गिनती 33
33
मिस्र देश सी मोआब तक की यात्रा
1जब सी इस्राएली मूसा अऊर हारून की अगुवायी म दल बनाय क मिस्र देश सी निकल्यो, तब सी उन्न इन जागा पर डेरा डाल्यो होतो। 2मूसा न परमेश्वर की आज्ञा सी उन्को प्रस्थान करन को जागा को नाम लिख दियो; अऊर हि यो आय।
3पहिलो महीना को पन्द्रावों दिन ख हि रामसेस नगर सी निकल्यो; फसह को त्यौहार को दूसरो दिन इस्राएली सब मिस्रियों को देखतो निडरता को संग निकल गयो, 4जब कि मिस्री अपनो सब पहिलौठा ख माटी दे रह्यो होतो जिन्ख परमेश्वर न मार डाल्यो होतो; अऊर परमेश्वर न उन्को देवतावों ख भी सजा दियो होतो।
5इस्राएलियों न रामसेस सी निकल क सुक्कोत नगर म डेरा डाल्यो। 6अऊर उन्न सुक्कोत सी निकल क एताम म, जो जंगल को सीमा पर हय, वहां डेरा डाल्यो। 7अऊर एताम सी निकल क हि पीहहीरोत को तरफ मुड़ गयो, जो बालसपोन को सामने हय; मिगदोल को सामने डेरा खड़ो करयो। 8तब हि पीहहीरोत को सामने सी लाल समुन्दर ख पार कर क् जंगल म गयो, अऊर एताम नाम को जंगल म तीन दिन को रस्ता चल क मारा म डेरा डाल्यो। 9फिर मारा सी निकल क हि एलीम ख गयो, अऊर एलीम म बारा झरना अऊर सत्तर खजूर को झाड़ मिल्यो, अऊर उन्न वहां डेरा खड़ो करयो।
10तब उन्न एलीम सी निकल क लाल समुन्दर को किनार पर डेरा खड़ो करयो। 11अऊर लाल समुन्दर सी निकल क सीन नाम को जंगल म डेरा खड़ो करयो। 12फिर सीन नाम को जंगल सी निकल क उन्न दोपका म डेरा खड़ो करयो। 13अऊर दोपका सी निकल क आलूश म डेरा डाल्यो। 14अऊर आलूश सी निकल क रपीदीम म डेरा डाल्यो, अऊर वहां उन लोगों ख पीवन को पानी नहीं मिल्यो।
15फिर उन्न रपीदीम सी निकल क सीनै को जंगल म डेरा डाल्यो। 16अऊर सीनै को जंगल सी निकल क किब्रोथत्तावा म डेरा डाल्यो। 17अऊर किब्रोथत्तावा सी निकल क हसेरोत म डेरा डाल्यो। 18अऊर हसेरोत सी निकल क रिथ्मा म डेरा डाल्यो। 19तब उन्न रिथ्मा सी निकल क रिम्मोनपेरेस म डेरा खड़ो करयो। 20अऊर रिम्मोनपेरेस सी निकल क लिब्ना म डेरा खड़ो करयो। 21अऊर लिब्ना सी निकल क रिस्सा म डेरा खड़ो करयो। 22अऊर रिस्सा सी निकल क कहेलाता म डेरा डाल्यो। 23अऊर कहेलाता सी निकल क शेपेर पहाड़ी को जवर डेरा डाल्यो। 24फिर उन्न शेपेर पहाड़ी सी निकल क हरादा म डेरा डाल्यो। 25अऊर हरादा सी निकल क मखेलोत म डेरा डाल्यो। 26अऊर मखेलोत सी निकल क तहत म डेरा डाल्यो। 27अऊर तहत सी निकल क तेरह म डेरा डाल्यो। 28अऊर तेरह सी निकल क मित्का म डेरा डाल्यो। 29फिर मित्का सी निकल क उन्न हशमोना म डेरा डाल्यो। 30अऊर हशमोना सी निकल क मोसेरोत म डेरा डाल्यो। 31अऊर मोसेरोत सी निकल क बने-याकानियों को बीच म डेरा डाल्यो। 32अऊर बने-याकानियों को बीच सी निकल क होर्हग्गिदगाद म डेरा डाल्यो। 33अऊर होर्हग्गिदगाद सी निकल क योतबाता म डेरा डाल्यो। 34अऊर योतबाता सी निकल क अब्रोना म डेरा खड़ो डाल्यो। 35अऊर अब्रोना सी निकल क एस्योनगेबेर म डेरा खड़ो डाल्यो। 36अऊर एस्योनगेबेर सी निकल क उन्न सीन नाम को जंगल को कादेश म डेरा डाल्यो। 37फिर कादेश सी निकल क होर पहाड़ी को जवर, जो एदोम देश की सीमा पर हय, वहां डेरा डाल्यो।
