Isa 59

Mûrathi nîwamenererie mevia ma andû

1Tigani gwîciiria atî Ngai-Mûnene ndarî na vinya wa kûmûvonokia, kana atî matû make nîmavingaru ndangîvota kûmwîgua! 2Nwatî mevia menyu nîmamwamûranîtie na Ngai wenyu. Nî mevia menyu matûmîte amwîthithîre nîguo ndakamwîgue mwamûvoya. 3Nîûndû njara cienyu nîinyitîtwe nî mûgiro nîûndû wa kûragana, ciara cienyu igeka ciîko njûku, mîromo yenyu nîyarîtie maveeni, natuo tûrîmî twenyu tûkaaria waganu.

4Rîrîa mwathiî îgootirî, gûtirî mûndû ûrûmagîrîra kîvooto. Gûtirî mûndû ûthitanganaga arûmîrîrîte ûma. Mwîvokaga mîario îtarî kîene na mûkaveenania, mûtungaga maveeni na mûgatûma maûndû macûku mekîke. 5Mwîkariî takwa mûrumûraga matumbî ma njoka irîa irî ûrogi, na mûgookotha rûûî rwa mbûmbûî. Mûndû ûrîa ûngîrîa matumbî menyu nîkwa angîkua, na îtumbî rîmwe rîamo rîngîûragwa, njoka îrîa îrî ûrogi nîyo yumaga kuo. 6Ta ûrîa rûûî rwa mbûmbûî rûtangîkîrwa ta nguo, andû matingîvota gwîkunîkîra na maûndû marîa makaga. Wîra wao nî wîra wa waganu, na mekaga maûndû mao na vinya. 7#Aro 3.15-17 Mûvinyûragîra gwîka waganu, na mûkevîka kûûraga arîa matarî na mavîtia. Mwîciragia maûndû ma waganu, kûrîa kuonthe mwavîtûkîrîra mûtigaga mwacûkangia na mwomomora. 8Mûtiîciragia maûndû ma thayû, wana kana mûrûmîrîra maûndû ma kîvooto. Mwîrûthîrîte njîra cia ungumania, na gûtirî mûndû ûvîtûkagîrîra njîrarî icio wîgucaga arî na thayû.

Andû kumbûra mevia mao

9Nîûndû wa maûndû mau twîkîte, kîvooto kîrî kûraca natue, na Ngai nîarutîte ûthingu wake kûrî tue. Tûcaragia ûtheri, nwatî twîyonaga ndumarî, twîriragîria kûthiîrîra ûtherirî, nwatî tûthiîcagîrîra ndumarî. 10Tûthiîcaga tûkînyitanyitaga rûthingo ta itumumu, tûnyitanyitaga njîra ta andû matarî na metho. Tûvîngagwa mûthenya riûa rîrî îgûrû kîvîrî takwa kûrî ûtukû, tue twîkariî ta andû marî akuû tûrî gatagatîrî ka arîa marî vinya. 11Tuonthe tûraramaga ta ngatûnyi, twîkaraga tûgîcaga ta ndutuura. Twetagîrîra tûone waragania nwatî tûtiwonaga; twetagîrîra ûvonokio, nwatî ûrî kûraca natue.

12Nîûndû nîtûkûvîtîrîtie mûno. Mevia metû nîmaratûthitanga, nîûndû tûthiîcaga tûkuuîte mavîtia metû, na nîtîcî mawîvia metû monthe. 13Nîtûreganîte nawe na tûgagûkaana we Ngai-Mûnene, tûgagûtiganîria na tûkarega gûkûrûmîrîra we Ngai wetû. Twaragia ûvoro wa gûkinyanîrîria na gûkanîrîra, ngoro cietû ciîciragia na ikaria ciugo cia maveeni. 14Kîvooto nîkîthengutîtue, naguo ûthingu ûgekara varaca. Ûma nîkwa ûkinyangagîrwa nthî magootirî, naguo wîvokeku ndonekaga kuo. 15Ûvoro wa ma ndwîthagîrwa kuo, na mûndû wa wonthe ûtiganaga na maûndû macûku nîkwa averithagua.

Ngai-Mûnene nîwevarîrie kûvonokia andû ake

Ngai-Mûnene nîwonire maûndû mau, na nîwarakarire nîûndû gûtiarî na kîvooto. 16#Isa 63.5 Ke nîwonire atî gûtiarî na mûndû ûngîtethia arîa akinyîrîrie. Kwoguo ke nîatûmîra vinya wake amavonokie na amave ûvootani. 17#Aef 6.14,17; 1Ath 5.8 Nîekîra ûthingu takwa arî guo ngo ya kwîgitîra kîthûri, na ekîre ûvonokio kîongorî gîake ta ngovia ya kûgitîra kîongo. Nîeîkîra wîrîvîrîria ta nguo, na eyove wîru ta mûcivi. 18Akaaverithia nthû ciake kûringana na ciîko ciao, akaaverithia nthû ciake na marakara, wana irîa irî mavûrûrirî ma kûraca. 19Kuuma mwena wa îthûîro, wa mûndû nîagetigîra rîîtwa rîa Ngai-Mûnene, na onanie riiri wake kuuma mwena wa îrathîro. Nîûndû Ke agaaûka ta rûnjî rûvinyûrîte, rûtindîkîtwe nî rûkûngi rûnene rwa Ngai-Mûnene.

20 # Aro 11.26 Ngai-Mûnene arera andû ake atîrî, “Ngaaûka Zayuni nîrî Mûkûri wa andû a njiarwa cia Jakovu arîa magaatiganîria mevia mao. 21Njoke nthondeke kîrîkanîro namue atî: vinya wakwa ûrîa nîmûvete na mataaro makwa marîa namûveere, nîmûtûûra nacio, na itûûre na ciana cienyu wana ciana cia ciana cienyu, kuuma rîu nginya tene na tene.”

Currently Selected:

Isa 59: KKB

Highlight

Copy

Compare