गिनती 32
32
यरदन को पूर्व म बस्यो हुयो कुल
(व्यवस्थाविवरन ३:१२-२२)
1रूबेनियों अऊर गादियों लोगों को जवर बहुत सो जनावर होतो। जब उन्न याजेर अऊर गिलाद देशों ख देख क बिचार करयो, कि ऊ जनावरों को लायक देश हय, 2तब मूसा अऊर एलीआज़ार याजक अऊर मण्डली को मुखियावों को जवर जाय क कहन लग्यो, 3“अतारोत, दीबोन, याजेर, निम्रा, हेशबोन, एलाले, सबाम, नबो, अऊर बोन नगरों को देश 4जेको पर परमेश्वर न इस्राएल की मण्डली ख विजय दिलायी हय, ऊ जनावरों को लायक हय; अऊर तोरो दासों को जवर जनावर हंय।” 5फिर उन्न कह्यो, “यदि तोरो अनुग्रह तोरो दासों पर होना, त यो देश तोरो दासों ख मिलेंन कि उन्की निजी जमीन होय; हम्ख यरदन नदी को ओन पार मत ले जावो।”
6मूसा न गादियों अऊर रूबेनियों सी कह्यो, “जब तुम्हरो भाऊ युद्ध करन ख जायेंन तब का तुम इत बैठ्यो रहो? 7तय न इस्राएलियों ख यरदन पार करन सी ऊ देश म जान सी जो परमेश्वर न उन्ख दियो हय, तुम कहाली निराश करवावय हय? 8जब मय न तुम्हरो बापदादा ख कादेशबर्ने सी कनान देश देखन लायी भेज्यो, तब उन्न भी असोच करयो होतो। 9मतलब जब उन्न एशकोल नाम की घाटी तक पहुंच क देश ख देख्यो, तब इस्राएलियों सी ऊ देश को बारे म जो परमेश्वर न उन्ख दियो होतो निराश कराय दियो। 10येकोलायी ऊ समय परमेश्वर को कोप भड़क उठ्यो अऊर ओन कसम खायी, 11‘बिना सक जो आदमी मिस्र सी निकल आयो हंय उन्म सी, जितनो बीस साल को या ओको सी जादा उमर को हंय, हि ऊ देश ख देखनो नहीं पायेंन, जेख देन की कसम मय न अब्राहम, इसहाक, अऊर याकूब सी खायी होती, कहालीकि उन्न पूरी रीति सी मोरो अनुसरन नहीं करयो; 12पर यपुन्ने कनजी को टुरा कालेब, अऊर नून को टुरा यहोशू, हि दोयी जो मोरो पीछू पूरी रीति सी भय गयो हंय हि प्रभु ख देख सकेंन।’ 13अऊर परमेश्वर को गुस्सा इस्राएलियों पर भड़क्यो, अऊर जब तक ऊ पीढ़ी को सब लोगों को अन्त नहीं भयो, जिन्न परमेश्वर को प्रति बुरो करयो होतो, तब तक मतलब चालीस साल तक ऊ उन्ख जंगल म भटकातो रह्यो। 14अऊर सुनो, तुम लोग उन पापियों को बच्चा होय क येकोच लायी अपनो बापदादों की जागा पर उठ खड़ो भयो हय, कि इस्राएल को विरुद्ध परमेश्वर को भड़क्यो हुयो गुस्सा अऊर भी भड़कावो! 15यदि तुम परमेश्वर को पीछू चलन सी फिर जावो, त ऊ फिर हम सब ख जंगल म छोड़ देयेंन; यो तरह तुम इन पूरो लोगों को नाश करावो।”
16तब उन्न मूसा को जवर आय क कह्यो, “हम अपनो जनावरों लायी इतच कोठा बनायबो, अऊर अपनो बाल-बच्चां लायी यहांच नगर बसायबो, 17पर खुद इस्राएलियों को आगु आगु चलेंन, जब तक उन्ख उन्की जागा तक नहीं पहुंचाय देबो; पर हमरो बाल बच्चा यो देश को निवासियों को डर सी गढ़ वालो नगरों म रहेंन। 18पर जब तक इस्राएली अपनो अपनो हिस्सा को अधिकारी नहीं होयेंन तब तक हम अपनो घरों ख नहीं लौटबो। 19हम उन्को संग यरदन नदी को ओन पार उन्को बीच कोयी भी हिस्सा नहीं लेबो, कहालीकि हमरो हिस्सा यरदन को येन पार पूर्व दिशा को तरफ मिल्यो हय।”
