Rwî 2
2
1Nie nîrî yûa rîa Sharoni,
nîrî yûa rîrî Kîamndarî.
Mûndûmûrûme
2Ta ûrîa yûa rîthagîrwa rîrî rîthaka mîguarî,
nîguo mwendwa wakwa ekariî gatagatî ka erîtu.
Mûndûmûka
3Ta mûtî wa matunda gatagatî ka mîtî ya mûtitû,
nîguo mwendwa wakwa ekariî gatagatî ka anake.
Nîmendaga gwîkara kîrururî Kîamguo,
na îtunda rîaguo rîrî mûrîo.
4Nîwamvirire nyombarî ya kîrugo,
akîngunîkîra na wendo.
5Nûmia thavibu nîguo ngîe na vinya,
na ûnyondore na matunda marî mûrîo,
nîûndû nîrî mûrwaru nî wendo.
6Njara yake ya ûmotho înyitîte îng'oti,
nayo njara yake ya ûrîo îkambarara.
7Mue aka a Jerusalemu nînamûthaitha,
îîvîteni na nthiia na nthwariga cia werû,
atî tîmûtonyerera wendo wetû.
Rwîmbo rwa kaîrî.
Mûndûmûka
8Nînîregua mûgambo wa mwendwa wakwa.
Avîtûkîrîrîte irîmarî avinyûrîte,
avinyûrîrîte tûrîmarî aûkîte kûrî nie.
9Mwendwa wakwa ekariî ta nthwariga,
kana nthiia ya njamba îtarî ngûrû.
Arûngamîte vakuvî na rûthingo,
aroreretie ndiricarî,
aroreretie mwanyarî.
10Mwendwa wakwa arambarîria akauga atîrî,
Mûndûmûrûme
“Ûka mwendwa wakwa,
mûnyanyawa ûka tûthiî.
11Îvinda rîa mvevo nî rîthiru,
mbura nîtigîte kuura.
12Maûa mecûrîte nthî yonthe,
rîîrî nî îvinda rîa kwina,
mîgambo ya ndutuura nîreguîka mîgûndarî.
13Ngûyû nîciambîrîrîtie gûtunîva,
mîthavibu nîîraraa na îkaruta mûnungo mwaro.
Ûka rîu, mwendwa wakwa,
mûnyanyawa ûka tûthiî.
14We wîkariî ta ndutuura îthithîte mwanyarî wa îthiga.
Tiga mone ûthiû waku,
tiga mbîgue mûgambo waku,
nîûndû mûgambo waku ûrî mûrîo,
na ûthiû waku nî mûthaka.
15Tûnyitîreni mbwe, mbwe irîa nini,
itanacûkangia mîthavibu îkîthundia.”
Mûndûmûka
16Mwendwa wakwa nî wakwa nanie nîrî wake,
arîthagia ng'ondu ciake kûrîa kûrî maûa,
17mbere ya gûkîe na nduma îthire.
Coka mwendwa wakwa ta nthwariga,
kana ta nthiia îtarî ngûrû îrî irîmarî cia Betheri.#2.17 Betheri: Kiugo gîkî na Kîhibirania gîtiîcîkene ûrîa kiugîte.
Currently Selected:
Rwî 2: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
