गिनती 2
2
झुण्ड म अलग अलग दलों को क्रम
1फिर परमेश्वर न मूसा अऊर हारून सी कह्यो, 2इस्राएली मिलापवालो तम्बू को चारयी तरफ अऊर ओको आगु अपनो अपनो झण्डा अऊर अपनो अपनो पूर्वजों को घराना को निशान को जवर अपनो डेरा खड़ो करो। 3जो अपनो पूर्व दिशा को तरफ अपनो अपनो दलों को अनुसार डेरा खड़ो करेंन, हि यहूदा की झुण्ड वालो झण्डा को लोग होयेंन, अऊर उन्को मुखिया अम्मीनादाब को टुरा नहशोन होयेंन। 4अऊर उन्को दल को गिन्यो गयो आदमी चौहत्तर हजार छय सौ हय। 5उन्को जवर जो डेरा खड़ो करेंन हि इस्साकार कुल को होना अऊर उन्को मुखिया सूआर को टुरा नतनेल होयेंन। 6अऊर उन्को दल को गिन्यो हुयो आदमी चौपन हजार चार सौ हंय। 7इन्को जवर जबूलून को कुल वालो रहेंन, अऊर उन्को प्रधान हेलोन को टुरा एलीआब होयेंन, 8अऊर उन्को दल को गिन्यो हुयो आदमी सत्तावन हजार चार सौ हय। 9यो रीति सी यहूदा की झुण्ड म जितनो अपनो अपनो दलों को अनुसार गिन्यो गयो हि सब मिल क एक लाख छियासी हजार चार सौ हंय। हि सब सी पहले जायेंन। 10“दक्षिन को तरफ रूबेन की सेना झुण्ड को झण्डा को खल्लो को लोग अपनो अपनो दल को अनुसार रहेंन, अऊर उन्को प्रधान शदेऊर को टुरा एलीसूर होयेंन। 11अऊर उन्को दल को गिन्यो हुयो आदमी छियालीस हजार पाच सौ हंय। 12उन्को जवर जो डेरा खड़ो करेंन हि शिमोन को कुल को होयेंन अऊर उन्को प्रधान सूरीशद्दै को टुरा शलूमीएल होयेंन, 13अऊर उन्को दल को गिन्यो हुयो आदमी उनसाठ हजार तीन सौ हंय। 14ओको बाद गाद को कुल को, अऊर ओको प्रधान रूएल को टुरा एल्यासाप होयेंन, 15अऊर उन्को दल को गिन्यो हुयो आदमी पैतालीस हजार छय सौ पचास हंय। 16रूबेन को सेना झुण्ड म जितनो अपनो दलों को अनुसार गिन्यो गयो हि सब मिल क एक लाख एक्कावन हजार चार सौ पचास हंय। हि दूसरो क्रम म जायेंन।”
17“उन्को पीछु अऊर सब सेना दलों को बीचोंबीच लेवियों को डेरा समेत मिलाप वालो तम्बू वालो जायेंन; जो क्रम म सी हि खड़ो करेंन उच क्रम सी हि अपनो अपनो जागा पर अपनो अपनो झण्डा को जवर जवर चलेंन। 18पश्चिम दिशा को तरफ एप्रैम की सेना दल को झण्डा को खल्लो को लोग अपनो अपनो दलों को अनुसार रहेंन, अऊर उन्को प्रधान अम्मीहूद को टुरा एलीशामा होयेंन, 19अऊर उन्को दल को गिन्यो हुयो आदमी चालीस हजार पाच सौ हंय। 20उन्को जवर मनश्शे को कुल को रहेंन, अऊर उन्को प्रधान पदासूर को टुरा गम्लीएल होयेंन, 21अऊर उन्को दल को गिन्यो हुयो आदमी बत्तीस हजार दोय सौ हंय। 22फिर बिन्यामीन कुल को रहेंन, अऊर उन्को प्रधान गिदोनी को टुरा अबीदान होयेंन, 23अऊर उन्को दल को गिन्यो हुयो आदमी पैतीस हजार चार सौ हंय। 24एप्रैम की छावनी म जितनो अपनो अपनो दलों को अनुसार गिन्यो गयो हि सब मिल क एक लाख आठ हजार एक सौ आदमी हंय। हि तीसरो क्रम म जायेंन । 25उत्तर दिशा को तरफ दान की सेना दल को झण्डा को खल्लो को लोग अपनो अपनो दलों को अनुसार रहेंन, अऊर उन्को प्रधान अम्मीशद्दे को टुरा अहीएजेर होयेंन, 26अऊर उन्को दल को गिन्यो हुयो आदमी बासठ हजार सात सौ हंय। 27अऊर उन्को जवर जो डेरा खड़ो करेंन हि आशेर को कुल को रहेंन, अऊर उन्को प्रधान ओक्रान को टुरा पगीएल होयेंन। 28अऊर उन्को दल को गिन्यो हुयो आदमी एकतालीस हजार पाच सौ हंय। 29फिर नप्ताली को कुल को रहेंन, उन्को प्रधान एनान को टुरा अहीरा होयेंन, 30अऊर उन्को दल को गिन्यो हुयो आदमी त्रेपन हजार चार सौ हंय। 31अऊर दान की सेना दल म जितनो गिन्यो गयो हि सब मिल क एक लाख सत्तावन हजार छय सौ हंय। हि सब अपनो झण्डा को खल्लो सब सी आखरी म जायेंन।”
32इस्राएलियों म सी जो अपनो अपनो बापदादों को घराना को अनुसार गिन्यो गयो हि हिच आय; अऊर सब सेना दलों को जितनो आदमी अपनो अपनो दलों को अनुसार गिन्यो गयो हि सब छय लाख तीन हजार पाच सौ पचास होतो। 33पर परमेश्वर न मूसा ख आज्ञा दी होती ओको अनुसार लेवीय त इस्राएलियों म गिन्यो नहीं गयो।
34यो तरह जो जो आज्ञा परमेश्वर न मूसा ख दी होती इस्राएली उन आज्ञावों को अनुसार अपनो अपनो कुल अऊर अपनो अपनो बापदादों को घराना को अनुसार, अपनो अपनो झण्डा को जवर डेरा खड़ो करत होतो अऊर यात्रा भी करत होतो।
The Lodhi Bible © The Word for the World International and Lodhi Translation Samithi, Gondia, Maharashtra 2025