi syose sya mwenye ni mutuka syao sya ngondo pamo ni ŵakwela falasi ŵakwe. 24Kuninkucha, Ambuje Akunnungu ŵaalingulile Ŵamisili kutyochela mu chiimila cha mooto ni cha liunde, ni ŵangondo ŵa Chimisili ŵajogwepe kwannope ni kuchenjeuka. 25Ŵagatesile maguludumu ga mutuka syao galeche kusyungula ni kusitenda sijende mwakulajilila. Kumbesi Ŵamisili ŵatite, “Ayaga twautuche Ŵaisilaeli, pakuŵa AMBUJE akuputana ngondo ni uweji ligongo lya kwachenjela ŵanyawo.”
26Nipele AMBUJE ŵaasalile che Musa, “Ngolosye nkono wenu pachanya bahali kuti meesi gauje sooni, gaaunichile Ŵamisili ni mutuka syao pamo ni ŵakwela falasi ŵao.” 27Kwayele che Musa ŵagolwesye nkono wakwe pachanya bahali, ni pakwachele meesi gaujilile mmalo mwakwe. Ŵamisili ŵalinjile kugautuka, nambo AMBUJE ŵaatutile mu bahali. 28Meesi gaujile ni kusiunichila mutuka sya ngondo ni ŵaakwela falasi wose ni ŵangondo wose ŵa mwenye ŵaŵalingaga kwakuya Ŵaisilaeli mu bahali. Nganijusigalila nomose jumo. 29Nambo Ŵaisilaeli ŵajombweche bahali ali nkwenda mwamujumu, meesi galiji mpela makuumba kundyo ni kunchiji kwao.
30Pa lyuŵa lyo ni iŵatite Ambuje Akunnungu pakwakulupusya Ŵaisilaeli mmakono ga Ŵamisili. Ŵaisilaeli ŵagaweni malilo ga Ŵamisili gali mbambamba mungulugulu bahali. 31Ŵaisilaeli ŵagaweni masengo gamakulungwa gaŵatesile Ambuje Akunnungu kwa Ŵamisili. Nipele ŵatandite kwajogopa Ambuje Akunnungu, ni kwakulupilila Ambuje Akunnungu ni che Musa nombe najo.
Currently Selected:
Kutyoka 14: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
