गिनती 3
3
हारून को टुरा
1जो समय परमेश्वर न सीनै पहाड़ी को जवर मूसा सी बात करी ऊ समय हारून अऊर मूसा की या वंशावली होती। 2#गिनती २६:६०हारून को चार बेटा होतो, नादाब बड़ो बेटा होतो, अऊर अबीहू, एलीआज़ार अऊर ईतामार; 3हारून को टुरा, जो अभिषेक करयो हुयो याजक होतो, अऊर याजक को रूप म सेवा करन लायी चुन्यो गयो होतो उन्को नाम योच आय। 4#गिनती २६:६१नादाब अऊर अबीहू जो समय सीनै को जंगल म परमेश्वर को आगु अस्विकृत आगी चढ़ायी त हि मर गयो; उन्की कोयी सन्तान नहीं होती। येकोलायी एलीआज़ार अऊर ईतामार अपनो बाप हारून को जीवन काल म याजक को काम करतो रह्यो।
लेवियों ख याजक की सेवा लायी चुननो
5परमेश्वर न मूसा सी कह्यो, 6“लेवी कुल म को आदमियों ख जवर लिजाय क हारून याजक को आगु खड़ो कर कि हि ओकी सेवा करे। 7जो कुछ ओको तरफ सी अऊर पूरी मण्डली को तरफ सी उन्ख सौंप्यो जाये ओकी रक्षा हि मिलापवालो तम्बू को आगु करेंन, यो तरह हि तम्बू की सेवा करे; 8हि मिलापवालो तम्बू को पूरो सामान अऊर इस्राएलियों की सौंपी हुयी चिजों की देखभाल करेंन, यो तरह हि उन्की जवाबदारी सम्भालेंन। 9अऊर तय लेवियों ख हारून अऊर ओको टुरावों ख सौंप देजो; अऊर हि इस्राएलियों को तरफ सी पूरी रीति सी हारून ख सौंप्यो गयो हय। 10अऊर हारून अऊर ओको टुरावों ख याजक को पद पर नियुक्त करजो, अऊर हि अपनो याजक पद ख सम्भालेंन, अऊर यदि दूसरो आदमी जवर आयेंन, त ओख मृत्यु दण्ड दियो जायेंन।”
11फिर परमेश्वर न मूसा सी कह्यो, 12“सुन, इस्राएली बाईयों को सब पहिलौठा बदला म मय इस्राएलियों म सी लेवियों ख लेऊ हय; येकोलायी लेवीय मोरोच होयेंन। 13#निर्गमन १३:२सब पहिलौठा मोरो आय; कहालीकि मय न मिस्र देश म को सब पहिलौठा ख मार डाल्यो होतो, उच दिन मय न, चाहे आदमी होना चाहे पशु होना, इस्राएलियों को सब पहिलौठा ख अपनो लायी पवित्र ठहरायो; येकोलायी हि मोरोच ठहरेंन; मय परमेश्वर आय।”
लेवियों की जनगणना
14फिर परमेश्वर न सीनै को जंगल म मूसा सी कह्यो, 15“लेवियों म सी जितनो आदमी एक महीना या ओको सी जादा उमर को होना उन्ख उन्को पूर्वजों को घराना अऊर उन्को कुलों को अनुसार गिन लेजो।” 16या आज्ञा को अनुसार मूसा न परमेश्वर को कहनो को अनुसार उन्ख गिन लियो। 17लेवी को टुरावों को नाम यो हय, गेर्शोन, कहात, अऊर मरारी। 18अऊर गेर्शोन को टुरा को नाम यो हय, जिन्कोसी ओको कुल चले, लिब्नी अऊर शिमी। 19हि कहात को टुरा आय जिन्कोसी ओको कुल चले, अम्राम, यिसहार, हेब्रोन, अऊर उज्जीएल। 20हि मरारी को टुरा जिन्को सी ओको कुल चले, महली अऊर मूशी। हि लेवियों को पूर्वजों को घराना को अनुसार हंय।
21गेर्शोन कुल को लिब्नियों अऊर शिमियों नाम को कुल चल्यो, योच गेर्शोन कुल को कुल होतो। 22इन म सी जितनो आदमियों की उमर एक महीना या ओको सी जादा होती, उन सब की गिनती सात हजार पाच सौ होती। 23गेर्शोनवंशीय कुल ख निवास-स्थान को पीछु पश्चिम दिशा को तरफ अपनो डेरा खड़ो करे; 24अऊर गेर्शोनवंशीय प्रधान को परिवार को मुखिया लाएल को टुरा एल्यासाप होतो। 25अऊर मिलापवालो तम्बू की जो चिजे गेर्शोनवंशियों ख सौंपी गयी हि या आय, मतलब निवास स्थान ,तम्बू अऊर ओको बाहरी आवरन, अऊर मिलापवालो तम्बू को दरवाजा को परदा, 26अऊर जो आंगन निवास अऊर वेदी को चारयी तरफ हय ओको परदा ,अऊर उन्को दरवाजा को परदा, अऊर सब रस्सियां जो उन्को म काम आवय हय।
