Popular Bible Verses from Isa 60

Share

We Zayuni rûngama na ûkenge nîûndû ûtheri nîûkwarîrîte, na riiri wa Ngai-Mûnene nîûkûmûrîkîrîte!

Ndûrîrî nîigaaûka ûtherirî waku, nao athamaki maûke ûkengurî waku.

Taroria nduma nîgaakunîka nthî, na nduma ndumanu îkunîke andû; nwatî Ngai-Mûnene nîagaakûmûrîkîra, na riiri wake nîûkooneka îgûrû rîaku.

Ûrîa mûnini gatagatîrî kenyu nîagaakûra atuîke mûvîrîga, nake ûrîa ûtarî na vinya atuîke rûrîrî rwî na vinya. Vîndî îrîa mbagîrîru yakinya nîngeka ûguo na îvenya. Nie nînie Ngai-Mûnene!”

“Riûa rîtigacoka rîngî gûkûmûrîkîra mûthenya, wana kana mweri ûcoka gûkûmûrîkîra mathaa ma ûtukû, nwatî nie Ngai-Mûnene nînie ngaatuîka ûtheri waku wa tene na tene, naguo riiri wakwa ûkûmûrîkagîre.

Riûa rîaku na mweri waku itikaathûa rîngî, nîûndû nie Ngai-Mûnene nînie ngethîrwa nîrî ûtheri waku tene na tene, nayo mîthenya yaku ya kîeva nîkaathira.

Nîûkoona ûguo, na wîcûrwe nî gîkeno, ngoro yaku nîgaacanjamûka nî gûkena, nîûndû ûtonga wa ndûrîrî nîûkaaretwe kûrî we, ûtonga wa îriarî nîûkaaretwe kûrî we.

Roria mîena yonthe wone: andû onthe maraûngana vamwe maûkîte kûrî we! Anake aku nîmakaauma kûndû kûraca, na erîtu aku magaaûka makuuîtwe na njara ta ciana.

Andû aku onthe makethîrwa marî athingu, na nîmakegwatîra vûrûri tene na tene. O magaatuîka ta mûtî ûrîa mvandîte nie mwene, nîguo ngumague nî andû onthe.

Gûtigaacoka kwîguîka thîna rîngî vûrûrirî waku, yûra kana kwanangîka gûtikegwîka rîngî mîvakarî yaku. Nîngaakûgitagîra na ngûmenyagîrîre ta rûthingo, nawe nîûkaangoocaga nîûndû nîngûvonoketie.

Ivingo ciaku igeekaraga irî mvingûre, itikaavingwa ûtukû na mûthenya, nîguo andû magaakûretagîre ûtonga wa ndûrîrî, marûmanîrîrîte na athamaki ao.

Ikundi cia ngamîîra nîigaakunîka vûrûri waku, njaû cia ngamîîra cia kuuma Midiani na Efa. Cionthe nîigaaûka kuuma Sheba ikûreterete thaavu na ûbani, na nîikaanîrîra ngumo ya Ngai-Mûnene!

Ageni nîo magaatuma rîngî nthingo cienyu, nao athamaki ao nîmakaamûtungatîra. Wana ethîrwa nînamûverithirie nîûndû wa kûrakara, rîu nîngûmwîguîra ntha na nîmûtuge.

Wana ethîrwa nîwatiganîrîtue na ûkamenwa, na andû onthe makaûraga nîwe, vandû va ûguo nîngaagûtua ûgîe na riiri tene na tene, kûndû kwa gûkenagîrwa nî njiarwa cionthe.

Nîûkaareterwe irio nî andû a ndûrîrî, athamaki magaakûvecaga irio mbaro, na nîûkaamenya atî nie Ngai-Mûnene, nînie Mûvonokia waku, nînie mwene Vinya mûkûri wa Jakovu.