Rwî 4
4
Mûndûmûrûme
1We mwendwa wakwa wî mûthaka,
nama wî mûthaka!
Metho maku nîta ma ndutuura,
vuva wa gîtambaa gîaku,
njuîrî ciaku nî ta ndîthia ya mbûri,
inyûrûrûkîte kîrîmarî Kîam Gileadi.
2Magego maku macerûvîte ta ng'ondu yarîkia kwenjwa na kûthambua.
Gûtirî wanarî rîmwe rîtarî vo,
monthe maringanîte maîrî maîrî.
3Mîromo yaku îkariî ta rûrigi rûtune,
îthagîrwa îrî mîaro mûno rîrîa ûkwaria.
Makai maku matuvîte ta inuku igîrî cia ngûngûmanga,
mamikîtwe nî gîtambaa gîaku.
4Ngingo yaku nî ta nyomba ndaca ya Daudi,
îtumîtwe ya kwiga indo cia mbaara,
îcurîtue ngo ngiri îmwe cia athigari njamba a mbaara.
5Nyondo ciaku nîta nthwariga cia mathatha,
ikîrîa kûndû kûrî ma maûa.
6Nîngekara kîrîmarî Kîam mînyamû mînungi waro ya mare,
na karîmarî ka ûbani,
nginya rîrîa gûkathamburûkana,
na nduma îthire.
7Mwendwa wakwa wî mûthaka mûno,
na ndûrî wanarî wathe.
8Mûviki wakwa nyûrûrûka ume irîmarî cia Lebanoni,
ûka tuume Lebanoni.
Nyûrûrûka ume îgûrû rîa kîrîma Kîam Amana,
ume kîrîmarî gîa Seniri na Kîam Herimoni,
kûrîa mînyambû na ngarî itûûraga.
9Nîûkenetie ngoro yakwa mwendwa wakwa mûviki wakwa,
na mûkathî ûrîa wîkîrîte nîûgucîrîrîtie ngoro yakwa.
10Mwendwa wakwa mûviki wakwa wendo waku nîwa magegania,
wendo waku nî mwaro gûkîra ndivei;
maguta marîa wîvakîte nî maro gûkîra mînyamû mînungi waro.
11Mîromo yaku îcamaga ta ûûkî, mûviki wakwa,
rûrîmî rwaku rûrî na îriia na ûûkî.
Mûnungo wa nguo ciaku wîkariî ta mûnungo wa mîtarakwe ya Lebanoni.
12Mwendwa wakwa mûviki wakwa we wî mûgûnda mûthithe,
mûgûnda mwirigîre, kîthima kîrî na mwene.
13Mûgûnda ûcio nîûkûraga mîtî ya mîkûngûmanga,
îrîa îciaraga matunda maro mûno,
gûtituraga hena na nadi,
14nadi na safuroni, kalamusi na cinamoni,
na mîtî yonthe ya ûbani mûnungi waro,
mînyamû mînungi waro wa mare na kîthûnjû,
na mînyamû yonthe ya maguta manungi waro.
15We wî kîthima kîvecaga mûgûnda manjî,
kîthima Kîam manjî marî mwoyo,
tûrûnjî tûnyûrûrûkaga kuuma irîmarî cia Lebanoni.
Mûndûmûka
16We rûkûngi rwa mwena wa rûgûrû vurutana,
we rûkûngi rwa mwena wa îveti ûka.
Vurutana mûgûndarî wakwa,
mûnungo mwaro wîcûre kûndû kuonthe.
Tiga mwendwa wakwa aûke mûgûndarî wake,
arîe matunda maguo marîa maro.
Currently Selected:
Rwî 4: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
