गिनती 34
34
कनान देश की सीमा
1फिर परमेश्वर न मूसा सी कह्यो, 2जब तुम कनान देश म पहुंचो, तब “इस्राएलियों ख या आज्ञा दे : जो देश तुम्हरो हिस्सा होयेंन ऊ त चारयी तरफ की सीमा तक को कनान देश हय, 3तब तुम्हरो दक्षिनी भाग सीन नाम को जंगल सी ले क एदोम देश को किनारे किनारे होतो हुयो चली जाये, अऊर तुम्हरी दक्षिनी सीमा खारो पानी को समुन्दर को किनार सी सुरू होय क पश्चिम को तरफ चल्यो; 4वहां सी तुम्हरी सीमा अक्रबीम नाम की चढ़ायी की दक्षिन को तरफ पहुंच क मुड़ेंन, अऊर सीन तक आयो, अऊर कादेशबर्ने को दक्षिन को तरफ निकल्यो, अऊर हसरद्दार तक बढ़ क अस्मोन तक पहुंच्यो; 5फिर वा सीमा अस्मोन सी घूम क मिस्र की नाला तक जायेंन, अऊर भूमध्य सागर पर खतम होय जायेंन।
6“फिर पश्चिमी सीमा भूमध्यसागर को तट होयेंन; तुम्हरी पश्चिमी सीमा याच ठहरेंन।
7“तुम्हरी उत्तरी सीमा या होयेंन, मतलब तुम भूमध्यसागर सी ले क होर पहाड़ी तक एक सीमा-रेखा खीचो; 8अऊर होर पहाड़ी सी हमात तक एक सीमा-रेखा खीचो, या सीमा-रेखा सदाद पर खतम होयेंन; 9फिर वा सीमा जिप्रोन तक जायेंन, अऊर हसरेनान पर खतम होयेंन; अऊर तुम्हरी उत्तरी सीमा याच ठहरेंन।
10“फिर अपनी पूर्वी सीमा हसरेनान सी शपाम तक बान्धजो; 11अऊर वा सीमा शपाम सी रिबला तक, जो ऐन को पूर्व दिशा को तरफ हय, वहां सी सीमा रेखा खल्लो उतरतो उतरतो किन्नेरेत नाम की झील को पूर्वी तट पर पहुंचेंन। 12अऊर वा सीमा यरदन नदी तक उतर क खारो सागर को तट पर निकलेंन। तुम्हरो देश की चारयी सीमायें याच ठहरेंन।”
13तब मूसा न इस्राएलियों सी फिर कह्यो, “जो देश को तुम चिट्ठी डाल क अधिकारी होवो, अऊर परमेश्वर न ओख साढ़े नव कुल को लोगों ख देन की आज्ञा दी हय, वा याच आय; 14पर रूबेनियों अऊर गादियों को कुल त अपनो पूर्वजों को अनुसार अपनो हिस्सा पा चुक्यो हंय, अऊर मनश्शे को अरधो कुल को लोग भी अपनो हिस्सा पा चुक्यो हंय; 15मतलब उन ढायी कुलों को लोग यरीहो को जवर यरदन को ओन पार पूर्व दिशा म, जहां सूर्य निकलय हय, अपनो अपनो भाग पा चुक्यो हंय।”
जमीन बाटन वालो मुखिया
16फिर परमेश्वर न मूसा सी कह्यो, 17“जो आदमी तुम लोगों लायी ऊ जमीन ख बाटेंन उन्को नाम यो हंय : एलीआज़ार याजक अऊर नून को टुरा यहोशू। 18अऊर जमीन ख बाटन म उन्की मदत करन लायी हर एक कुल को एक प्रधान ठहरावो। 19अऊर इन आदमियों को नाम यो हंय : यहूदा कुल सी यपुन्ने को टुरा कालेब, 20शिमोन कुल को अम्मीहूद को टुरा शमूएल, 21बिन्यामीन कुल को किसलोन को टुरा एलीदाद, 22दानियों को कुल को प्रधान योग्ली को टुरा बुक्की, 23यूसुफियों म सी मनश्शेइयों को कुल को प्रधान एपोद को टुरा हन्नीएल, 24अऊर एप्रैमियों को कुल को प्रधान शिप्तान को टुरा कमूएल, 25जबूलूनियों को कुल को प्रधान पर्नाक को टुरा एलीसापान, 26इस्साकारियों को कुल को प्रधान अज्जान को टुरा पलतीएल, 27आशेरियों को कुल को प्रधान शलोमी को टुरा अहीहूद, 28अऊर नप्तालियों को कुल को प्रधान अम्मीहूद को टुरा पदहेल।”
29जिन आदमियों ख परमेश्वर न कनान देश ख इस्राएलियों लायी बाटन की आज्ञा दी हि हिच आय।
The Lodhi Bible © The Word for the World International and Lodhi Translation Samithi, Gondia, Maharashtra 2025