38परमेश्वर की आज्ञा को अनुसार याजक हारून होर पहाड़ी पर गयो, अऊर मिस्र देश सी इस्राएली समाज को निकलनो को चालीसवों साल को पाचवों महीना को पहिलो दिन वहां ओकी मृत्यु भय गयी। 39अऊर जब हारून होर पहाड़ी पर मर गयो तब ऊ एक सौ तेवीस साल को होतो।
40अऊर अरात को कनानी राजा, जो कनान देश को दक्षिन भाग म रहत होतो, ओन इस्राएलियों को आवन को समाचार सुन्यो।
41तब इस्राएलियों न होर पहाड़ी सी निकल क सलमोना म डेरा डाल्यो। 42अऊर सलमोना सी निकल क पूनोन म डेरा डाल्यो। 43अऊर पूनोन सी निकल क ओबोत म डेरा डाल्यो। 44अऊर ओबोत सी निकल क अबारीम नाम को डीहों जागा म जो मोआब की सीमा पर हंय, वहां डेरा डाल्यो। 45तब उन डीहों जागा सी निकल क उन्न दीबोनगाद म डेरा डाल्यो। 46अऊर दीबोनगाद सी निकल क अल्मोनदिबलातैम म डेरा डाल्यो। 47अऊर अल्मोनदिबलातैम सी निकल क उन्न अबारीम नाम को पहाड़ी म नबो को सामने डेरा डाल्यो। 48फिर अबारीम पहाड़ी सी निकल क मोआब को अराबा म यरीहो को जवर यरदन को किनार पर डेरा डाल्यो। 49अऊर उन्न मोआब को अराबा म बेत्यशीमोत सी ले क आबेलशित्तीम तक यरदन नदी को किनार किनार डेरा डाल्यो।
कनान पर आक्रमन को आदेश
50फिर मोआब को अराबा म, यरीहो को जवर की यरदन नदी को किनार पर, परमेश्वर न मूसा सी कह्यो, 51“इस्राएलियों ख समझाय क कह्य : जब तुम यरदन को ओन पार जाय क कनान देश म पहुंचो, 52तब ऊ देश को निवासियों ख उन्को देश सी निकाल देजो; अऊर उन्को सब नक्काशीदार गोटावों ख अऊर ढाली हुयी मूर्तियों ख नाश करजो, अऊर उन्को सब पूजा की ऊंची जागावों ख गिराय देजो। 53अऊर ऊ देश ख अपनो अधिकार म ले क ओको म निवास करो, कहालीकि मय न ऊ देश तुम्खच दियो हय कि तुम ओको अधिकारी होय जावो। 54अऊर तुम ऊ देश ख चिट्ठी डाल क अपनो कुलों को अनुसार बाट लेवो; मतलब जो कुल बड़ो हय उन्ख बड़ो हिस्सा, अऊर जो छोटो हय उन्ख छोटो हिस्सा देवो; जो कुल कि चिट्ठी जो जागा लायी निकलेंन उच ओको हिस्सा ठहरेंन; अपनो बापदादों को कुलों को अनुसार अपनो अपनो हिस्सा लेवो। 55पर यदि तुम ऊ देश को निवासियों ख अपनो आगु सी नहीं निकालो, त उन्म सी जिन्ख तुम ओको म रहन देवो हि मानो तुम्हरी आंखी म कचरा को जसो अऊर तुम्हरो पाय म काटा को जसो गड़ेंन, अऊर हि ऊ देश म जहां तुम रहो वहां हि तुम्ख संकट म डालेंन। 56अऊर उन्को सी जसो व्यवहार करन की मनसा मय न करी हय वसोच तुम सी करूं।”
The Lodhi Bible © The Word for the World International and Lodhi Translation Samithi, Gondia, Maharashtra 2025