Isa 60
60
Riiri ûrîa ûgaaûka wa Jerusalemu
1We Zayuni rûngama na ûkenge nîûndû ûtheri nîûkwarîrîte,
na riiri wa Ngai-Mûnene nîûkûmûrîkîrîte!
2Taroria nduma nîgaakunîka nthî,
na nduma ndumanu îkunîke andû;
nwatî Ngai-Mûnene nîagaakûmûrîkîra,
na riiri wake nîûkooneka îgûrû rîaku.
3Ndûrîrî nîigaaûka ûtherirî waku,
nao athamaki maûke ûkengurî waku.
4Roria mîena yonthe wone:
andû onthe maraûngana vamwe maûkîte kûrî we!
Anake aku nîmakaauma kûndû kûraca,
na erîtu aku magaaûka makuuîtwe na njara ta ciana.
5Nîûkoona ûguo, na wîcûrwe nî gîkeno,
ngoro yaku nîgaacanjamûka nî gûkena,
nîûndû ûtonga wa ndûrîrî nîûkaaretwe kûrî we,
ûtonga wa îriarî nîûkaaretwe kûrî we.
6Ikundi cia ngamîîra nîigaakunîka vûrûri waku,
njaû cia ngamîîra cia kuuma Midiani na Efa.
Cionthe nîigaaûka kuuma Sheba ikûreterete thaavu na ûbani,
na nîikaanîrîra ngumo ya Ngai-Mûnene!
7Ndîthia cionthe cia ng'ondu cia Kedari nîikaaûnganua vamwe iretwe kûrî we,
nîûkaaruta ndûrûme cia Nebaiothi magongoona,
ciathînjwa na cigîrîrwe metharî yakwa ya kîgongoona nîngaaciamûkîra,
na nîngaathakaria hekarû yakwa gûkîra mbere.
8Nîarîkû aarîa maûmbûkîte ta matu,
kana ta ndutuura igûrûkîte ithiîte ciururî ciacio?
9Nî meri ciumîte mavûrûrirî ma kûraca,
itongoreretue nî meri cia Tarishishi.
Iretete andû aku kuuma kûndû kûraca,
marî na sîlûva na thaavu ciao,
nîûndû wa rîîtwa rîa Ngai-Mûnene Ngai wenyu,
na nîûndû wa Ûrîa Mûtheru wa Isiraeli,
nîûndû nîatûmîte mûgîe riiri.
10Ageni nîo magaatuma rîngî nthingo cienyu,
nao athamaki ao nîmakaamûtungatîra.
Wana ethîrwa nînamûverithirie nîûndû wa kûrakara,
rîu nîngûmwîguîra ntha na nîmûtuge.
11 #
Kûguû 21.25-26
Ivingo ciaku igeekaraga irî mvingûre,
itikaavingwa ûtukû na mûthenya,
nîguo andû magaakûretagîre ûtonga wa ndûrîrî,
marûmanîrîrîte na athamaki ao.
12Nwatî ndûrîrî kana ûthamaki ûrîa ûtagaagûtungatîra,
nîkwa ikaathirua viû.
13Nîûkaareterwe riiri wonthe wa Lebanon:
mîthithinda, mîcindanûgû na mîkarakava yonthe nîîkaretwe nîguo îgemie hekarû yakwa,
nanie nîngaacoka nthakarie varîa mbîkaraga.
14 #
Kûguû 3.9
Ciana cia arîa maagûkinyagîrîria nîigaaûka,
ikwînamîrîre ikûve gîtîîo.
Arîa onthe maakûnyararaga magaaûka menamîrîre mbere yaku.
Magaagwîta, “Îtûûra rîa Ngai-Mûnene,
Zayuni, Îtûûra rîa Ûrîa Mûtheru wa Isiraeli.”
15Wana ethîrwa nîwatiganîrîtue na ûkamenwa,
na andû onthe makaûraga nîwe,
vandû va ûguo nîngaagûtua ûgîe na riiri tene na tene,
kûndû kwa gûkenagîrwa nî njiarwa cionthe.
16Nîûkaareterwe irio nî andû a ndûrîrî,
athamaki magaakûvecaga irio mbaro,
na nîûkaamenya atî nie Ngai-Mûnene, nînie Mûvonokia waku,
nînie mwene Vinya mûkûri wa Jakovu.
17“Vandû va gîcango ngaakûretere thaavu,
vandû va cuuma ngûretere sîlûva,
vandû va mîtî ngûretere gîcango,
na vandû va mathiga ngûretere cuuma.
Nîngaatûma wathagwe na thayû,
na ûtucagîrwe na kîvooto.
18Gûtigaacoka kwîguîka thîna rîngî vûrûrirî waku,
yûra kana kwanangîka gûtikegwîka rîngî mîvakarî yaku.
Nîngaakûgitagîra na ngûmenyagîrîre ta rûthingo,
nawe nîûkaangoocaga nîûndû nîngûvonoketie.
19 #
Kûguû 21.23; 22.5 “Riûa rîtigacoka rîngî gûkûmûrîkîra mûthenya,
wana kana mweri ûcoka gûkûmûrîkîra mathaa ma ûtukû,#60.19 mathaa ma ûtukû: Mandîko mamwe ma tene ma Kîhibirania matirî ‘mathaa ma ûtukû.’
nwatî nie Ngai-Mûnene nînie ngaatuîka ûtheri waku wa tene na tene,
naguo riiri wakwa ûkûmûrîkagîre.
20Riûa rîaku na mweri waku itikaathûa rîngî,
nîûndû nie Ngai-Mûnene nînie ngethîrwa nîrî ûtheri waku tene na tene,
nayo mîthenya yaku ya kîeva nîkaathira.
21Andû aku onthe makethîrwa marî athingu,
na nîmakegwatîra vûrûri tene na tene.
O magaatuîka ta mûtî ûrîa mvandîte nie mwene,
nîguo ngumague nî andû onthe.
22Ûrîa mûnini gatagatîrî kenyu nîagaakûra atuîke mûvîrîga,
nake ûrîa ûtarî na vinya atuîke rûrîrî rwî na vinya.
Vîndî îrîa mbagîrîru yakinya nîngeka ûguo na îvenya.
Nie nînie Ngai-Mûnene!”
Currently Selected:
Isa 60: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
