Kutyoka 15

Lujimbo lu che Musa

1Nipele che Musa ni Ŵaisilaeli ŵaajimbile Ambuje Akunnungu lujimbo lu achitiji,

“Tinaajimbile Ambuje Akunnungu, pakuŵa ali jwankulu nnope,

falasi ni ŵakwela falasi ŵaaponyisye mu bahali!”

2Ambuje Akunnungu ali machili gangu ni lujimbo lwangu,

ŵele ni ŵangulupwisye,

ŵele ali Akunnungu ŵangu, chinjalapa.

Chinjalapa ni kwachimbichisya Ambuje Akunnungu, ŵelewo ali Akunnungu ŵangu ni Akunnungu ŵa achatati ŵangu.

3Ambuje Akunnungu ali jwakupunda pa ngondo

Ambuje Akunnungu lili liina lyao.

4Mutuka sya mwenye ni ŵangondo ŵakwe, ŵaaponyesisye mu bahali,

ŵakamusi ŵakwe ŵakumanya, atitimile mu bahali ja Shamu.

5Mwakusokosya mu bahali mwaaunichile,

atitimile mpela liganga mpaka mwamusokweche.

6“Ambuje Akunnungu, nkono wenu wa kundyo ukwete machili gamakulu

Ambuje Akunnungu, kwa machili go nkombwele kwakasanya ŵammagongo.

7Kwa ukulu wenu wekulu, mwajonasile aŵala ŵakunkanila

mwalulechelele lutumbilo lwenu lwakalipa, lwatinisye nti makoŵa. 8Kwa mbumu ja mbula jenu, meesi gawunjikene

matumbela gajimi nti likumba,

mwakusokosya mwakamulene mu bahali.

9Jwammagongo ŵatite, ‘Chinaakuye naakamule;

Chinachigaŵanye chipanje chao inguti kusaka ni yose inguisaka chimbate kukwao;

Chinjiusolomola upanga wangu ni kwajonanga ni nkono wangu.’

10Nambo mmwe mwapepelele mbumu jenu, ni bahali jaaunichile,

Ŵatitimile mpela chisyano mmesi gamajinji.”

11“Pasikati ja minungu, ŵani waali mpela mmwe Alakwe Ambuje Akunnungu?

Ŵani ŵaali mpela mmwe, jwanswela jwankulu?

Ŵani ŵakukombola kupanganya ipanganyo yekulu ni yakusimonjeka mpela mmwe?

12Mwagolwesye kwa nkono wenu wa kundyo

ni chilambo chaamisile ŵammagongo ŵetu.

13Kwa unonyelo wenu wangali mbesi mwalongwesye ŵandu umwawombwele,

kwa machili genu mwalongolele ku chilambo chimwaŵichile.

14Ŵandu ŵa ilambo ine apilikene yeleyo ni kutetemela,

ŵaakutama ku Filisti nombe yaapeteche muntima.

15Ilongola ŵa ku Edomu akogopanga

ŵandu ŵaali ni machili ŵa ku Moabu akutetemela kwa lipamba,

ŵandu wose ŵakutama ku Kanaani jakamwile ndengu.

16Ŵajogwepe ni kutetemela.

Kwa machili ga nkono wenu

atemi jii mpela liganga,

mpaka pachapite ŵandu ŵenu alakwe Ambuje Akunnungu,

mpaka ŵandu ŵenu ŵamwawombwele mu ukapolo pachapite.

17Mmwe tinchajinjisya ni kwatamika petumbi penu,

pamalo pamwapasagwile Alakwe Ambuje Akunnungu, kuti paŵe malo genu gakutama,

pamalo papaswela pamwapalingenye mwasyene Alakwe AMBUJE.

18Alakwe AMBUJE chintawale moŵa gose pangali mbesi.”

Lujimbo lu che Miliamu

19Katema falasi sya mwenye ni mutuka syakwe, ni ŵakwela falasi ŵakwe, paŵajinjilaga mu bahali, AMBUJE ŵagauchisye meesi ni kwatiŵisya. Nambo Ŵaisilaeli ŵajesile papajumu pasikati ja bahali.

20Pelepo che Miliamu jwakulondola juŵaliji alumbugwe che Haluni, ŵakajigele kagoma kamwana mmakono mwakwe niu kukagomba ni achakongwe ŵane ŵakuyaga panyuma ali nkugomba tugoma ni kutyala. 21Che Miliamu ŵaajimbile alu lujimbo lu,

“Mwajimbile AMBUJE, pakuŵa ali jwankulu nnope,

falasi ni jwakwela falasi ŵaaponyisye mu bahali.”

Meesi gakuŵaŵa

22Nipele che Musa ŵalongwesye Ŵaisilaeli ajaule mmbujo kutyochela ku bahali ja Shamu jila, nombewo ŵapite ku chipululu cha Shuli. Ŵajesile mwipululu moŵa gatatu pangagasimana meesi. 23Ŵaichenje peuto papakuŵilanjikwa Mala, peuto paliji ni meesi, nambo nganapakombola kung'wa meesi gala pakuŵa galiji gakuŵaŵa. Lyele ni ligongo peuto pala paŵilanjikwe Mala. 24Ŵandu ŵaadandaulile che Musa achitiji, “Ana uweji chitung'we ichichi?” 25Che Musa ŵapopesile kwa Ambuje Akunnungu, ni Ambuje Akunnungu ŵanlosisye chipande cha chitela. Che Musa ŵachiponyele mmeesi, nombego galiji gambone kwa kung'wa. Kweleko Ambuje Akunnungu ŵaapele malajisyo ni makanyo kuti atame ali nkugakuya. Pelepo ŵaalinjile alole iŵaga chiŵajitichisye. 26Nombe Ambuje Akunnungu ŵaasalile, “Iŵaga chimumbilikanile kwa uchenene, ni kuitenda yose yaikusachilwa, ni kuliŵika chile kwa yose ingunlajisya, chinangose ikansimana ilwele inaipeleche kwa Ŵamisili. Pakuŵa une ndili Ambuje Akunnungu ungunnamya.”

27Paŵatyosile ku Mala ŵaiche ku Elimu, peuto papaliji ni iliŵa kumi ni mbili ni itela sabini yaikuŵilanjikwa mitende.Ŵaŵisile chigono pelepo, pachiŵandi ni meesi.

Currently Selected:

Kutyoka 15: YBV

Highlight

Copy