20तब मूसा न उन्को सी कह्यो, “यदि तुम असो करो, मतलब यदि तुम परमेश्वर को आगु आगु युद्ध करन लायी हथियार उठावो, 21अऊर हर एक हथियार बन्द यरदन को ओन पार तब तक जायेंन, अऊर जब तक परमेश्वर अपनो सामने सी अपनो दुश्मनों ख नहीं भगाय दे 22अऊर ऊ देश परमेश्वर को वश म होन को बाद; तुम यहां लौट सको, अऊर परमेश्वर को अऊर इस्राएल को बारे म निर्दोष ठहरो; अऊर यो देश परमेश्वर को प्रति तुम्हरी निजी जमीन ठहरेंन। 23अऊर यदि तुम असो नहीं करो, त परमेश्वर को विरुद्ध पापी ठहरो; अऊर जान लेवो कि तुम्ख तुम्हरो पाप लगेन। 24तुम अपनो बाल बच्चां लायी नगर बसावो, अऊर अपनी मेंढी-शेरीयों लायी कोठा बनावो; अऊर जो तुम्हरो मुंह सी निकल्यो हय उच करो।”
25तब गादियों अऊर रूबेनियों न मूसा सी कह्यो, “अपनो प्रभु की आज्ञा को अनुसार तोरो दास करेंन। 26हमरो बाल बच्चा, बाईयां, मेंढी-शेरी अऊर, सब जनावर त इतच गिलाद को नगरों म रहेंन; 27पर अपनो प्रभु को आदेश को अनुसार तोरो दास सब को सब युद्ध लायी हथियार बन्द परमेश्वर को आगु आगु लड़ायी करन लायी यरदन को ओन पार जायेंन।”
28तब मूसा न उन्को बारे म एलीआज़ार याजक, अऊर नून को टुरा यहोशू, अऊर इस्राएलियों को कुलों को पूर्वजों को घराना को मुख्य आदमियों ख या आज्ञा दी, 29मूसा न उन्कोसी कह्यो, “यदि सब गादी अऊर रूबेनी आदमी युद्ध लायी हथियार बन्द तुम्हरो संग यरदन को पार जायेंन, अऊर देश तुम्हरो वश म आय जायेंन, त गिलाद देश उन्की निजी जमीन होन लायी उन्ख देवो। 30पर यदि हि तुम्हरो संग हथियार बन्द ओन पार नहीं जायेंन, त उन्की निजी जमीन तुम्हरो बीच कनान देश म रहेंन।”
31तब गादी अऊर रूबेनी बोलन लग्यो, “परमेश्वर न जसो तोरो दासों सी कहलायो हय वसोच हम भी करबो। 32हम हथियार बन्द परमेश्वर को आगु आगु ओन पार कनान देश म जाबोन, पर हमरी निजी जमीन यरदन को येन पारच रहेंन।”
33तब मूसा न गादियों अऊर रूबेनियों ख, अऊर यूसुफ को टुरा मनश्शे को अरधो वंशजों ख एमोरियों को राजा सीहोन अऊर बाशान को राजा ओग, दोयी को राज्यों को देश, नगरों, अऊर उन्की आजु-बाजू की जमीन सहीत दे दियो। 34तब गादियों न दीबोन, अतारोत, अरोएर, 35अत्रौत, शोपान, याजेर, योगबहा, 36बेतनिम्रा, अऊर बेथारान नाम को नगरों ख मजबूत करयो, अऊर उन्न मेंढी-शेरीयों लायी कोठा बनायो। 37अऊर रूबेनियों न हेशबोन, एलाले, अऊर किर्यातैम ख, 38फिर नबो अऊर बालमोन को नाम बदल क उन्ख, अऊर सिबमा ख मजबूत करयो; अऊर उन्न अपनो मजबूत करयो हुयो नगरों को अऊर नयो नाम रख्यो।
39अऊर मनश्शे को टुरा माकीर को वंश वालो न गिलाद देश म जाय क ओको पर अधिकार कर लियो, अऊर जो एमोरी जाति ओको म रहत होती उन्ख निकाल दियो। 40तब मूसा न मनश्शे को टुरा माकीर को वंश ख गिलाद प्रदेश दे दियो, अऊर हि ओको म रहन लग्यो। 41अऊर मनश्शे को वंशज याईर न जाय क गिलाद की बस्तियों ख जीत लियो, अऊर उन्को नाम हव्वोत्याईर रख्यो। 42अऊर नोबह न जाय क गांवो सहीत कनात ख जीत लियो, अऊर ओको नाम अपनो नाम पर नोबह रख्यो।
The Lodhi Bible © The Word for the World International and Lodhi Translation Samithi, Gondia, Maharashtra 2025