27फिर कहात सी अम्रामियों, यिसहारियों, हेब्रोनियों, अऊर उज्जीएलियों को कुल होतो; योच कहात कुल होतो। 28उन म सी जितनो आदमियों की उमर एक महीना की यां ओको सी जादा होती उन्की गिनती आठ हजार छय सौ होती। उन पर पवित्र स्थान की देखभाल करन की जिम्मेदारी होती। 29कहातियों को कुल ख निवास स्थान को ओन पार अपनो डेरा डाल्यो करे जो दक्षिन दिशा को तरफ हय; 30अऊर कहात वंशीय को परिवार को प्रधान उज्जीएल को टुरा एलीसापान होतो। 31अऊर जो चिजे उन्ख सौंपी गयी हि वाचा को सन्दूक, मेज, दीया रखन की जागा, वेदियां, अऊर जो चिज याजक पवित्र जागा म उपयोग करय हय, अऊर परदा; मतलब पवित्र जागा म काम म आवन वालो पूरो सामान होतो।
32अऊर लेवियों को प्रधानों को प्रधान हारून याजक को टुरा एलीआज़ार होतो, अऊर जो लोग पवित्र जागा की सौंपी हुयी चिजों की देखभाल करत होतो, ऊ उन्को निरीक्षक होतो।
33मरारी को महली अऊर मूशी नाम को कुल होतो; हिच मरारी कुल को कुल होतो। 34इन्म सी जितनो आदमियों की उमर एक महीना की यां ओको सी जादा होती उन सब की गिनती छय हजार दोय सौ होती। 35अऊर मरारी कुलों को घराना को प्रधान अबीहैल को टुरा सूरीएल होतो; हि पवित्र स्थान की उत्तर दिशा म डेरा डालत होतो। 36मरारी कुल ख निवास जागा लायी पाटी, रस्सियां, खम्बों, कुर्सियां, यो सब सामान उन्को लगावन को काम आये येख देखभाल करन को काम दियो। 37हि चारयी तरफ को बाहरी आंगन को खम्बा, कुर्सियां, खूटा, अऊर रस्सियों की देखभाल करत होतो।
38मूसा, हारून अऊर ओको टुरा न मिलाप वालो तम्बू को आगु पूर्व दिशा म अपनो डेरा लगायो। उन्ख पवित्र जागा की देखभाल करन को काम सौंप्यो गयो। उन्न यो इस्राएल को लोगों लायी करयो। अऊर दूसरो जो कोयी पवित्र जागा को जवर आतो ओख मृत्यु दण्ड दियो जात होतो। 39परमेश्वर की या आज्ञा को अनुसार एक महीना को या ओको सी जादा उमर को जितनो लेवीय आदमियों ख मूसा अऊर हारून न उन्को कुलों को अनुसार गिन्यो, हि सब को सब बावीस हजार होतो।
पहिलौठों की जागा लेनो
40फिर परमेश्वर न मूसा सी कह्यो, “इस्राएलियों को जितनो पहिलौठा आदमियों की उमर एक महीना की यां ओको सी जादा हय, उन सब ख नाम ले क गिन ले। 41अब मोरो लायी इस्राएल को पहिलौठों को बदला लेवियों ख, अऊर इस्राएलियों को जनावरों को सब पहिलौठों को बदला लेवियों को जनावरों ख ले; मय परमेश्वर आय।” 42परमेश्वर की या आज्ञा को अनुसार मूसा न इस्राएलियों को सब पहिलौठों ख गिन लियो। 43अऊर सब पहिलौठा आदमी जिन्की उमर एक महीना या ओको सी जादा होती, उन्को नामों की गिनती बावीस हजार दोय सौ तिहत्तर होती।
44तब परमेश्वर न मूसा सी कह्यो, 45“इस्राएलियों को सब पहिलौठों को बदला लेवियों ख, अऊर जनावरों ख लेजो; अऊर लेवीय मोरोच होयेंन; मय परमेश्वर आय। 46अऊर इस्राएलियों को पहिलौठों म सी जो दोय सौ तिहत्तर गिनती म लेवियों सी जादा हय, उन्ख छुड़ावन लायी, 47हर एक आदमी लायी चान्दी को पाच सिक्का लेजो; हि पवित्र स्थान की तौल को अनुसार होना, अऊर एक सिक्का म बारा ग्राम होना#3:47 बीस गेरा को शेकेल। 48अऊर जो रुपया उन जादा पहिलौठों की छुड़ौती को होयेंन ओख हारून अऊर ओको टुरावों ख दे देजो।” 49जो इस्राएली पहिलौठा लेवियों को द्वारा छुड़ायो हुयो सी जादा होतो उन्को हाथ सी मूसा न छुड़ौती को रुपया लियो। 50अऊर एक हजार तीन सौ पैंसठ चान्दी को सिक्का#3:50 एक हजार तीन सौ पैंसठ चान्दी को सिक्का शेकेल पवित्र जागा को हिसाब सी जमा भयो। 51अऊर परमेश्वर की आज्ञा को अनुसार मूसा न छुड़ायो हुयो को रुपया हारून अऊर ओको टुरावों ख दे दियो।
The Lodhi Bible © The Word for the World International and Lodhi Translation Samithi, Gondia, Maharashtra 2025