गिनती 1
1
इस्राएलियों की पहिली गिनती
1इस्राएली लोग मिस्र देश सी निकल आन को दूसरो साल को दूसरो महीना को पहिले दिन ख, परमेश्वर न सीनै को सुनसान जागा म, मिलापवालो तम्बू म, मूसा सी कह्यो, 2“तय अऊर हारून ख पूरो इस्राएली लोगों को मण्डली अऊर बापदादों को घराना को एक एक आदमी की गिनती उन को नाम को अनुसार करजो; 3जितनो इस्राएली लोग बीस साल या ओको सी जादा उमर को हय, अऊर जो युद्ध करन लायक हो, उन सब को दलों को अनुसार तय अऊर हारून उन्ख गिन ले। 4अऊर तुम्हरो संग म हर एक कुल सी एक एक आदमी भी जो अपनो घराना को मुखिया हो। 5जो तोरी मदद करेंन उन व्यक्तियों को नाम यो आय, रूबेन को कुल म सी शदेऊर को टुरा एलीसूर; 6शिमोन को कुल म सी सूरीशद्दै को टुरा शलूमीएल; 7यहूदा को कुल म सी अम्मीनादाब को टुरा नहशोन; 8इस्साकार को कुल म सी सूआर को टुरा नतनेल; 9जबूलून को कुल म सी हेलोन को टुरा एलीआब; 10यूसुफ को टुरावों म सी मतलब एप्रैम कुल म सी अम्मीहूद को टुरा एलीशामा, अऊर मनश्शे को कुल म सी पदासूर को टुरा गम्लीएल; 11बिन्यामीन को कुल म सी गिदोनी को टुरा अबीदान; 12दान को कुल म सी अम्मीशद्दे को टुरा अहीएजेर; 13आशेर को कुल म सी ओक्रान को टुरा पगीएल; 14गाद को कुल म सी दूएल को टुरा एल्यासाप; 15नप्ताली को कुल म सी एनान को टुरा अहीरा।” 16हि इस्राएली दूसरी मण्डलियों म सी चुन्यो हुयो आदमी अपनो अपनो पूर्वजों को कुलों को प्रधान होय क बुलायो गयो हि योच आय, अऊर हि इस्राएलियों को कुलों म मुख्य आदमी होतो।
17मूसा अऊर हारून न इन आदमियों ख संग लियो, जिन्ख चुन्यो गयो होतो, 18दूसरो महीना को पहिलो दिन पूरी मण्डली जमा करी, तब इस्राएलियों न अपनो अपनो कुल अऊर अपनो अपनो पूर्वजों को घराना को अनुसार बीस साल यां ओको सी जादा उमर वालों को नामों की गिनती करवाय क अपनो अपनो सन्तानों को नाम लिखवायो। 19जो तरह परमेश्वर न मूसा ख जो आज्ञा दी होती ओकोच अनुसार ओन सीनै को जंगल म उन्की गिनती करी। 20इस्राएल को पहिलो टुरा रूबेन को कुल को जितनो आदमी अपनो कुल अऊर अपनो पूर्वजों को घराना को अनुसार बीस साल या ओको सी जादा उमर को होतो अऊर जो युद्ध करन लायक होतो, हि सब अपनो अपनो नाम सी गिन्यो गयो : 21अऊर रूबेन को कुल को गिन्यो हुयो आदमी छियालीस हजार पाच सौ होतो। 22शिमोन को कुल को जितनो आदमी अपनो कुलों अपनो पूर्वजों को घराना को अनुसार बीस साल यां ओको सी जादा उमर को होतो, अऊर जो युद्ध करन को लायक होतो हि सब अपनो अपनो नाम सी गिन्यो गयो : 23अऊर शिमोन को कुल को गिन्यो हुयो आदमी उनसाठ हजार तीन सौ होतो। 24गाद को कुल को जितनो आदमी अपनो कुलों अऊर अपनो पूर्वजों को घराना को अनुसार बीस साल या ओको सी जादा साल को होतो अऊर जो युद्ध करन को लायक होतो, हि सब अपनो अपनो नाम सी गिन्यो गयो : 25अऊर गाद कुल को गिन्यो हुयो आदमी पैंतालीस हजार छय सौ पचास होतो। 26यहूदा को कुल को जितनो आदमी अपनो कुलों अऊर अपनो पूर्वजों को घराना को अनुसार बीस साल यां ओको सी जादा उमर को होतो अऊर जो युद्ध करन लायक होतो, हि सब अपनो अपनो नाम सी गिन्यो गयो : 27अऊर यहूदा को कुल को गिन्यो हुयो आदमी चौहत्तर हजार छय सौ होतो। 28इस्साकार को कुल को जितनो आदमी अपनो कुलों अऊर अपनो पूर्वजों को घराना को अनुसार बीस साल यां ओको सी जादा उमर को होतो अऊर जो युद्ध करन लायक होतो, हि सब अपनो अपनो नाम सी गिन्यो गयो : 29अऊर इस्साकार को कुल को गिन्यो हुयो आदमी चौपन हजार चार सौ होतो। 