Rwî 5
5
Mûndûmûrûme
1Nînatonya mûgûndarî wakwa,
mwendwa wakwa, mûviki wakwa.
Nîraûngania mînyamû mînungi waro ya mare yakwa.
Nîrarîa ûûkî wakwa na mago.
Nîranyua ndivei yakwa na îriia.
Mûndûmûka
Arata, rîani na mûnyue,
nginya mûrîwe nî wendo!
Rwîmbo rwa Kana
Mûndûmûka
2Naamamîte, nwatî ngoro yakwa ndîarî toro.
Nînegwire mwendwa akîringaringa mûrango.
Mûndûmûrûme
Mvingûrîra mûviki wakwa mwendwa wakwa,
ndutuura yakwa we mwaro viû.
Kîongo gîakwa kîrî na îme,
na njuîrî ciakwa irî na rûthuthuû rwa ûtukû.
Mûndûmûka
3Nie nîrî mûrutu nguo;
nîngîîkîra nguo rîngî atîa?
Nîrî mwîthambiu magûrû;
nîngîmavaka gîko rîngî atîa?
4Mwendwa wakwa nîwanyitire mûrango,
na mwîrî wakwa ûgîcûrwa nî gîkeno.
5Nînaûkîrire ngîvingûrîra mwendwa wakwa.
Njara ciakwa ciaconjete maguta manungi waro ma mûtî wa mare,
maguta manungi waro meetîkaga kuuma ciararî ciakwa,
ngînyita gîcûvî Kîam mûrango nîguo mvingûre.
6Nînavingûrîre mwendwa wakwa mûrango,
nwatî mwendwa wakwa aarî mûthiîu.
Nînendaga kwîgua mûgambo wake!
Naamûcaririe nwatî ndiamwona.
Naamwîtire nwatî ndaambîtîka.
7Arangîri a îtûûra makîthiûrûrûka nîmaamonire.
Nîmaandivire na makîndivia;
arangîri a îtûûra nîmaanjunire cuka yakwa.
8Mue aka a Jerusalemu, namûthaitha,
mwona mwendwa wakwa mwîreni nîrî mûrwaru nî wendo.
Aka
9We mûthaka gûkîra aka onthe,
nîkwa mwendwa waku arî ngûrani na arîa engî?
Nî ûndû ûrîkû wa mwanya arî naguo,
ûcio ûratûma ûtûthaithe na vinya ûguo?
Mûndûmûka
10Mwendwa wakwa nî mûthaka na arî vinya,
arî ngûrani gatagatî ka arûme ngiri îkûmi.
11Kîongo gîake nî kîthaka ta thaavu ntheru,
njuîrî ciake nî cia matanda,
na cirîte ta gîkûngûrû.
12Metho make mathakarîte ta ndutuura irî rûtere rwa karûnjî,
ta ndutuura ciîthambîte na îriia irûngamîte rûtere rwa karûnjî.
13Makai make mathakarîte ta mûgûnda wîcûrîte mîtî mînungi waro.
Mîromo yake îkariî ta maûa maro mûno,
îgîtîkaga maguta manungi waro ma mûtî wa mare.
14Njara ciake ciîkîrîtwe mvang'iri cia thaavu,
na ekagîra mathaga ma goro.
Mwîrî wake ûnyorokete ta mûguongo,
ûgemetue na tûthiga twa goro.
15Magûrû make nîmarûngarû ta itugî irî na vinya,
ivandîtwe mûcingirî wa thaavu.
Onekaga ekariî ta irîma cia Lebanoni,
anyorokete ta mîtarakwe ya kuo.
16Ciugo ciake irî mûrîo,
ngenagua nî maûndû make monthe.
Mue aka a Jerusalemu,
ûguo nîguo mwendwa wakwa ekariî.
Currently Selected:
Rwî 5: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
