Rwî 8
8
1Kethîrwa we ûrî mûrwaiya,
ûrîa wongithirue nî nyanya.
Nîngîcemania nawe njîrarî,
nîngîkûmumunya na gûtirî mûndû ûngînyarara.
2Nîngîkûvira mûciî kwa nyanya mûnjiari,
kûrîa ûngînthomithîria wendo.
Nîngîgûkundia ndivei îrîa mbaro,
ndivei ya ngûngûmanga ciakwa.
3Njara yaku ya ûmotho îrî ngingorî yakwa,
nayo njara yaku ya ûrîo îngumbatîrîtie.
4Mue aka a Jerusalemu namûthaitha mûtwîre atî,
tî mûtûthînia kana mûtonyerere wendo wetû,
nginya rîrîa kavinda gagaakinya.
Rwîmbo rwa gatandatû
Aka
5Nû ûrîa ûkîte aumîte werûrî,
manyitanîte njara na mwendwa wake?
Mûndûmûka
Naakûramûkirie rungu rwa mûtî wa matunda,
varîa nyûkwe eguîrîre ûrûrû agîgûciara.
6Ngororî yaku ndûkagîe wendo na mûndû wîngî tiga nie,
ndûkamumunye mûndû wîngî tiga nie.
Nîûndû wendo ûrî vinya ta gîkuû,
wîru nî mûcûku ta gîkuû kîo kîene.
Wendo ûrîrîmbûkaga ta mwaki,
wakanaga ta mwaki ûtangîvoreka.
7Manjî meengî matingîûvoria,
kana mwîcûro wa manjî ûûtware.
Mûndû angîruta ûtonga wake agûre wendo,
agîcaga na gîconoko.
Aa mûrwang'ina na mûndûmûka
8Tûrî na mwarwaiya mûnini,
na tî mumiu nyondo.
Tûkaamwîka atîa rîrîa akagîa na mûnyanya?
9Ethîrwa nî ta rûthingo na tî mumiu nyondo,
tûkaamûgitîra ta nyomba ndaca na îgûrû ya sîlûva,
ethîrwa arî mûtangatangi ta mûrango wa mîena yonthe,
tûkaavinga mûrango wake na mîkîgo ya mîtî ya mîtarakwe.
Mûndûmûka
10Nie nekariî ta rûthingo na ndiarî mumiu nyondo,
nyondo ciakwa rîu ciîkariî ta nyomba ndaca na îgûrû.
Mwendwa wakwa andoria,
nîakenagua nî kîrîa onaga.
Mûndûmûrûme
11Solomoni aarî na mûgûnda wa mîthavibu vandû vetagwa Baali Hamoni.
Nîwakomborithirie andû guo maûmenyagîrîre,
wa mûndû aamûrîvaga sîlûva ngiri îmwe (1,000).
12Mûgûnda wakwa wa mîthavibu nî wakwa nie mwene;
we Solomoni oca sîlûva ngiri îmwe (1,000),
nao arîmi moce sîlûva magana maîrî (200).
13We mwendwa wakwa tiga mbîgue ûkîmbarîria ûrî mûgûndarî,
arata akwa metererete kwîgua mûgambo waku.
Mûndûmûka
14Mwendwa wakwa ûka kûrî nie na îvenya ta nthwariga,
ta nthiia ya njamba îtarî ngûrû îrî irîmarî cia mînyamû mînungi waro.
Currently Selected:
Rwî 8: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