30जबूलून को कुल को जितनो आदमी अपनो कुलों अऊर अपनो पूर्वजों को घराना को अनुसार बीस साल यां ओको सी जादा उमर को होतो अऊर जो युद्ध करन लायक होतो, हि सब अपनो अपनो नाम सी गिन्यो गयो : 31अऊर जबूलून को कुल को गिन्यो हुयो आदमी सत्तावन हजार चार सौ होतो। 32यूसुफ को टुरावों म सी एप्रैम को कुल को जितनो आदमी अपनो कुलों अऊर अपनो पूर्वजों को घराना को अनुसार बीस साल यां ओको सी जादा साल को होतो अऊर जो युद्ध करन लायक होतो, हि सब अपनो अपनो नाम सी गिन्यो गयो : 33अऊर एप्रैम कुल को गिन्यो हुयो आदमी चालीस हजार पाच सौ होतो। 34यूसुफ को टुरा मनश्शे को कुल को जितनो आदमी अपनो कुलों अऊर अपनो पूर्वजों को घरानो को अनुसार बीस साल यां ओको सी जादा उमर को होतो अऊर जो युद्ध करन लायक होतो, हि सब अपनो अपनो नाम सी गिन्यो गयो : 35अऊर मनश्शे को कुल को आदमी बत्तीस हजार दोय सौ होतो। 36बिन्यामीन को कुल को जितनो आदमी अपनो कुलों अऊर अपनो पूर्वजों को घराना को अनुसार बीस साल यां ओको सी जादा उमर को होतो अऊर जो युद्ध करन को लायक होतो, हि सब अपनो अपनो नाम सी गिन्यो गयो : 37अऊर बिन्यामीन को कुल को गिन्यो हुयो आदमी पैतीस हजार चार सौ होतो। 38दान को कुल को जितनो आदमी अपनो कुलों अऊर अपनो पूर्वजों को घराना को अनुसार बीस साल यां ओको सी जादा उमर को होतो अऊर जो युद्ध करन को लायक होतो, हि सब अपनो अपनो नाम सी गिन्यो गयो : 39अऊर दान को कुल को गिन्यो हुयो आदमी बाहसठ हजार सात सौ होतो। 40आशेर को कुल को जितनो आदमी अपनो कुलों अऊर अपनो बापदादों को घराना को अनुसार बीस साल यां ओको सी जादा उमर को होतो अऊर जो युद्ध करन को लायक होतो, हि सब अपनो अपनो नाम सी गिन्यो गयो : 41अऊर आशेर को कुल को गिन्यो हुयो आदमी एकतालीस हजार पाच सौ होतो। 42नप्ताली को कुल को जितनो आदमी अपनो कुलों अऊर अपनो बापदादों को घराना को अनुसार बीस साल यां ओको सी जादा उमर को होतो अऊर जो युद्ध करन को लायक होतो, हि सब अपनो अपनो नाम सी गिन्यो गयो : 43अऊर नप्ताली को कुल को गिन्यो हुयो आदमी त्रेपन हजार चार सौ होतो। 44यो तरह मूसा अऊर हारून अऊर इस्राएल को बारा मुखियावों न, जो अपनो अपनो पूर्वजों को घराना को मुखिया होतो, उन सब ख गिन लियो अऊर उन्की गिनती याच होती। 45येकोलायी जितनो इस्राएली बीस साल या ओको सी जादा उमर को होन को वजह युद्ध करन को लायक होतो, हि अपनो पूर्वजों को घराना को अनुसार गिन्यो गयो, 46#गिनती २:३२अऊर हि सब गिन्यो हुयो आदमी मिलाय क छय लाख तीन हजार पाच सौ पचास होतो।
47इन म लेवियों को नाम दूसरो कुलों म नहीं गिन्यो गयो। 48कहालीकि परमेश्वर न मूसा सी कह्यो होतो, 49“लेवीय कुल की गिनती इस्राएलियों को संग मत करजो; 50येको बदला लेवियों ख मोरो आगु को तम्बू, अऊर ओको सब सामान को अधिकारी ठहराय देजो; हि इन सब ख अऊर सामान ख ले क ओको म सेवा करे, अऊर तम्बू को चारयी तरफ अपनो डेरा खड़ो करे। 51अऊर जब जब तम्बू ख आगु लिजानो होना तब तब लेवीय ओख जमा कर दे, अऊर जब जब तम्बू ख खड़ो करनो होना तब तब ओख खड़ो कर दे; अऊर जो कोयी तम्बू को जवर आये ऊ मार डाल्यो जाये। 52पूरो इस्राएली अपनो अपनो डेरा अपनी अपनी झुण्ड म अऊर अपनो अपनो झण्डा को जवर डेरा खड़ो करे; 53पर लेवी कुल तम्बू की रक्षा लायी ओको चारयी तरफ डेरा खड़ो करे, कहीं असो नहीं होय कि इस्राएलियों की मण्डली पर मोरो प्रकोप भड़के; अऊर लेवी गवाही को तम्बू की रक्षा करतो रहेंन।” 54जो आज्ञा परमेश्वर न मूसा क दी होती इस्राएलियों न ओकोच अनुसार करयो।
The Lodhi Bible © The Word for the World International and Lodhi Translation Samithi, Gondia, Maharashtra 2025